Skip to main content

Mi huaisente tan chauh


Kan thianpa guitar instructor thusawi pakhat ka la hre reng, "Tv-ah te leh tape-ah te zai mawi deuh deuh leh band tha tak tak te, guitar perh thiam tak takte kan thilrin kan ngaithla thin. Anni anga lara, thiam nih chu an chak, chuvang chuan guitar lesson admission ka hawn apiang hian tam tak an rawn inziak lut thin. An han zir ta tak tak a, an rin aiin tuichilh a lo ngai thin a, thiam tak ni tur chuan nasa taka beih ve a ngai a, chu chu an peih ta thin lova, a tawp thleng zir chu mi tlemte chauh an ni ta thin a ni", a ti.

Thi tur kan ni a, chhandam kan nih loh chuan hremhmuna tla tur kan ni tih kan hria, camping-ah te kan lut a, thu tha tak tak kan ngaithla a, tichuan emotion a san laiin Lal Isua hnung zui turin kan inpe ve ta ringawt thin. A tha lutuk, pianthar hi a tha thlawt, mahse engatinge rei kan daih leh thin loh ?


Lal Isua neitute chan tur nawmzia kan hriat chian em em lai hian Lal Isua zui hi thil awmsam a ni lo tih hi kan theihnghilh thin. Lal Isua chu kan lal leh chhandamtuah kan pawm a, kan han zui ve tan ta a, mahse “Tupawhin mi zui a duh chuan nitin a KROSS puin mi zui rawh se,”(Lk 9:23) tih te, "Mi tupawh neih zawng zawng kalsan vek lo apiang chu ka zirtir an ni thei lo vang", (Luka 14:33) tih te kan han tawng chho ta a, rin aiin Lal Isua zui chu a lo hautak daih mai, rin ang a ni lo tawp mai. Tichuan zui tluan peih ta lo chuan kan chawlhsan ta thin a ni.

Chhandam fate chan tur a ropui zia kan hriat leh Lal Isua neih thlamuan thlak zia kan hriat rual hian Lal Isua hnung zui hi tih namai a nih loh zia hi kan hriat chian  angai. Thil tam tak kalsan tur a awm a, i duh zawng leh ngaihnat zawng tam tak thlauhthlak a ngai a sin. Lal Isua hnung zui hi thil hahthlak a ni a, mihuaisente chauh lo chuan an zui tluan ngai lo. Emotion san laia zui ve ringawt tur a ni lo, fim takin ngaihtuah la, i i kalsan tur zawng zawng pawh ngaihtuah lawk rawh, hrehawm tam tak lo thleng thei pawh dawn lawk la, chutah  i zui ngam a nih chuan Lal Isua zuitu mihuaisente huangah i rawn tel ve thei ang. Mi dawizepte tan hmun a awm lo, Lal  Isua hnung zui hi mi huaisen te tan chauh a ni. 

Comments

  1. Thlarau thianghlim chan a san lai chuan engkim kan huam thin. A rei tial tial a, tuipui sen kan laia hlimna ang kha a awm reng thei si lova, kan ro tawlh tawlh a, kan chau va, intihharh kan tum si loh chuan kan tlu leh nge nge thin. Lal Isua zuina kawng hi a nuam reng lova, a hlimawm reng thin lo; a kawng bumboh lai te, a khawharthlak lai te, lungngaih lai te, thinrim em em lai hun te thlengin, thlah miah lova zui tang tang a ngai thin. Lal Isua zui tur chuan mahni inphatsan hial pawh a ngai thin. Ka tlin lo thin khawp mai, kei ve hi chuan.

    ReplyDelete
  2. Ivan la kawi kual fel thliam thluam thiam vele. :)

    ReplyDelete
  3. A tha khawp mai. Tehkhin thu deuh roh nena i ziah thin avangin i thuziak hi a fiah bik ka ti. Pathian thu chhiar peih lo tan pawh chhiar a nuam. A tawi fel si, sermon tawi tha tak a ni e.

    ReplyDelete

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Premier League vs Inkhawm

Thenkhat tan chuan Zu leh damdawite, sum leh nula te hi an chaklohna a ni. Kei erawh chu Football hi Pathian ka biak min tibuaitu a ni thin.  Kohhran Inkhawm pawimawh Inrinni zan leh Pathian ni zanah hian English Premier League khelh a ni thin. Mizoramah pawh kan buaipui a, kan atchilh a, inkhawm a awm lai chiah chiah hian inkhel hmuhnawm a awm thin bawk si a.

Football atchilh