Skip to main content

Hun leh Pathian (Fiction) !!!

Zingah ni a chhuak a, tlaiah a tla leh a, zanah kan mu a, zingah kan tho leh a. chutiang chuan a kual a kual a, kan taksa DNA chu  lo thangin nausen atanga tar thlengin tisa chuan khawvelah hun a hmang a, tichuan a lo chawl ta a. Hetih chhung hian hun engemawzat a liam hman a, darkar, ni leh thla leh kumte chu HUN chu a lo ni ta a. Mi thenkhat chuan hun hi engvak a lo ni lo, thil awm tak tak pawh a ni lo, khawvel hi a vir a vir a, tichuan kan lo thanglian ve mai a ni e.. ti tein an sawi thin. Mahse hun hi lungtum angin khawihin hmu theilo mah ila thil awm ngei chu a ni si.

LALPA ngaih chuan  kum sangkhat pawh hi ni khat ang  ??

2 Petera 3:8 ah chuan ,"Lalpa ngaih chuan ni khat hi kum sangkhat ang a ni a, kum sangkhat pawh hi ni khat ang a ni", tih kan hmu. Helai thu hi kan chhiar kan chhiar tawh thin, keipawhin ka lo chhiar liam puat puat tawh. "Nia Pathiante chu engkimtithei a ni a, atan chuan hun hian awmzia a neilo alawm", tiin ka ngaihtuah thin. Mahse Theory of relativity / Time dilation atang hian thil ni thei a lo ni dawn khawp mai .


Time Dilation

A awlsam zawngin sawi ila,  Einstein-a'n a hmuchhuak a nih kha. Thil a chet reng rengin, kha thil che-a hun kha a (Slow down) .. tih a ni mai a. Enge a awm chhan leh avang tih vel kha sawi kual lo mai ila. Awlsam takin a Proof theih lehnghal, sana pahnih chu minute leh second in ang chiahin herh la, pakhat chu dawhkanah dah la, pakhat zawk erawh chu hruiin thlung la, minute 15 vel vai vir rawh. Tichuan han en mil leh ta la, i vaivir sana zawk chu dawhkana i dah ai khan minute khat velin a lo tlai tawh zawk ang.


Entirna dang pe leh ta ila. A lema kan hmuh ang hian.. 50 Km/hr in Truck a tlan a, Truck chungah chuan baseball vawm tupa leh a lo vawtu tur an awm a, ball thlawhchak zawng lo teh tu khawl LIDAR Speed Gun pahnih dah a ni a. Pakhat chu Truck -ah chuan dah a ni a, pakhat erawh chu kawngah che miahlo turin dah a ni. Tichuan ball chu Truck tlan lam zawngin vawm a ni a, LIDAR Speed Gun No.1 chuan 100 km/hr in a lo teh ta a. Hetih lai hian leia dah zawk chuan ball thlawh chak zawng chu 150 km/hr in a lo teh ta daih a. hei hi a chhan chu Truck tlanchak zawng (50 Km/hr + 100 km/hr = 150 km/hr) vang a ni.

Kawnga che miahlova dah kha chuan ball kha chak takin a thlawk a ni tiin a teh laiin, Truck tlan laia dah zawk atang erawh chuan ball chu a thlawk muang fe zawk tih a lang thei. Heta tang hian thil che apiangah hun a muang a ni tih kan hre thei awm e.

Engtia chakin nge Lei (Earth) hi a thlawh tehreng ?

Kan khawvel hi chhak leh thlang zawngin 1674.4 km/h a chakin a vir a, Lei hian ni a helna kawngah hian 67000 miles/hr in a thlawk hem hem bawk. Kan awmna Solar System hi Galaxy ah hian 220 km/s a chakin a thlawk kual bawk a. Tin, kan Galaxy pawh hi Van thengrengah 300 km/s vela chakin a thlawk hem hem bawk a. Chutiang khawp chuan kan lo thlawk chak chu a lo ni a.

LALPA ngaih chuan ni khat hi kum sangkhat chu a lo ni chiang dawn e.

Chutiang em ema chak chuan khawvel, Solar system leh galaxy te chu an thlawk a. Chuvang chuan Time Dilation kan tih chu nasa takin a lo awm ta a. Tichuan Pathian chu che sawn lovin a awm hmunah nikhat lek pawh awm ta se. Che miah lova nikhat lek pawh kha che nasa em em khawvela mihringte tan chuan kum sangkhat lai a ni hman dawn tho tho a ni.  Hetiang em a chaka kan thlawh avangte hian  zahngaihna hun  kan neih phah maite pawh a ni ve bawk.

Lalpa ngaih chuan ni khat hi kum sangkhat ang a ni ?

Bible chang ka rawn lak chhuah sentense hmasa zawk hi han en leh dawn ta ila.Lalpa ngaih chuan ni khat hi kum sangkhat ang a ni tih chu Time Dlation theory atang bawk khan a hriat theih awm e. Eng (Light) kalchak zawng hi 299792.458 km/s a ni a, inchhungah darthlalang (Looking Mirror) 30 chuang in em tawn thei turin dah la. Zan thimah chuan Torch light chu han hmet eng ta la. i hmeh rualin eng chu darthlalang 30 ah chuan a lang kim nghal ang. A awmzia chu Tun (Present)-ah eng particles chu hmun tinah a awm hman  tihna a nih chu.

Pathian chu ni(Sun) ai pawha eng a nih chuan hmun tinah a awm hman dawn tihna a ni a, chutiang khawpa a chet chak chuan Amahah Time Dilation chu a awm ve thei tlat. chuti anih chuan a hmaa kan sawi letzawng chiah khan, kan tan nikhat nimahse A tan chuan kum sangkhat a ni ve thei tlat a ni.

RORELNA a rualin ??

Kan sawi chho ta sa sa, a inzul thei dawn bawk a, sawi chhunzawm zel mai ang aw.. Thih hnu piahlam ram hi a dam lai hi chuan kan hre lo ve thlawt a, kan inrin siak mai mai zawng a ni e. chuvang chuan rinthu sawi te chu thiangah ngai mai ila. Roman Catholic chuan mitthi thlarau te chu vanram leh hremhmun an kal hmain purgatory-ah kal hmasa phawt turin an ring a. Thenkhat chuan vanram leh hremhmuna kal nghal turin an ring. Thenkhat leh erawh chuan rorelna hmachhawn rual vek turin an ngai bawk.

Han rin dan tur em em ka nei lem lo, mahse mitthi tho leh Pu Rinkima sawi kha a nih duh hmel ka ti ta mai mai. A ni kha chuan mitthi zawng zawng, hma khawsang a mi leh, tun a mi leh nakina la thi turte khan rorelna an hmachhawn rual a ni a ti zawngin a sawi a. Chu chuan ka rindan a kaihruai thui khawp mai.

A chunga kan sawi zawh tak ang khian, chak taka thlawk khawvela khawsa kan ni a, tichuan kan Universe ah chuan hunin awmzia a nei ta a, khawvel siam tirh atangin kum 4000 (Bible kum) vel chu khawvelin hun a hmang tihna a ni ta a. Hetih lai hian Pathian ram chu che ve miah lovin lo ding ta char char se emaw, 3 Dimensional Universe khawih buai theih lohvin lo awm ta se emaw.. Chuti a nih chuan Pathian ram atang chuan ni khat lek pawh kha khawvel kum 4000 dawn lai a lo ni thei dawn ta a.

Kan thih hun kha kum sang danah pawh ni mahse nikhatah kan thleng rual vek thei dawn tho tihna a ni ta a. Entirnan : Kum zabi khatnaa thite  kha zing dar 10 leh 11 inkarah thleng ta se, kum zabi hnihnaa thite zawng zawng kha dar 11 leh 12 inkarah thleng khawm ta bawk se.. chutiang zelin. He ti a nih chuan ni khatah pawh kum 4000 BC-a thite leh 2011 AD-a thi te chuan Pathian rorelna a rualin kan hmachhawn thei dawn reng a lo ni.

Chutiang chuan nikhat thil thuah kan thleng khawm ruih ruih anga, khawvel atanga ngaihtuah chuan kum sang chuang kar dana thi te pawh kha nikhat lek chhungin kan in hmukhawm vek dawn ta a nih chu. Fiah kakin ka sawi thiam lova, a hahthlak ka ti khawp mai, ka sawi ngai pawh ka lo sawi nual maithei a ni. Min lo hrethiam mai dawn nia.

A tawp nan

Ka rindan ve mai mai a ni a, 'a ni e, nilove'... tuman kan ti thei chuang lova, a zia phian. Tichuan ka sawi tel zauh duh chu.. Science leh Pathian thu hi ui leh kel thlunpawlh anga ngai hi kan tamin ka hria. Hei hi tha ka ti lova, hetiang ngaihdan kan neih chhan ber nia ka hriat chu, Pathian awm ringlo Scientist ten Bible paihthlak an tum thin vang mai niin ka hria. A nihna takah chuan Science thiamna a san pauh leh Pathian ropui zia puan chhuahin a awm zel dawn tihna a ni a, chuvang chuan kei chuan Science leh Pathian thu hi a kalkawp thei ka ti reng a ni.

 

Comments

  1. I van chhut thiam mai mai tak em! A dik emaw, dik lo emaw...Lalpa ropui ber rawh se....

    ReplyDelete
  2. kumsangkhat poh hi nikhat ang lek ani tih zawk ani lo maw???

    ReplyDelete
  3. Kan hriat chhun mah hi a ropui ania, kan hriat loh ropui tur zia phei hi chu a mak ngawt zawk ang le. Physics hian Pathian ropui zia a puang a, Biology in, Chemistry in History..etc..a ropui e, informative khawp mai

    ReplyDelete
  4. A va han pui rem rem tak e ooooooo.. ka star che :D

    ReplyDelete

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Premier League vs Inkhawm

Thenkhat tan chuan Zu leh damdawite, sum leh nula te hi an chaklohna a ni. Kei erawh chu Football hi Pathian ka biak min tibuaitu a ni thin.  Kohhran Inkhawm pawimawh Inrinni zan leh Pathian ni zanah hian English Premier League khelh a ni thin. Mizoramah pawh kan buaipui a, kan atchilh a, inkhawm a awm lai chiah chiah hian inkhel hmuhnawm a awm thin bawk si a.

Football atchilh