Skip to main content

We are the champions


2004 September thla a ni. Mizoram University hnuaia College te intihsiakna lian Inter College chu kan tan ta. Hrangbana College-a B.Com 2nd Year ka nih lai a ni a, a hma kum khan Hrangbana College kha overall ah champion mah ila, Football-ah runners up kan nih avang khan kan la na em em kha a ni a. Tun kum chu a pumpuiah kan champion ang a, Football-ah pawh kan champion bawk ang kan ti. 

Kan game hmasa berah Aizawl North College kan tum, hemi tum hi ka inkhelh tawh azawngah chuan hrehawm ka tih ber tum a ni. 3-1 a hma kan hruai kha minute 70 hnu lamah min rawn draw ve ta mai.
Kan last defender Johnathana nen kan communication a that loh avangin ho deuhin vawi hnih goal ka chhuah, kan in hau hrep a, a ni chuan kei min mawhpuh a, kei chuan ani chu ka mawhpuh bawk. Hmai sen tawn tawnin field chhungah chuan kan inhau a, thian ten min rawn khap dai thei hram a ni. Hun a tawp zui ta mai, Penalty shootout hmanga chak zawk zawn a ngai ta, Penalty pet tur chuan kan inbuatsaih ta.

Hrangbana College hi Football thiam college tih thin kha a ni, mahse tunah chuan first game-ah tla thei dinhmunah kan ding ta tlat mai. Kan inbuatsaihnate kha ka ngaihtuah let leh a, kan thawk rim a, kan hah, tin, champion pawh kan phu bawk. Mahse hei vannei leh vanduai inkarah chuan kan ding ta reng mai. Kan chakloh chuan Mizoram College lian ber kha college te tak Aizawl North College lakah a tlawm dawn tihna a ni si a. Football player te  chauh pawh ni lo, Hrangbana College pumpui tan mualphona nasa tak a ni dawn chiang. Chutih lai chuan a mawhphur tu ber chu keimah ka ni dawn ta bawk.

Ka rilru a hah em em, ka zam em em bawk. Chutih laitak chuan kan defender pakhat chuan "Penalty -ah chuan Dinsanga hian veng zawk rawh se", a rawn ti khanglang bawk nen. Ka zam ngawih ngawih a, ka thin a rimin ka zak em em bawk.

Ka luhlul ka chhuah a, ka tawngchhuak ve ta ... "Mi ring rawh u, kan chak ang. Ka save vek ang", ka ti ta a. Penalty chu kan pet tan ta, kan pet hmasa zawk a. Kan pet goal lo nghal pang. Ka ven a hun ta, goal-ah chuan ka ding vang vanga, an striker, a hma pawha goal hnih ngawt rawn thuntu ngei kha a rawn pen chhuak a. Ka zirlaipui inkhel en te chuan min rawn au vak vak a, save rawh aw..tiin. Ka dinglamah a rawn pet a, ka risk fuh em avang chuan ka beng per a, ka save chu a ni ta. tichuan kan pet leh a, kan pet goal a...  Vawi hnih ka save a, pakhatin goal ban a pet per bawk a. Tichuan kan tumpuite chu penalty-ah  goal thun miah lovin an tlawm a, hnehna kan chang ta. Ka hlim kher mai.

SEMI FINAL 
Kan khel chho ta zel a, kan vannei a, kan chak chho ta zel bawk a. Semifinal chu kan thleng ta. Pachhunga University college nen kan inkhel dawn ta. Pachhunga College nen hian tournament tan hmain friendly match kan lo khel tawh. Nasa takin buaina a chhuak a, inkhel chhunzawm theiloin kan game chu  tih tawp a ni a. Inter college-ah kan in tawng leh dawn nia an rawn ti a, keini chuan..ee.... kan intawng leh dawn khawp..lo chak ve char char rawh u..kan ti ve a, kan tin ta kha a ni a. Tichuan Semi final-ah kan intum dawn ta chiah chiah bawk nen, ahmaa boruak lo awm bawk nen. Lammualah chuan college dang dang students, kan boruak lo hre ve a inkhel en tum chu an lo tam em em a. An ni mai an ni lo, buaina a chhuah tak thuta thelhdai tur Police pawh chu field sirah chuan an awm thup bawk. 

Kan inkhel tan ta, game-ah kan hneh em em a, harsa lote chuan goal 3 chu kan thun ta mai a. Kan hneh mah mah avang khan boruak duhawmlo engmah a thlen kha kan beisei tawh lo. Mahse hun a tawp tep tihin, through ball an rawn inpe a, mahse a lum chak a vangin kei khan awlsam tak khan tluchungin ka lo man mai a. Mahse an striker sam buk tak khan ka hrawkah min rawn pet lui hram, a na ka ti em em, ka thin a rim em em bawk. ka tho a, chupa chu ka tham a, ka rek ta nawk nawk a. mahse kut kan inthlak tak tak hmain midang an rawn tlan khawm a, kan buai ta luih luih mai a. Mahse kan la chak zawk avang khan kan captain Puipuia  chuan min rawn thelh dai thei ta hram a. Yellow card min pe ta ve ve a. Tichuan 3-0 chuan hnehna kan chang a, kan hlim em em, final chauh kan hmabak ta. Game pakhat zawkah Aizawl college chuan Zirtiri College chu an lo hneh ve chiah bawk a. A hma kuma Final-a kan hnehloh te nen bawk chuan Final kan khel leh dawn ta.

FINAL FRIDAY
Friday a ni. Final kan khelh ni tur chu a ni. Chhun dar 1:00 PM-ah Lammualah Aizawl College , Inter College Football Defending champion nen Final kan khel dawn. Kan phur em em a, kan huphurh em em bawk. Huphurhawm an ni chiang a lawm, an player han en reng reng pawhin ... Aldrin, Vannunmawia, Zaia, Lalhmuchhuaka, Subroto Cup-ah pawh lo kal an awm nual bawk. Tin, Tun thlenga 1st div Team tha la ni reng, FC Kulikawn a khel kha an awm nuk bawk a. Huphur viau mah ila, John-a, Lal pa-a, Hmahruaia leh Dinsangate kan nei ve tho a, kan zam bik chuang lo.

College-ah chuan dar 11:00-ah kan kim a, Game khelh dan tur kan sawi khawm a, Common room-ah chuan kan dingkual a, kan inkai theuh a, Pathian hnenah chuan chakna kan dil a, kan inhlan a. Kan tawngtai rual zawh chuan Lalpa tawngtaina kan sawi rual a, Final khel tur chuan Lammual lam chu kan pan phei ta.

Lammual kan va thlen phei nak chuan 'Mizoram chhunga College zirlai zawng zawng chu an lo pungkhawm a ni maw'...tih mai tur chuan Lammual chu College color hrang hrang chuan a lo khat a. Kan College chu hlawm khatin hmun khatah an lo thu khawm a, an tlim hmur maia, chutih laiin Aizawl College pawh College lian tak an nih a vangin an lo tam em em bawk a. Kan inkhel en chak vang hrim hrima pung khawm kha tam mahse hemi ni hi result puan   leh lawmman sem ni a nih avang pawh chuan tam tak chu an rawn fuan khawm ve bawk a. Pachhunga College leh Zirtiri College te chuan 3rd place an lo khel mek a , zirlaite chu an lo in au tawn vak vak bawk nen. A boruak chu pui tak a ni. 

Dressing room-ah chuan kan lut khawm a, muang fan raih chuan kan insiam a, khatiag khawpa tamah khan final khelh kha chu duhthusam a ni, chuvang chuan inkhelh kan chak tawh takzet zet a ni. Kan insiam zawh chuan AR Cinema Hall bul Basketball Court lamah chuan Warm up la tur chuan kan phei ta dam dam a. Kan College thutna lam a ni bawk a, a nuam kher mai. Kan hming hrelo kha an awm talo emaw  tih mai tur khan min lo au luai luai bawk a, College aiawh nih kha a lo ropui thlawt a ni. Warm up kan lak lai pawh chuan min rawn au vak vak hlawm a, nia... min hria ang chu, kan college tan thi leh thau pawlhin kan tang a, kan zawng zawng kan chhuah a ni tih kan lantir thin avang khan. Aw... kan college kha kan va lo hmangaih thin tak em !!! Miin lo sawi chhe ta se, insual peih at khan kan tan thin kha  ni a. College Life kha a lo nuam a ni.

Inter College-a Football level hi a sang a, hei vang hian students nikherlo pawhin an en nual bawk thin. Tin, MFA hnuaia football club hrang hrangte pawh player tha zawngin an lo chhim ve hlawm thin bawk. Tun thleng hian College level football hi chu ka la ngaisang a, hmuhnawm pawh ka la ti. Ka theih chuan final hi chu  ka la en deuh ziah.

FINAL
Inkhelh tan a ni dawn ta. Pavilion thlang lamah chuan Aizawl College player te nen chuan chhuah mai inring chuan kan awmkhawm a, Kan lo inkhelh pui thinte an nih avangin kan innel hlawm hle a, tha taka khelturin kan in wish tawn a. Referee te chuan players checking an rawn nei diat diat a. "Kan zotlang ram nuam", hla chu ring takin an rawn play ta, chutah Aizawl College player te nen chuan field lai lam chu kan pan phei ta a. Field chhung kan lut chiah mai chu College Students Lalmmual khat tlat chu ring takin an au hluah hluah a, a zamawm hle mai. Kan inchibai kual zawh hnu chuan game chu kan tan ta a.

Beisei ang ngeiin game pawh chu a tang nghal et awt khawp mai. Kan innawr tawn zak zak a, Aizawl college ball khawih a nalh zawk mahin a lang. Kei nin Forward tha tak Lalhmingsanga kan nei a, throuhball kan vawrh deuh chhen, Aizawl College defender ten ven  harsa an ti  khawp. An midfielder Zaitea te experiance an lo neih that tawh em avangin game boruak sangah an buailo, an rawn nawr na ve khawp mai, an forward Lalhmuchhuka  lian lemlo nain ball a thiam a, hmun rem leh remlo a thliar hrang  lo, vawi hnih lai chu goal post a rawn pet per. A bak chu First half-ah hlauhawm a awm hran lo, midfield-ah kan inbei nasa.

Half time ah chuan kan thiam dan tawk tawkin kan han infuih tawn a. Tichuan Second half chu kan tan leh ta. Player te kan inbuk tawk tawn ve ve a, clear chance a awm hleithei lo. kan tan em avangin ball pawh a ken rei theih loh a, kan inchhuh zung zung a, a entu ni ta ila hmuhnawm ka tih ve khawp chu ka ring ka thiante inkhel kha. Thil danglam em em a thleng lo, kan inhnehtawk em em a, thil mak a thlengte a nih ngawt tawh loh chuan goal thun chu theihloh a ni, kan defender te an that rual in an ni pawh kan sutlang thei bik lo a ni. Referee-in a hamrik chu a ham ri tuar a, hun a tawp ta. Tunah chuan Penalty shootout hmanga chakzawk zawn a ngai dawn ta. Ka chak rual rualin, ka va han huphurh tak em.  Kha tih laia ka zam zia kha coach khan hria selang chuan " Football khel ve tlak i ni lo", min ti ngei ang.

Centre ah chuan kan thu kual a, tunge pet hmasa dawn tiin kan inrawn khawm a. Tupawh kha an zam a ni tih an hmelah khan a lang thei. An maimitchhing a, Pathian an au a ni tih a hriat ngawih ngawih. Chak loh kha thih hrehin kan hreh a ni. Coin toss-ah kan chak a, goal ven hmasak chu ka thlang ta a. 

Goal ban bulah chuan ka va phei a, ka lu leh goal ban chu ka chuktuah a, Pathian hnenah a awmpuina ka dil a. Kan pet tan ta. Min bum chiang thei hle, A nilo lamah ka dive zuk zuk a. Pali ve veinkan pet tawh, ala goal vek, kan la inhneh tawk. Pakhat ve ve chiah pettur an awm ta. Hei hi ka save a, kan lamin an pet goal chuan kan champion a ni mai dawn. Mahse an rawn pet goal a, kan pet goal ve si loh chuan kum zawin runners up kan ni dawn tihna a ni. Ka zam em em a, Pathian ka ko mawlh mawlh bawk. Chutah Vannunmawia (Republic Veng) chu a rawn pen chhuak, Ani hi Higher Secondary School Games  leh a hma kum final-a a penalty pet ka lo dan sak tawh a ni. Ka thaw huai, mahse vawi thum a zawna ka vena pet goal loh chu a duh dawn lo tih a hmelah chuan a hriat ngawih ngawih. A pet ta a, chhak lamapangah ka thlawk chho, ball a rawn kal fu lutuk, ka kut dinglam chuan ka dang ta hlauh mai. Lammual chu a ri ta hum hum a, Entu zawng zawng kha kan pawlte an nita a nianga tih theih khawpin an thawm chu a ring a ni. Kan lam atangin Johnathana a rawn chhuak. A pet goal chuan kan chak dawn, ka en ngam lo. Hamrik a ri, a pet ta, chhaklam sirah chuan net puar pawpin a pet ta. Kan champion chu a ni ta....

WE ARE THE CHAMPIONS
Hrangbana College zirlaite field chhungah an rawn tlan lut. Keini pawh chu enge thleng tih pawh ngaituah lo chuan kan tlankual ve ta vak vak mai a. Thiante leh zirlai puite chuan min rawn pawm a, an te chel chul a. Keini pawh chuan player kan ni e tih pawh ngaihtuah chang tawh lo chuan Hrangbana College Flag a pawl ngei chu kan keng a, kan tlankual pui ta fua fua a. Football hi nunrawng thin viau mahse Champion nawm zia hi eng level-ah pawh hian a nuam a, thu mai chuan ka sawichhuak thiam lo a ni e. Kan college-a inngaihlo em em, kum khat chhunga vawi 5 ngawt insualte pawh kha, thian dun ang mai hian an rawn inkuah a, an zuang vak vak a. Lawmman semna chuan a zuita a, Cup kan han chawi a, Queen hla "We are the Champions", an rawn play zet kha zawng, a va han nuam tak em. 
Lammuala function chu kan zawh hnuin College BUS chuan Aizawl khawpui chu kan fang ta a, BUS pali vel kan inzui a, kan zai a, kan lam a, a va nuamin a va han hlu tak em. Sumin khang hun kha leilet leh theih dawn chu nise ka inseng ngam ang tih ka hria. Kum ruk lai a liam hnu hian khang ka khelhpui, ka thiante kha khawiah nge an awm tak angle ? Unau ang maiin kan in en a, kan inkawm ngaih em em a, kan thu a rual a. Pakhat pawh miin lo tina se, kan vai khan kan tangrual vek thin. Mifel lo tak tak kan ni hlawm, mahse khati taka Pathian kan mamawh leh kan koh nasat chhanna chu kan hmuta kha a ni a. Khami tuma champion team-a telte kha chuan Pathian hi a lo awm tak tak a ni tih kan hrechiang a ni. 

Comments

  1. Avan ngaihnawm ve aw! Tournament liantham ah hian ka telve zeuh zeuh , tunhma chuan. I dinhmun tur pawh khi ka hriatthiampui khawp mai che. I ziak ngaihnawm thiam e.

    Penalty hi chu ngaiah ka neih hleithei lo.

    ReplyDelete
  2. Penalty hi chu keipawh ka thin hi a phu rang ziah..lolzzz tak tak

    ReplyDelete
  3. Digi, i ziak thiam ka van ti em! i naupan hmel teh reng nen! Thuziak hi chhunzawm zel ang che! Inkhel thiam bawk, thuziah thiam bawk! thumbs up to you!

    ReplyDelete
  4. thanks @maisek...... U Chami chuan ka hau ngai reng renglo , a ti che..hehe

    ReplyDelete

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Pathian hi a awm tak tak em?

Damdawi inah damlo kan awmpui a, ka thianpa nen chuan verandah-ah chhuakin hrisel hlutziate kan sawi dun a. Chutia kan titi mawlh mawlh lai chuan ka thianpa chuan, "A nih leh, Pathian awmpuina hi i tawng tak tak tawh em? Nangmahah Pathianin a awmpui ngei che tih hriatna engemaw thil tawn i nei tawh em?" tiin min zawt thut.

Ka nu hi tawngtai mi a ni a, awlsam takin kei chuan, "Aw tawng tawh e, ka nuin ka dam loh chang hian min tawngtai sak thin a, ka dam thin," tiin ka chhang. A ngawi vang vang a, "A nih leh damdawi a eitir thin tho che em?" Tiin min zawt leh, kei chuan min eitir thin thuin ka chhang. Chutah ka thianpa chuan, "Nachhawkna khan a chhawk lawk lo che a, tichuan i nuin a tawngtai che a, a tawngtai zawh rual chein nachhawkna chuan a chhawk ta thin che a nih chu," min ti a.

A nih duh hmel hi ka ti ta khawp mai a, a dang ka ngaihtuah leh a, "Lungleia ka kal dawnin car ka khalh a, tawngtaina hmunah keimahin ka tawngtai. Chutih lai c…