Skip to main content

He Khawvelah eng vanga piang nge ka nih ?

Mihring hi tu siam nge kan tih chuan ..Pathian siam kan ni..kan ti mai. Pathian siam kan ni tih hi Kristiante chuan kan pawm mai. Mahse eng vanga piang nge kan nih tih hi  ngaihtuah rauh rauh chang kan nei thin.

A chang chuan  mihring ngaihtuahnaah heihi a lo awm ve thin.... 'Eng vanga piang ve kher  nge ka nih le, he khawvelah hian harsatna tam tak tawk tur leh, kan tawh zawh pawh a kan sual chuan chatuan hremhmuna kal kher kher....  he programme hi tu planed nge ? Pathian chungnung bera Planned a nih chuan min siam lo tawp se a tha mai lawm ni ? Hetia Pressure nasa tak hnuaia khawvela awma, vanram kaltheina chance te min siam sak mahse.. thil harsa tak hlen tur te a ruat a.. min va bawl kual nasa ve ?? He khawvela hrehawm tawrh zawh hnu pawha chatuan mei dil tlakna tur a la awm tho hi...min va nghaisa ve..  ' tia inngaihtuah rauh rauh chang kan nei thin.

Kan ngaihtuah dan chu mihring lam atang chuan dikna chen pawh a awm a ni. Mahse Mihring leh khawvel thil zawng zawng hi eng vanga siam nge a nih ? tih hi kan hriatchian chuan Pathian kan fak ngei ang. Pathianin lei leh van leh a chhunga thil awmte zawng zawng hi a tan tangkaina enge awm ? Siam lo sela, a tan a pawi em ni ?


Enge a siam chhan ber ?
 Pathian lehkha thu atanga kan hmuh dan chuan, Pathianin khawvel leh a chhunga thil awmte a siam chhan berte chu, thil tha sang ber puitlinna tur a ni a, thil tha sang ber chu amah Pathian ropuina chu a ni, tih a ni. 

Mahni Hmasial Pathian ??
Mi thenkhatin, Pathian chu...chutianga ama ropuina ngawt tura thil a siam a nih chuan mahni hmasial a ni maw ? an ti a ni thei e ; mahse a dik a ni. "Dikna lal tiang chu a ram lal tiang a ni a", thil dik ber chu a thawh dan tur a ni. Dikna danah chuan chawimawi tlak ber apiang chu chawimawi ber tur a ni a, ropui tlak ber apiang chu ropui ber tur a ni a, chumi dana ngaihtuah chuan Pathian chu mi zawng zawng aia chawimawi tlak ber leh ropui ber tur a ni . Chuvangin Pathian pawhin a tlak ber atana engkim a siam chu a dik a ni. "Atan engkim a awm a, azara engkim awm bawk atan chuan"(Heb. 2:10-ah) tih a ni a, engkim hi Pathian tan a ni a, engkim hi amah avanga lo awm a ni. A hmangaihna leh thatna tihlan nana a siam a ni a, chu chu ama ropuina tur a ni.

Mihring chu nge vang kher chuan nge a siam tak ?
Van angel leh seraf te hi Pathian fak tur hrim hrim a program sa an ni a, automatic-in Pathian hi an fak reng. Chu chuan Pathian ropuina a la phawk chhuak zo lo. Lei leh van leh leichhungah rannung tinreng a siam, heng zawng zawng hian Pathian ropuina pawh chu a la puang chhuak zo lo...Hengte hi chu thlarau pawh neilo an ni a, Pathian in awm rawh u a tih dan a awm ve mai an nih avangin Pathian Pathianna pawh an hre ve thiam lo.

Chutah...mahni duh thu ngeia faka, faklo thei mihring ; chhia leh tha hria, duh thlang thei leh ama anpui ngei a siam ta. Hei zet chu Pathian pawhin a dah sang rapthlak khawp mai. Mihring hian Pathian ropuizia chu a puang chhuak thei ta..hei hi a ni Pathian lawm famkimna chu. Lal Davida pawh khan "Mihring hi enge maw a nih a, i hriat reng thin ni", a tih thlawt kha. A ngaihpawimawh zia kan hriat chian theihna tur chu... mihring suala kan tluk hnuah chhanchhuah nan Amah ngei a rawn thi a nih kha.... min chhanchhuak satliah a ni lo, Pathian hmangaihna leh ropuina a rawn puang(introduce) a ni.

He Khawvelah eng vanga piang nge ka nih ?
Kan thupui chhanna tur chu heihi a lo ni ta... Mihring kan lo awm ve ringawt nachhan hi chu, Pathian ropuina tifamkim turin. Thilsiam hluber leh Pathian hnuaichiah chanvo pek kan nihnaah hian awmlo ata awm ka lo ni hi ka lawm a, Pathian chu fakin awm rawh se.

Comments

  1. I thuziak te angaihnawmin a ril thei khawp mai.Blog pawh i nei changtlung e.

    Pawi itih loh chuan kan link ve nghal nghe nghe teh ang che!

    ReplyDelete
  2. min lo ngaidam la.. Maltea i ni em? .. ex-govt. hr. sec school [commerce]? goalkeeper thin? :-) ...

    *you may delete this comment.. ka classmate hlui i ni tlatin ka hria.. nih lo chuan clone :D

    ReplyDelete
  3. @sekibuhchhuak.... i ti lawmawm e.... ka article te min lo chhiar sak duh avangin :)

    @Blind Dayze..... i ring dik mai thei :) tin, i art work ka lo en ve nual tawh e... ka ngaihlu khawp mai..

    ReplyDelete
  4. he heee...mi(sual) a self harm post kha ka lo chhiar a.. i username kan click khan tah hian ka ron thleng ta.. i profile pic kan enna ..hei chu classmate hlui.. va ang e ka tia :D..

    hei blog i nei puitling lutuk.. rin aiin football lampang post a tlem :-).. ka en vek lo nangin i post zawng2 he hee..

    ReplyDelete

Post a Comment

Popular posts from this blog

Mi hi hmusit ngawt thei kan ni em?

Vawi khat chu lehkha pawimawh pein in pakhatah ka lut a, pa ber chuan an fapa naupang zawk chu a la hau mek. "I nu leh pain hna kan thawk ve ve, i duh duhna hmunah pawh i zir thei, sang tak zir turin kan duh che a, i mamawh chu kan pe vek chein kan hria, mahse hei enge i rawn zirchhuah hi? Degree pawh nei lovin hei nileng lengin game i khel a, i u hi chuan kan thu a awih a, tunah chuan dortor niin hlawh tam tak a nei tawh a nih hi, nang ve chu," a lo ti mawlh mawlh a. Lehkha ka pek zawh chuan ka chhuak lehnghal vat a.

Chumi tuk chu inrinni a ni a, chhungte in sa ka pui a, chhunah thingpui in chawlh kan hmang. Hnathawk ho nen chuan kan inrual tlang, kan thu hova, kan titi malh malh a. Labour hna chu a hahthlak thu leh security tha ve deuha thawh an chak thu an sawi liam liam. Pakhat chuan, "Pawl 12 thleng lehkha ka zir, Accountancy te leh Company Accounts te kha chu a thiam ber ka ni thin kan class-ah kha chuan. Company Secretary te kha zir zawm ka tum ve nasa, migratio…

Football manager leh player te inkungkaihna

Football manager-te hi club chhungah chuan an thu thin hle a, game an khelh dan tur zawng zawng an ruahman thin bakah club thenkhatah chuan player transfer chungchangah pawh thuneihna an nei thin bawk. Club thenkhatah chuan manager te hian nipui bazara player an duhzawng an sawi a, chung player te chu club hotuten lak tumin theihtawp an chhuah thin.

Football manager hna chungchang hi ram a hrang angin tihdan pawh a hrang ve deuh thin a. England-ah chuan manager te hi club enkawlna kawnga a fung pawimawh tak chelhtu an nih thin laiin ram dangah erawh manager ni lovin football coach pangngai angin an inchhawr mai a, team an practice pui a, game khelh dan tur an ruahman leh a, football game chungchangah chauh an thu a ni deuh mai.

England-ah chuan football manager te hi an thu thin khawp a, team management zawng zawng an buaipui bawk a, player zingah hmasawn lo leh an thawhpui theih lohte chu an thehchhuak hmiah hmiah thei bawk. Player te pawhin team-a tel ve ziah an duh a nih chuan man…

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…