Skip to main content

Hmanlai chuan


Kan kudam ka hai ka hai a, Green Bag (Burma Green Bag) Middle school vela kan ah thin kha ka hai chhuak nawlh a, ka lung a ti leng kher mai. Metallica tih te a la chuang kulh mai a, hman lai min ngaihtuah chhuah tir a, nichin lawka thil thleng ang mai khan ka mitthlaah a rawn lang zut zut mai. Hun hi a va lo kalchak tak em, nimin mai kha emaw ka ti a, mahse kum a lo vei ve nual ta, kan naupan laia kan khawsak dan leh khatih laia kan uar deuh deuh te kha tunah chuan engah mah an ngai tawh dawn si lova, thil hi a lo danglam chak hle mai.

Kungfu Shoe :
"Huah.... a chung dum a hnuai var...". Kan ute khan an bun nasa thin khawp mai, ka awt ve thin lutuk, ka nu leh pa te chuan min lei ve ta a, ka intithei kher mai. Mahse a chhuat nal khawp mai, kan tawlhthlu ngun bawk. Mualah kan kal kawm a, kan ute zinga pakhat hian kunfu min zirtir thin a, kan ti ve nasa thei khawp mai. In Capstan kan ti mai a, Ciggarette bawm ruak hian kil 4 neiin kan siam a, chu chu kan invawmchhuah siak thin, chungah chuan Kungfu Shoe khan a hnawl chhuak hnem thei hle.


Tawlhpahrit :
Kan kawmchhakah hian field mual phul nuam tawk a cham thla put a. Chutah chuan tawlhpahritin kan tawlh thin, a va nuam thin tak em.Thing tlawn chu kan sat tleu a, a tlawhchhan leh a thutna kan siam a, a hnuai chu mombati leh khawnvartui kan hnawih a, kan tawlh ta thin a nia, a chak thei khawp mai. Mahse a thutna kan kilhna perek kha a lo lawr theih thin avangin kan kekawr mawng hi a thler nasa thin, nu leh paten min hau nasa thei khawp mai.

Chi thak :
Primary School kan kal lai a ni a, chithak kha a va lar thin tak em. Chithak mai bakah chithak tui kha bottle in kan pai a, kan intithei thin kher mai. A induh ve kha chu kan kid te vek an ni tawh mai a, a chang leh kan in um tir a, kan inum tir zawhah tlemte kan in tir/liah tir ve a, an lawm ve thei lutuk.

Inrallem chan :
"Mala threng.... ".... "Ka Pil hman"... Ka pil hman kan tih kha chuan tih ngaihna a awm lo, kan pil hman a ni mai. Kan han inveh nasa thei laileng khawp mai a, vawi khat phei chu nileng thakin sikul tlanbovin kan inrallemchan mawle, a hrat thlak kher ka ti leh hnuhnawh. Tunlaia computer games-a Counter Strike an khela nuam an tih ai mah hian nuam kan ti tlat.

Gari khalh :
A then chuan motor engine chhiate an nei a, keini chuan motor tire chhia hi a sir kan zai kual a, zang tein kan zai thla a, chu chu kan vaw lir a, veng chhung hi kan hel chhuak ve ngat ngat peih nia mawle. Need for Speed kan hrelo reng reng, chuti chung chuan kan tlan chak ve em em thin a, kan intlansiak vel thin bawk, a nuam ka ti thin thlawt.

Glycerine:
Thlasik a lo ni a, kan chhuak lo thei bawk si lo, kan hnap tahna kan kawrban chu a dum khak tluk mai a, in kan han haw a, kan nuten minhan bual a, kan va han chat khir thei tak em. A bik takin kephah chung hi a chat dum tluk thin a, kan nute hian min han nawh sak a, chutah kan inbual zawh chuan glycerine ngei chu min han chulh ta mai thin a nih chu !! A thip thak sup sup thin.

Chite :
Kan veng atanga lui kan hnaih ber chu Chite lui kha a ni a, hei vang hian kan nunah chite lui kha a bet tel ve tlat a, kan la naupan zual deuh lai kha chuan Zothanate veng mawng Loliam luiah khan tui kan cheng thin a, kurungah te khan kan cheng ve nasa thei khawp mai. Chite leh tamchhawl hian inzawmna an nei tlat a, nuam kan ti thei lutuk kha thil ei nachang hre miah lovin kan tei a, a tawpah chaun kan tamchhawl leh nge nge thin. Chhungte phallo chung chung pawh khan kan va han kal ngun thin tak em !!!

A sei dawn lutuk,.. duhtawk phawt ang, in naupanlai chanchin rawn sawi ve teh u, kan uar em em thin thil te khan lung a ti leng thin thlawt. Sawi tur thing deuh deuh pawh ka la nei teuh a nia, nangni pawhin in nei vek ang, thing tak tak, nuihzatthlak tak tak te...  naupan lai i nei ve a nih chuan han ngaihtuah let la, han sawi ve tak tak teh.

Comments

  1. ka naupan lai chuan Mizo kawm tur kan nei ve ngai lova, vai naupang, kan school luhpui te ho kha ka thian an ni mai a, hlim em ema kan inkawm lai te khan an chhungten 'lehkha zir a hun'an tia, an rawn ko hawng daih thin a, kan unau hian kan inkawm nasa thin khawp mai! khang hun kha hmanlai an chang zo ta! Lung a leng khawp mai!

    ReplyDelete
  2. Ka van khawngaih che... in rallem chan vel pawh in ti ve ngailo a ni maw :(

    ReplyDelete

Post a Comment

Popular posts from this blog

Mi hi hmusit ngawt thei kan ni em?

Vawi khat chu lehkha pawimawh pein in pakhatah ka lut a, pa ber chuan an fapa naupang zawk chu a la hau mek. "I nu leh pain hna kan thawk ve ve, i duh duhna hmunah pawh i zir thei, sang tak zir turin kan duh che a, i mamawh chu kan pe vek chein kan hria, mahse hei enge i rawn zirchhuah hi? Degree pawh nei lovin hei nileng lengin game i khel a, i u hi chuan kan thu a awih a, tunah chuan dortor niin hlawh tam tak a nei tawh a nih hi, nang ve chu," a lo ti mawlh mawlh a. Lehkha ka pek zawh chuan ka chhuak lehnghal vat a.

Chumi tuk chu inrinni a ni a, chhungte in sa ka pui a, chhunah thingpui in chawlh kan hmang. Hnathawk ho nen chuan kan inrual tlang, kan thu hova, kan titi malh malh a. Labour hna chu a hahthlak thu leh security tha ve deuha thawh an chak thu an sawi liam liam. Pakhat chuan, "Pawl 12 thleng lehkha ka zir, Accountancy te leh Company Accounts te kha chu a thiam ber ka ni thin kan class-ah kha chuan. Company Secretary te kha zir zawm ka tum ve nasa, migratio…

Football manager leh player te inkungkaihna

Football manager-te hi club chhungah chuan an thu thin hle a, game an khelh dan tur zawng zawng an ruahman thin bakah club thenkhatah chuan player transfer chungchangah pawh thuneihna an nei thin bawk. Club thenkhatah chuan manager te hian nipui bazara player an duhzawng an sawi a, chung player te chu club hotuten lak tumin theihtawp an chhuah thin.

Football manager hna chungchang hi ram a hrang angin tihdan pawh a hrang ve deuh thin a. England-ah chuan manager te hi club enkawlna kawnga a fung pawimawh tak chelhtu an nih thin laiin ram dangah erawh manager ni lovin football coach pangngai angin an inchhawr mai a, team an practice pui a, game khelh dan tur an ruahman leh a, football game chungchangah chauh an thu a ni deuh mai.

England-ah chuan football manager te hi an thu thin khawp a, team management zawng zawng an buaipui bawk a, player zingah hmasawn lo leh an thawhpui theih lohte chu an thehchhuak hmiah hmiah thei bawk. Player te pawhin team-a tel ve ziah an duh a nih chuan man…

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…