Skip to main content

Duan lawk khawvel mahse tawn chawp hringnun nisi


Hring nin hi duan lawk a ni thei ang em ?
Mi pakhat hi Car accident ah a thi a. Kha thihna kha Pathian thlen nge ama thlen ? Pathian hian khapa thih hun kha a ruat lawk tihna em ni ? Nge, Kha pa kha lo fimkhur deuh ta selang, kha thihna ata kha a him thei zawk ang ? engkim hi , accident lo awm te pawh hi Pathian hian a ruat lawk sa diam tihna emni ni zawk ?
Pathian hian engkim a siam a, khawvela thil rawn thleng tur zawng zawngte pawh hi a hre lawk bawk, sawrkar thar rawn piang turte, minister thar turte a hre lawk awm si a. Tin, indonaa chak tur zawk pawh hi a remruatna liau liau a ni. Ti ta ila, a nih leh mihringa duhthlan theihna a dah hi eng atan chuan nge ni ta ang ? Kan duhthlan tur leh kan khawvel la hman dan tur zawng zawng a hriat lawk vek si chuan ?
Ruat lawk khawvel a ni e tih theih tur chuan Bible ah pawh chang tam tak lak chhuah tur a awm. Ephesi 1:4 ah chuan heti hian a inziak a. “Thianghlim leh sawiselbova a hmaa kan awm theih nan leilung pian hma khan hmangaihnain Kristaah min thlang tawh”.
Heti a nih chuan Pathian hian khawvel a siam hma daih atang khan min lo thlang daih tawh tihna a ni si a. A nih leh khawnge duhthlanna chu ?He hla thu “Khawvel pian hmaa talh tawh Beram no” atang hian ngaihtuah chhin ila, Evi leh Adama khan kha thei kha ei lo turin duh an thlang thei tehreng em ? Nge sual tur hrim hrim a duan sa an ni zawk tihna ?
 
Juda iskariota kha han ngaihtuah leh ta ila, Thil tha ti turin duhthlanna a hmang thei reng em ? Lal Isua khan “Mihring Fapa hi a chanchin an ziak ang tak khan a kal dawn a ni; nimahsela, Mihring Fapa mantirtu tur chung chu a pik e; chu mihring chu piang lo se a tan a tha zawk tur”, Mathaia 26:24. a ti a. A last sentence hi ngaihtuah teh,”chu mihring chu piang lo se a tan a tha zawk tur”. Heti a nih chuan Juda kha thil sual ti tur hrim hrima duan lawk tihna a ni thei dawn a ni.
Paula khan Rom 9:20 ah khan heti hian a ziak bawk a, “Aw mihring, Pathian hnial veitu chu tunge maw i nih le ? Thilsiam chuan a siamtu hnenah, Engatinge hetianga mi siam ? a ti angem ni.”, tiin. Heti a nih chuan Puppets ang mai kan ni a, puppets control-na hrui chelhtu chu Pathian a ni dawn tihna a ni maw. Pharoa leh Mosia chungchangah pawh khan, Pathian khan Pharoa thinlung a tih khauh sak tih kan hmu bawk. Chuti a nih chuan Pathian hian a duh duhin min chet tir tihna a ni thei ang em ?
Engkim hi ruat lawk leh duan sa vek a nih chuan Sam 37: 5 a a sawi ang hian ” I awmdan tur chu LALPA chungah nghat la, Amah chu ring la, Aman a ti vek ang”, … engvang chuan nge kan ropuina lo thleng tur te, kan chunga thil engkim lo la thleng tur chu thu chunga kan lo nghah mai lohvang ? A lawm awm e, “chuti chu vanram kai turin min lo ruat lawk maithei, chu vang chuan thu chungin vanram ka kai hun tur chu kan nghak ang e”, kan ti mai dawn tihna em ni?
Presbyterian kohhran ten ngaihsan em em John Calvin-a ngei pawh khan he ruatlawk theology hi a ring khawp mai. Tuna computer hmaa ka thu te, ka thil chhut zawng zawng te, kan nupui pasal tur te leh kan thih ni tur thleng te hian ruatlawk, duansa.. niin a ngai.
Engkim hi Duan lawk ni ta se, khawnge kan duhthlanna chu ni ta ang ?
Engkim hi duan lawk a ni e tih hi kan pawm a nih ngai chuan Pathian in a ngaihpawimawh em em duhthlanna, chhia leh tha hriatna hi kan hnawl dawn tihna a ni a. Hei hi a dik chiah dawn em ni ? He Theology avang hian mi tam tak chu an kal sual mek a. Pathian in kan hma hun zawng zawng a hriat vek si chuan a nih leh thu mai mai ila, kan thil tawn tur leh malsawmna lo thleng tur chu thu chungin i nghak chhuak tawp mai ang, tiin ngaihdan an nei thin.
Engkim hi duan lawk vek a ni lo tih chu Ruai ropui theh tehkhin thu, Luka 14:15 ah khan kan hmu thei awm e. Zanriah ropui buatsaih tupa khan a mi sawmte kha rawn kal ngei ngei turin thuchhuah a siam a lang lo. Tin, a sawm zawng zawngte kha rawn tel ngei ngei turin ti ta selang chuan a bawih tirh te khan theih tawkin an sawm anga, an kal peih lo chung chung pawh kha a puak talin ruai theh turin in lamah an paw haw ngei ang. Khang a sawm zawng zawngte kha rawn kal duh selang chuan an kal vek thei ang, mahse a duh chu an kal a, a duhlo chu an kal bik chuang lo. Hetah hian chiang ta em em chu Pathian hian kan duhthlanna hi min zah sak a, min ti lui lo a ni.
Kan duhthlanna a zah em em a ni tih chu Johana 3:16 ah pawh khan kan hmu bawk awm e, “Pathianin Khawvel a hmangaih em em a, tichuan, a Fapa mal neih chhun a pe a, amah chu tupawh a ring tawh phawt chu an boral lova, chatuan nun an neih zawk nan”, tiin a inziak. Min chhandam, mahse rin ve a angai. A ring apiang chuan chatuan nun an nei anga, a ring duhlote chuan nun an nei chuang lovang. A nih leh engkim hi remruat sa vek lo nita selang, a ring duh leh duh lo pawh vanramah min kai tir vek mai tur a ni . Heti fakauva min hmangaih, Kross a thi hial khawp a kan tana rawn tuar chuan Hremhmuna kan kal hi a phal thlawt lo tihna a ni a. Mahse he rin dan hi chu kalsualna a ni bawk si.
Heti zawng zawk hi a lo ni a, Pathian khan suala kan tluk turte chu a ring lawk thei alawm. A chhan chu mihringte hi thlem sam kan ni a, tlu thei mai kan ni tih hi a siamtu chuan a hrechiang dawn em a sin. Pathian khan mihringte hi chhia leh tha hriatna min pe, engvang kher chuan nge hei hi mihringah a dah ni ? A chhan chu maw, Van angel leh seraf te hi Pathian fak leh chawimawi tur hrim hrima ruat leh duan sa an ni. An ni ho hian Pathian ropuina an paw chhuak zo lo chiang hle awm e. Chutah, A anpui ngei, chhia leh tha hria, duhthlang thei mihring a siam ta a. Heizet hi chuan Pathian ropuina a puang chhuak thei ta.Duh a fak, duh loh chuan fak lo thei dinhmun atanga, kan duhthu ngei a mihringin Pathian kan fak hian Pathian hi a lawm a ni. Pathian ropuina tifamkimtu kan ni. Chutah suala kan tluk theih tur zia a hrechiang khawp mai, keini pawhin ngaihzawng kan han nei thin a, min hmangaih reng se kan duh ve tho, an kalbo kan hlau lutuk. Mahse midang keini aia duh an neih chuan an kalbo thei a ni tih kan hre reng tho. Chutah chuan kan rilru a na anga, an mahni neih let leh theih dan tur thlengte pawhin a then chuan kan ngaihtuah lawk thin ang. An kal bo thei a ni tih hre reng chungin ngaihzawng chu kan nei lui tho thin.
Hetiang chiah hi a ni ve tho Kan Pathian hi. “Khawvel siam hmaa talh tawh Beramno” tih hi, Pathian hian khawvel a siam hma pawh khan mihring suala kan tluk theih tur thu hi a hre reng a lawm. Achhan chu duh thlang thei kan ni a, A mah chu kan kal bosan thei reng a ni tih a hre chiang em em a, hei vang tak hian suala kan tluk hnu pawh a min chhanchhuah leh dan tur remruatna chu a nei sa thlap a ni.
Duan lawk Khawvel Mahse Tawn chawp nun nisi
Pathian hian Khawvel leh a chhunga thil awm zawng zawng leh khawvel pawn thil engkim hi a siam. Khawvel vir dan tur te, ni leh thla leh arsite herkual dan tur te pawh hi a remruat lawk sa vek thil a ni. Nipui a lo thaw a, fur a lo ni leh a, favang chu thlasikin a rawn chhunzawm bawk a. Eco system hrang hrang, nungcha in ei chhawn dan tur zawng zawng te, keini mihring taksa chhung khawl chet kual dan tur zawng zawng te hi Pathian chuan a duang sa a, a remruatna hnuaia che leh kal kual vel a ni.
Hetih lai hian kan nun kal chho dan tur, entirnan : Thanga hi Pi Hmingi leh Pu Muana te fa 3 na a ni ang a, Champhai Vengthar Primary school I ah a kal anga, Marymount middle school ah kal chhoin, Govt. Mizo Higher Secondary School ah a kal ang a, Hrangbana College ah Graduate in Mizoram University ah MA a zo ang. Tichuan, nupuiah High School a kal laia a ngaihzawng pathumna Sangi a nei ang a, tichuan 2020 April ni 20 ah a boral ang !!! …. heti zawng hi chuan a ruat lawk lo.
Kan hriatthiam theih dan tur chuan, Tuikhuah ka siam a, tui chu a tam chuan luang liam zel thei turin ka siam bawk. sangha te tana khawsak theihna tura hmun nuam a ni. Sangha thahnem tak ka lei a, ka tui khuahah chuan ka dah ta a, tuk tin hian an chaw tur chu ka vawm lut thin bawk. Len hmangin ka duh chuan an len hunah ka man thei, nghakuai hmang pawhin. sangha te hi ka ta an ni a, ka duat em em a, ka tuikhuahah ka chentir, amaherawh chu, an duh duhnaah an cheng kual thei. An duh leh lung karahte an biru thei a, an duh chuan thian chi hrang hrang an kawm thei bawk. Hei hi chu ka thu neihna piah lam a ni ve thung, an duh thlanna a an duh duhna hmuna an kawhsak hi.
Heti zawng zawk hi a ni a Pathianin min enkawl dan leh kan duhthlanna min ngaihpawhmawh sak dan chu. Nitin hian kawngkhar nam hawn tur chi hrang hrang duhthlantur kan nei. Athen chu kawng dik a ni a, a then chu thihna kawngte a ni thin. Khawi kawngah pawh kan kal thei, thihna kawng pawh kan zawh a ni thei. Pathian chuan min awmpui a, kawng dik zawh tur chuan min duh em em thin, chutih laiin kan duh tlat loh chuan thihnaah chuan kan kal tlang thei tho a ni. Chutah chuan Pathian hian kawng dik zawh turin tharumin min nawr lem lo, hetih lai hian setana pawhin sual kawng zawh turin min ti lui bik lo, mahse nasa takin min thlem thei thin.
Eng kawng pawh zawhin, hmun chhe ber thleng pawh thleng mah ila, Kan Pa vanami chuan min hmangaih a, min rawn zawng a, a hmel mawi min hmuh tir a duh thin. Chu chu a ni a remruat zawk ni ta chu. Hmun ralti berah pawh a hnen kan pan theina hun tha min siamsak thin. Pathian chu Fakin awm rawh se. Sual kawng kha zawh turin min ti hauh lo, mahse setana thlemna avangin Amah chu kan hawi san a, hmun hla taka kan kal ta a, kal ngaihna kan hre ta lo, kan kawng zawh kha thihna a ni tih pawh kan hmu thiam a, kan hlau a, kan mangang a ni. E… Ka Pa Vanami khan he hmun ralti atang hian min chhan chhuak thei ang, tiin A mah chu kan han ko a, A ni chuan “Ka fa, i hnungah hian ka awm reng a lawm, rawn hawi let la, ka lam rawn hawi rawh. Sual kawng kha zawh tawh lo la, hla takah thui tak rawn let a ngai love, rawn hawi let mai la, ka hmangaihna angchhungah rawn lut leh rawh, Ka hmangaih che a sin”, tiin min rawn zawng thin a ni. Pathian chu Fakin awm rawh se.
Kan dawizep avang hian Kan chunga thil thlengte hi Pathian remruat vek a ni e kan ti thin.
A nih tum em em thin kha ni pha ta lovin, a aia hnuai daih Sorkar hna chu a thawk ta a, Mahse a ni chuan, “Ka nih tum ka ni thei ta lo kha Pathian remruat a ni e, Ka tum kha chu ni ta ila chuan, Pathian hnaihna chang ka hre lo ang a”, tiin a in hnem. Dik tak chuan exam naa a zir peih loh vanga a nih tur ni pha lo a ni. Taima selang chuan A nih tum chu a ni ngei ang. Chu a tum ber hna chu lo thawk ta pawh ni se, Pathian chuan a hmel mawi chu a hmuh tir tho ang, tuna hna hnuaihnung a chelh lai ang tho hian.
Hetiang chiah hian, A khawsak dik loh leh hur herh avangin mipat hmeichhiatna sualah a tlu ta a, thil sual ti a ni tih a inhria, hrehawm a tiin, a inchhir em em a, a nun a khawhar bawk. Chu khawharna ruam atang chuan chuan Pathian a kova, Pathian chuan a chhang a, thlamuanna neiin Pathian a lo hnaih phah ta a. Chutah chuan a ni chuan” Suala ka tluk kha Pathian remruat a ni, Kha sual atang khan Pathian ka hmu ta a”, tiin a thil sual tih kha Pathian remruat a ti ta hlauh mai. Mahse a ni lo. KTP inpawl honaah thianghlim taka a awm lai pawh khan Pathian chuan a hmel mawi a hmuhtir thei reng tho, Timothea anga sual lam zawng zawh kherlo pawhin.
Nula tlangval an inngaizawng a, an inhmangaih em em, mahse buaina neuh neuh an han tawk ta a, “E..Pathian remruat kan ni lo a niang, Kan tan hian Pathian hian midang min ruat sak a ni ange”, tiin an inthen ta a. Han ngaihtuah chiang teh, Israel fate khan kanan ram an pan lai khan harsatna tamtak an tawk e, khatah khan Pathian remruat a ni lo a niang kanan ram thlen hi… ti ta se, let leh ta selang. Kanan ram kha an thleng hauh lovang. Kan huaisen loh avangte hian kan hmaa harsatna lo awmte hi Pathian remruat a ni ange tiin thuthlukna kan siam zung zung thin.Hei hi thil diklo a ni.
Thui takin ka sawi kual a, mahse kan thupui ni lo daih in i ti tawp ang u hmiang.A tawp nan chuan.. Kan khawvel hi duan lawk a ni a, chutih lai chuan kan nun dan tur hi chu kan tawn chawp a ni thung si. Pathian hian Amah hmangaih let ve turin min duh a, mahse tumah min ti lui si lo. A chang hi chuan lungngai em em leh lungleng em emte hian kan siam thin a ni. Mihring hremhmuna a kal avang hian hrehawm a ti thin a ni. Chuvang chuan heti fakauva min hmangaih a, kan tan a nun hian min petu hi engtia rei nge kan vahbosan dawn ? Sual kawng thui tak kan zawh hnu pawha kan let leh hun nghaka min rawn umzui tu, hla tak thlenga rawn let leh pawh phut lo, lehhawi ringawt pawh pawmtu Kan Pathian hi a zahawm a, nunna kawng min hawn sak hi i zawh ang u. Sual tur hrim hrima piang i ni bik hlei nem, Pathian hian duhsak bik a nei lo, A mah hnaih rawh, tichuan A nin a hnaih ang che.

Comments

  1. Malte.. u r the great!! i wud like to dedicated this article to all the people who doesn't have a courage to achieved their goals and used the Name of GOD to cover up their cowardice.

    ReplyDelete
  2. E khai, Pathianin Lal Davida kha ka rilru ang pu mi a tih ang deuh khan nang hi ka rilru ang i pu tlat mai. I ziak tha ka ti khawp mai, ka thlawp che.

    ReplyDelete
  3. I ngaihtuahna a thra e,.. kristian thlirna tarmit hi vuah thei hram zel ila.. awmzia a awm berin ka hria..

    ReplyDelete
  4. Responsibility leh Chice hi chu a hrang daih a, sawi pawlh awl tak ani tih erawh chu a hrechhiangtu berte zing ami i nih ka ring.

    Pathian ENGKIMTITHEI, CHATUANMI thiltih leh hnathawh dan hi kan hriat-chian phak rual ani lo anih hi maw!

    I Ngaihdan tlang taka i ziak thin hi i fakawm ka ti tak zet. Kan ram rawngbawltu zingah hetiang hi kan mamawh. Ani awm e, tia tawp mai mai sakhaw hruaitu zingah pawh kan ngah ta lutuk!

    ReplyDelete
  5. CHOICE tih tur ani e**

    ReplyDelete
  6. ka'n ziah belh deuh a, a thupui pawh tlemin ka her rem deuh a, min lo hrethiam ru..

    ReplyDelete
  7. I sawifiah tha ka ti hle mai! I ziak chhiar a nuam! He thil hi thu har tak, sawifiah thiam har tak niin ka hria!

    ReplyDelete
  8. keipawhin a har ka ti.. ka hrethiam, mahse ka ziakchhuak thiam thlawt lo, ka inbuatsaih ve nasa lutuk, mahse ka ziakchhuak hleitheilo. A tawp atawpah chuan ka remkhawm ve ta a, a sawi a sawi zawng phei chuan ka thiam hlawl lo a ni.

    ReplyDelete

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Premier League vs Inkhawm

Thenkhat tan chuan Zu leh damdawite, sum leh nula te hi an chaklohna a ni. Kei erawh chu Football hi Pathian ka biak min tibuaitu a ni thin.  Kohhran Inkhawm pawimawh Inrinni zan leh Pathian ni zanah hian English Premier League khelh a ni thin. Mizoramah pawh kan buaipui a, kan atchilh a, inkhawm a awm lai chiah chiah hian inkhel hmuhnawm a awm thin bawk si a.

Football atchilh