Skip to main content

Sunday School


Nikum Krismas hma deuh khan ka thian hlui pakhat nen hian kan in hmu hlawl a, tet te atanga ka kawm, mahse a nungchang a uluk loh vangin lehkha pawh zir mumal ta lova, a theuleu ta mai mai a ni ber. Kan inhmuh khat em avang chuan enge kan chanchin leh kan tawn te kan inhrilh dun ta mawlh mawlh a.

Kum hnih kalta a apianthar thute min hrilh a, khata thil pakhat a sawi ka la hriat reng chu, ti hian a sawi a, "Nangnite chu invannei alawm, sunday school-ah naupan tet atangin in kal chho a, in nunah harsatna chi hrang hrang in tawh pawhin in naupan lai leh sunday school-a in Pathian thu zir leh by heart-te khan in nunah thu a rawn sawi a. In hla sak thin te khan lungngaihna nasa tak kara in awm lai pawhin a pawl thin che u a, ka tetlaia sunday school ka lo kal tha lo kha pawi ka ti thin lutuk".


A chanchin sawi chhunzawm a," Tikhan kan khawsa ve ta mawp mawp a, khawvel lamah engang pawn tlan mah ila, a tawp atawpah chuan Pathian bak hi belh tur a awm lo tih ka hria. Chumi hunah tak chuan a nia, Sunday School ka lo kal thin loh avang khan harsatna nasa tak ka tawk ta a. Ka lungngai a, ka rilru a hah, ka kawng zawh kha adiklo a ni tih ka hria, Pathian lam hnaih ka duh, mahse ka thinlungah hian Pathian hla engemawtal ri tur hi a awm lo, a chhan chu Pathian hla ka hriat chhun chu 'Zingah savate',, tih chauh kha a ni si a. Camp-ah te nasa takin Pathian ka zawng ta a, tichuan a tawpah chuan ka hmu ta hram. Mahse tun thleng hian ka naupan laia Sunday school ka lo kal ngailo kha ka la inchhir a ni. Hun harsa tak tak a lo thlen hian min pawlna tur thu leh hla a awm lo thin lutuk a"..tiin..

Ka ngaihtuah let leh a, ka thiana sawi hi a dik ka ti khawp mai. Hun harsa tak tak tupawhin kan hmachhawn tawh vek, kan la hmachhawn zel dawn bawk, chungah chuan kan Pathianthu zir leh thiamte, hla kan sak thinte kha a lo tangkhai thlawt a ni tih ka hre chho ta mawlh mawlh mai. Inkhawmpuinaah pakhatna nih tumin theih tawkin changte kan zir, kan inkhawmpui zawhah kan theihnghilh leh mai. Mahse kan theihnghilh emaw kan tih kha kan lo theihnghilh awzawng lo mai. "Ani chu tuiluang kianga thunphun, a huntea rah thin..." tih chang te hian ka nun hi a kaihruai nasa thin khawp mai.

Khang kan thuvawng zawng zawngte kha tunah han sawi teh.. in ti thut ila, kan sawi mai thei lovang..Amaherawh chu a hunteah, kan mamawh hunah Pathian chuan keimahni min pawl nan a lo hmang thin zawk a lo ni a, Sunday School hi a lo tha thlawt a ni.

Comments

  1. Adik. Mizorama Sande Sikul kan nei hi chu atha thlawt!!

    ReplyDelete
  2. Mangan laia min hnemtu tur Bible chang tamtak kan lo by heart te hi malsawmna alo va ni em.

    ReplyDelete

Post a Comment

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.