Skip to main content

Bible thuruk ngaihnawm


Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.

Khawvel siam hma chanchin thlir kual zuai ila.

Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami zawhah  khan Pathian leh setana inbeihna hi chu  la tawp mai lova, a intan dawn chauh zawk a ni.



Van angelte chu Pathian fak tur hrim hrima siam, Programed an ni a, an nin an fak khan Pathian ropuina a la famkim lo. Chutah rilru nei, chhia leh tha hriatna nei, mahni duh thua fak a, duh loh chuan sawi chhe bawng bawng thei thlarau hrang nei Mihring a siam ta a. Chutah chiah chuan Pathian ropuina chu tihfamkimin a lo awm ta a ni. Kan hriat tel mai mai tur chu mihring hi alo ropui thlawt a ni, thlarau hrang nei kan ni a, kan chhia leh tha hriatna hi Pathian leh setana pawhin min zahsak a, min ti lui ngai lo a ni.

Mihring sualah a tlu 

Kan hre theuhva, Eden huanah Evi leh Adama te khan Pathian duh loh zawng an ti a, Pathian leh mihring inkar chu a lo chat ta a nih kha. Engatinge Setana kha khalai hmunah khan a lo awm ve theih ? tih zawhna hi kei ngei pawhin ka zawt thin. Setana kha Van khawpui atanga paih chhuah anih hnu khan zalenna pek a ni a, kan universe ah hian a duh duhnaah a kal kual thei a ni. Khawvelah pawh khan a rawn kal ta ngei a, a tum ber chu Pathian rilru tihnat a ni. Chutah Pathian khan mihring a siam danah khan chhia leh tha hriatna, duh thlan theihna kha a dah kher kher bawk si a, kha vang khan setana pawh kha paih chhuak lovin, duhthlanna hmang mai turin Evi leh Adama kha a dah a ni.

Khawvel hi Setana Lalram a ni

Engtik lai atang chiah khan nge khawvel hi setana ta a ni tih sawi a har khawp mai. Van indoa chaklo zawka a tan khan, leia paih a nih thu kan hmu a, khata tang khan nge ? Evi leh Adama a tlem zawh a, Pathian leh mihring inkar chhutchah a nih atang zawk khan ?. Engpawh nise thuthlung hlui hun chhung kha chu khawvel hi setana lal ram  ani kan ti thei awm e. Isua pawh khan a pawm thlap tlap.

Johana 18:36 ah khan Pilata khan Isua kha Lal i ni em ? tiin a zawt a, Isua chuan chhangin," Ka ram chu he khawvela mi hi a ni lo; ka ram chu he khawvela mi hi ni sela, ka thuihruaiten an bei ang, Juda-te hnena peka ka awm loh nan; nimahsela ka ram zawng heta mi hi a ni lo," tiin.

Johana 12:31 ah khan, Khawvel kha ngaihtuah lai a nih thu leh, Korss lera a thih hnuah lal ram a lak kir leh tur thu a sawi. Luka 4:5-6 ah pawh, Setana khan Isua a tlem a, amah chibai buk tur leh a buk a nih chuan khawvel lal a nih theih tur thu a hrilh. Khami tum pawh khan Isua khan setana lal ram a ni tih a pawm. Heng bible chang hmun thum ka rawn tarlan atang ringawt pawh hian khawvel kha setana lal ram a ni tih kan hmu a ni. 

Mihring tlarau chu boral tur a ni

Mihring chuan Pathian thu an awih tak loh avang leh setana an zawm tak avang chuan hrem an ni dawn ta a, mihring chuan Pathian ram an lut thei dawn ta lo. Chuti a nih chuan rorelna a awm hunah an hotupa setana hovin chatuan meipuiah paih an ni dawn tihna a ni ta a. Pathian chuan khatia mihring a siam ta leh suala an tlu ta kha pawi a tiin, a inchhir ta em em a. Setana kut ata lak let leh kha a tihmakmawh a ni a, hetah hian hmangaihna vang a ni kan ti thin, a dik lutuk, mahse kei chuan a tih makmawh a ni ka ti ve tlat, a ta kan ni si a. Mihring chhanchhuak tur chuan vanah ro an rel ta mup mup mai ta a.

Mihring chhanchhuahna hna hautak

Thupuang 5:1-14 .. Sual neilo thisen a chhuah phawt loh chuan mihring chu chhanchhuah an nih loh tur thu lehkhabu thianghlima ziaka dah a lo ni tawh bawk si a, mihring chhanchhuak tur chuan Lal Isua chauh lo chu midang an awm ta lo. Van indona hial chawk chhuak thei khawpa thil ti thei setana khan nasa takin a lo tibuai dawn tih an hre lawk vek. Chuvang chuan ruahmanna fel tak an neita a, mihring thlarau chhanchhuak tur chuan van a inpeih ta.

Setana'n Messia a lo chang

Judate lehkhabu thianghlimah khawvel chhandam a nih tur thu ziak a awm nual, chuvang chuan setana pawhin mihringte chhanchhuahna tura ruahmanna a awm tih a hrethiam. Lal ram hrang hrang, Persia lal ram te, Assuria lal ram te, Babulon lal ramah te leh hmasang lal ram lian tak atangin Messia, nausen a a rawn piang tur chu a lo chang a, lal ina a piang anih ngah chuan tih hlum nghal a tum ran a. A tihlum thei a nih ngat chuan khawvelah hian chatuanin ro a rel anga, mihring thlarau zawng zawng deuhthaw chu a ta an ni dawn si a.

Engatinge ranin kher pian nan a rawn thlan ?

"Inngaitlawmin ran thleng a rawn bel a," te kan ti thin , a dik lutuk tho. Mahse a nihna takah chuan setana chan loh khanah Messia kha pian tirin a awm zawk a ni. Isaia ziakah (Isaia 9:6-7)  chuan ropui taka rawn kalin, hmelmate zawng zawng pawh hneh sak turin a inziak a. , Isaia, Jeremia, Deuteronomy, Hagaia, Hosea leh Pathian thu ziakna engemaw zatah chuan Chhandamtu lo pian tur thu tarlan a ni. Mahse a hun leh ni tur chu engmah a tarlang lo. Mahse Mika 5 : 2 ah chuan “Nimahsela, nang Bethlehem Ephratha, Juda rama sang tam tak zingah te hle mah la, I lak atang hian Israel-ho roreltu tur chu ka tan a lo chhuak ang”, tih a inziak a, kha vang khan Heroda lal in atang khan Setana khan Messia kha a lo chang tawp ringawt mai a nih kha.

Engatinge setana chu an hlauh em em ? Kan ti a ni maithei..Pathian chuan a hlau awkawng lo, Pathian chatuan thiltum chu tihhlawhtlin a ni tho tho dawn. Mahse setana hi thil tithei tak, van indona pawh chawk chhuak a, Pathian meuh pawh paih thlak tumkha a ni a, chuavang chuan mihring chhanchhuahna mission ah hian a hnawksak ve tawk dawn tih hriat lawk a nih avangin buaina tam tak pumpelh nan Isua kha thuhruk zawk a ni.

Setana a mangang (Mathaia 2:1-15)

Aries ah khian Jupiter a awm hian Rome ho chuan chhinchhiahna a ni tiin, lal thar a piang thin an ti. Khatih lai vel khan Aries huam chhungah khan Ni leh thla leh Jupiter te kha inhnaih tak takin an awm mai bakah khawchhak atanga khawthlang lam hawiin a chhuk thla a , kha arsi kha khawchhak mifing kan tihte khan an rawn zui a ni e an ti a. Mahse midang chuan kha arsi eng kha ni lovin, arsi danglam tak, chhinchhiahna, Messia piang tur chhinchhiahna bik liau liau arsi khatih lai khan khawchhak atangin khawthlang zawngin a kal thla an ti a. Engpawh nise, setana leh a hote pawhkhan arsi danglam tak kha an hmu ve chiang. Messia a rawn piang dawn a niang tiin a buai khawp mai. Mahse Heroda inah khan naute piang tur kha a awm si lova, setana a mangang khawp mai. Kan hriat mai mai tur chu, Heroda kha setana inlarna a ni.

Khawchhak mifingte hruai pen an ni

Chutia mangang em em a an awm lai chuan Khawchhak mifing ten Heroda lal ram an rawn rap tih an hriat mai bakah, Lal thar chibai buk turin an kal a ni tih an hria. Khatah khan mifingte khan anmahni remhriatna hmanga heroda in pan an nih ka ring chiah lo. Setana'n an rilruah hna a thawk a nih loh pawhin Heroda khan a mi leh sate chu khang mifing te a in kawhhmuh  turin a ti pawh a ni thei. Tichuan mifingte chuan Heroda lal in an lut ta a, heroda chuan "Kal ta ula, naute thu chu dilchhut takin zawt chhuak rawh u; tin, kei pawhin amah chu chibai ka rawn buk ve theih nan", tiin a chah anih kha.

Nausen kum 2 hnuailam suat a ni (Matthaia 2:16-18)

Mifingte kawng dangah an hawng leh ta daih si a, setana chu a mangang ta a, tichuan nausen mipa  kum 2 hnuailam tawh phawt chu a rawt chimit ta a nih kha. Ran ina a pian ringawt pawh khan nausen tam takin an thih phah a, lal ram dang inah emaw piang selang chuan indona rapthlak tak pawh a thleng thei a ni. Setana bumna ni pah fawmin Isua kha a biru thei ang berah pian tir a ni ta zawk.  Nausen khati zozai kha that mahse Chungnung bera Pathian ropui fapa a nih miau avangin Isua kha  thah a la inring chiah lo, tichuan Isua ni thei awm kha a zawng chhunzawm ta zel a.

Isuan a naupan laiin Power a nei lo

A naupan lai khan Isua kha a fing em em tih kan hria(Luka 2:39-52), mahse thiltihtheihna a hmang chhuak lo. Kha kha enge a chhan ? A chhan tak chu mihring pangai a ni a, Pathian a ni bawk a, a thiltihtheihna kha hmang ta selang chuan kum 16 velah celebrity a ni anga, mipuiin an zui nguah nguah anga, setana pawhin a rawn hre chhuak anga, a puitlin hmain Pathian chhanchhuahna Mission kha a tlawlh palh a hlauhawm tlat mai.  A puitlin hnua, a thih dawnah pawh khan (Luka 22:42) Gethsemane huanah "Kapa he no hian mi pel lul rawh se", tiin a tawngtai thlawt a nih kha. Khami tuma chhandam kan nih loh theuh ziah kha aw... A puitlin hnu pawh khan khati khawp khan a hreh chuan, a naupan laia setana tihbuai tura dah kha chu a chi loh khawp ang.

Baptistma a chan khan setana khan a rawn zuan leh chat

Kum 30 a tling chho ta a, rawngbawlna a tan dawn. Chutah Baptistu Johana hnehah Baptist a ni ta chiah a, khatah chiah khan setana khan a rawn zuan leh ta chat mai. Ni 40 leh zan 40 thlalerah chaw ngheiin a chhuak a, khatah khan vawi thum lai setana thlemin a awm a nih kha (Luka 4). Tichuan rawngbawl chhovin,kalvari lam, a thihna tur chu a pan chho ta a. 

Setana'n Kalvari kawng dal a tum dan langsar deuh deuh pathumte

1.  Setana khan a hman theih apiang a hmang ani ber mai. A zirtir rinawm Petera ngei pawh hmangin, Matthaia 16:21 atang khan chhiar ila, Isua khan a thih tur thu a sawi a, chutah petera rawn tawnchuakin, "Lalpa, Pathianin khawngaih che rawh se; chung chu i chungah a thleng tawp lovang," a tih khan Isua khan Petera chu chhang nghalin,"Setan, ka hnungah kal rawh; ka tan tlukna i ni e", tiin a hau a nih kha.

2. Pilata nupui kha fel tak niin kan ngai maithei, a dik reng. Mahse hei pawh hi setana hma lakna a ni. Matthaia 27:19 , Tin, rorelna thutphaha a thut laiin a nupuiin," Kha mi fel tak chungah khan engmah ti suh; vawiinah hian amah avangin mumangah thil tam tak ka tuar a ni," tiin a chah a nih kha. Kha vang pawh kha a ni mahna, Pilata khan Isua kha hum atum a, mahse Juda te khan Baraba kha chhuah zawk tura an tih tlat avangin kut a sil a, an duh duh dana tih atan a pe ta a nih kha.

3. Gethsemane huanah khan lungngai takin a awm a, a tawngtai a, atap bawk a. Khami tum khan nasa takin setana khan a tibuai a, Pathian mission  a tlawlh theih nan tan a lo la  ve. Isua  rilru kha hneh a tum. Luka 22:42 ,  "Ka pa, rem i tih chuan he no hi ka hnen ata la sawn rawh," tiin a tawngtai a nih kha. Khatia mangang em em leh thlan thi anga far khawpa a tawngtai lai khan van atangin Vantirhkoh pakhat tirh thlak hial a ni ta reng a.

Lei leh vana thuneihna zawng zawng Isua hnenah pek a ni ta

Harsa takin setana lal rama mihringte chhanchhuak turin a rawn chhukthla a, tichuan Pathian tirh ang ngeiin Kross lerah chuan a thisen a rawn chhuah a, chhanchhuahna chu a rawn siam ta a.  Khatia a mission a rawn tlintlak takah khan setana chu hlauvin a khur a, a lal ram chu chhuhsakin a awm dawn tih a hre chiang tawh. Tichuan Isua chu a thi a, phumin a awm a, thihna hnehin a rawn tho leh ta a. A thawhleh hnu chuan tihian a sawi a, Matthaia 28:18-20. "Lei leh vana thuneihna zawng zawng ka hnenah pek a ni tawh. Chutichuan, kal ula, hnam tina mi zirtirahte siam ula, Pa leh Fapa leh Thlarauthianghlim hmingah chuan baptist ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, in hnenah ka awm zel ang," a ti a.

Mihring thlarau chuha indona

Isuan khawvel a hneh hnu pawh hian setana chuan mihring thlarau chu  ala bum zel thova, chung ho chhandama an awm ve theih nan chuan keini ringtute hian tihtur tam tak kan nei ve reng a ni. Tichuan indona  chu a la tawp mai dawn lo, tunah hian setana leh Pathian chuan mihring thlarau chu nasa takin an la inchuh mek zel a, kan chhia leh tha hriatna te hman khawloh tir tumin setana'n min thlem reng a, chutih laiin Thlarauthianghlim chuan khawng dik zawh turin min zirtir ve reng bawk a. Indona karah ram inchuh kan ni a, chuvang chuan a tawpa hnehna chang zawk tur Pathian lamah i tang ang u, indona chu Lalpa idona a ni a, hnehna pawh Lalpa ta a ni.

Comments

  1. Thu thiamlo, sawi tuma lut mai lova pehhel sek i nilo tawp mai. Chhiar a manhla e.

    ReplyDelete

Post a Comment

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.