Skip to main content

Posts

Showing posts from July, 2011

Trojan Horse (setana free gift)

2004 kuma film chhuak Troy kha kan en vek tawh awm e, David Benioff-a ziak niin Wolfgang Petersen'n a direct a nih kha. Trojan War hmuhnawm tak kan hmu a. Brad Pitt kha Achilles niin Myrmidons hruaitu ber kha a ni a,  Orlando Bloom/Paris khan Sparta lal fanu Helen kha ngaizawngin an han ru chhuak a, Troy khuaah an hawn a, kha vang khan indona nasa rapthlak a rawn thleng ta a nih kha. 
Trojan Horse
An han indo a, Trojans lam khan kulh an neih that em avang khan Spartan tan khan luh a harsa, chuvang chuan an tlawm titih ta a nih kha. Mahse fin phakar chhuahin  an hawng der a, Trojan Horse kha an hnutchhiah a, Priam, Troy lalpa khan ngaihhruihna thilpek emaw a ti, chutih laiin Paris erawh kha chuan hal darh vek turin a ti a. Mahse apa chuan Troy khuah chuan a lalut ta tho thova, Chu Trojan Horse chhungah chuan Achilles te chu an lo tawm a, zanah an inrin loh laiin an run ta thut a nih kha, tichuan Sparta chuan Troy chu rapthlak takin a hal darh ta a !!

Relin min tlansan

Kan khaw mual lehlamah chuan rel horn chu a rawn ri ruai ruai mai a, chutia a ri kan hriat velah chuan khaw mipuite chu hmanhmawh em em chuan an insiam ta nghal sup sup mai a. Kei pawh chu thiante leh chhungte an insiam tak sup sup avang chuan ka thuamhnaw neih ang ang chu ka bag-ah chuan ka vawm lut ve ta mawl mawlh a, chutia kan insiam sup sup lai chuan, "khawi a kal tur nge kan nih ? Engatinge kan khaw mipui zawng zawng chu kan insiam tak sup sup?", tih chu ka rilruah a rawn lang ta thut mai a.
Ka nu hnenah chuan "Ka nu, rel te chu tuk tin zan tin a rawn kal ziah a, tinge vawiin hi kan vaia khaw mipui ho kan insiam tak sup sup le ? Khawnge kan pem dawn a?", tiin ka zawt a. Ka nu chuan "I hnena ka sawi thin kha, khaw nuam deuh panin engtikah emaw chuan kan la kal dawn.. ka tih kha, hei min hruaitutur rel chu a rawn kal mek ta alawm", tiin min chhang a. Ni dawn tak maw, a va han nuam dawn tak em !! tiin phur tak chuan ka insiam chhunzawm ta a.