Skip to main content

Ka thian tha ber

Chu zan reh takah chuan ka kal thinna lui kam thing buk hnuaiah chuan ka thu kerh kerh a. Thla chu a eng nuam em em mai a, luitui che vel chuan thla eng chu a rawn en a, a tle suar bawk a. A boruak chu hahdamin a hmun chu nuam hle mahse chung hmun nuam leh lui luang ri her herte chuan zanina ka lungngaih zia leh rilru hah zia hi an hrethiam ve si lo. Hei hi a lo ni maw nun beidawnna ruam an tih chu tiin ka indawm kun ngawih ngawih a.


Heng ka chunga thil thleng zawng zawng hi ka thiam loh chu ni bawk mahse, ka thiante leh ka chhungte kha ka dem khawp mai. Pawisa lakluh dan ka hria a, thian ka ngah a, thian khawm pawh ka thiam khawp mai. Kei aiin ka thiante ka dah pawimawh a, an harsatnaah theih tawpin sum sengin ka chhawm dawl thin. Mahse hei tunah chuan ka lo tlachhe ta a, khang ka thiante khan min chhawm dawl chu sawi loh, diriam takin min kalsan zo ta chu a ni si a.



Ka hmangaih em em, a hming pawha ka koh phal loh Duati pawh khan engvangin nge min kalsan ? Ka ring ngai lo, tunah pawh hian ka la awih thei lo a ni. Ka hmangaih a, a ni pawhin min hmangaih, hun duhawm tak tak kan tawng dun a, harsatna leh buaina pawh, khang hun zawng zawgah te khan ka kiangah a ding tlat thin a, engmah ka neih loh lai pawh khan a ni ka kianga a awm chuan ka hlim em em thin. Mahse tunah  engatinge min kalsan tak ? A hmangaih ber hi engati nge mipa dang min pansan tak le. A na hi ka ti a ni.


Ka nu leh pate pawh ka dem khawp mai, kan unau zingah Black Sheep ka nihna bik ka hre lo. Kan unau hi inang khat vekin min en selang chuan hetiang hun hi ka tleng bik lovang. Duhsak bik neihna hmunah hian a hlim theih loh a ni e.


Mahse heng thil zawng zawng ka chunga a thlen a, min tuithlar tak hlawm nachhan hi chu keimah vang chu a ni pakhat bawk. Zu leh nulain ka nun ka chen a, mite tan chuan ka hnawk khawp ang. Ka nungchang ka uluk loh avangin sum lamah pawh ka tlachhe ta a ni, mahse ka thiante zawng zawngin heti taka min hawisan ta hi chu a mak ka la ti reng, na ka ti thlawt a ni.


Chutia thingbuk hnuaia ka phun mawlh mawlh lai chuan ka kiangah hian mi pakhat a rawn kal a, "I va mal ve mawle, zanin hi a mawi tiraw, i ril atam em, hei chhangthawp leh thei tui ka nei asin," a rawn ti a. Ka ril atam love, hei lui ka lo thlir mai mai a, tiin ka chhang a, a ni chuan,"Kha ei la," tiin min pe ta hram a, ka ril a tam tawngkhawng tawh avangin ka hnar phal ta thlawt lova, ka ei ta nghal bawrh bawrh mai a.


Chutia ka ei bawrh bawrh lai chuan a ti ti malh malh a, helai hmun nuam a tih thu te leh len vei vah nana a hman thin thute chu a sawi a. A bekin mi chhawn a, ka hriat hnu ang ka ti khawp mai a, mahse ka chiang thei mai lo. A rawn hawi chiang a, ka hmuh tawh hnu a ni tih ka hre thei. Amaherawh chu  tunge a nih ka hre thei tawh lo. Tunge a nih ka zawt ta phawng mai a.


"Kei chuan ka hrechiang che a,mahse nang erawh chuan min hre chiang kher lovang, amaherawh chu min hmu ve zauh zauh tawh ngei ang. College sport a Basketball-a in champion te, College Prom Night te, office a i thawh hnua i buai em em laia ka rawn dawr che te kha i la hria ang ka ring," a ti a. Chu veleh ka harh ta nghal uar mai.


Kan College Basketball-a ka champion pui tum khan min fuih tu ber a ni a, mahse kan champion ta chiah kha ka be zui tawh lo, tactic zawng zawng kha min hrilh kha a ni si a, kan superstar ta lutuk khan biak enah pawh ka en tawh lo kha a ni a. Tin, College Prom night-ah khan a rawn kal ve a, mahse kan college mi leh sa a nih loh avangin ka hnar haw a, hrehawm a ti teh a nih kha. Office a sum tam tham tak ziahbo ka tum mek laiin a rawn lut a, min rawn be buai, thinrim takin ka hnar haw ta kha a ni a. A lungawilohna a sawi chhuak ngei dawn a nih hi ka ti rauh rauhva.


Chutia ka ngawih reng lai chuan ," Ka ngaina che a, mi fel tak i ni a, i kianga awm ve hi ka chak em em thin a ni. Amaherawh chu i khawvel a nuam a, thian i nei hnem a, kawm ve che chak  em em mah ila keini michhe fa tan hi chuan kan kawm phak i ni lo alawm. Mahse , i chanchin ka lo hria a, i harsatna tawh zawng zawngte pawh ka lo hria alawm. Tin, hetah hian hun i hmang ngei ang tih ka ring tlat a, i hnenah ka rawn kal a nih hi," a ti ta mai a. Mak ka ti ti lutuk.


Thuk taka ka harsatna min hriatpuitu awmchhun a ni tih ka hre thiam ta nghal a, ka inveng zo tawh lo, ka thinlung chhung a tawt up up tawh avangin ka hrehawmna leh ka vuina chu ka hrilh ta nghal bawrh bawrh a. Lungngaihna leh harsatna hi tuma hnenah ka thlen ngai lo, mahni hian ka tuar chhuak mai thin, mi dang bulah hian ka inleih baw ngai lo. Amaherawh chu tun tum chu ka tlin ta ngang lo a ni, chutia ka sawi ta bawrh bawrh chu ka inthiamlo leh hnuhnawh a. Tin, tunge a nih, tunge a hming tih ka la hre lo tih ka ngaihtuah chhuak hlawl mai.


Inthlahrung tak chuan tunge a nih ka zawt ta a, a ni chuan,"Min hre em em ang. Hmanah i tleirawl chhuah hlimin i bialnu nen in intithiamlova, helai hmunah hian Valentines Day zanah tun ang hunah hian i lo thu kerh kerh a, i kiangah ka rawn kal a, kan ti ti a, hlim takin kan inkawm a, i bialnu chunga i thil tihsualah ngaihdam dil tur leh, chutia i tih chuan in inrem leh ngei tur thu te ka hrilh che a nih kha," tiin a sawi a. chutah chiah chuan tunge a nih ka hrechhuak ta hlawl mai.


Lal Isua Krista, ka tleirawl chhuah hlima ka thian atana ka sawm kha a lo ni a, ka kianga awm a duh em em laia ka lo hnar thin ngei kha a ni. Hrehawm ka ti a, a hmel en pawh kha hrehawm ka ti. Amaherawh chu chhungril takah hlimna leh lawmna ka nei. A chhan chu mi zawng zawng, ka thiante, chhungte leh ka hmangaih ten min hnuchhawn hnuah pawh ka kianga awm la duh tlat chu a ni chauh hi a ni a, hrehawm ka tih rualin ka hlim em em. Ngaihdam ka dil a, lawmthu ka hrilh bawk a. Ani aia thian tha leh rintlak hi lei leh vanah ka tawng tawh dawn lo tih ka hria, tichuan hlim takin a kiangah nun bul tan thar turin ka inbuatsaih ta a.

Comments

  1. A va ropui em. Lal Isua hi thian tha ber ani tih hi kan hrelo fo thin. Mihring te hian kan mamawh hunah chauh Pathian kan hnaih thin a, engtiklai pawha hnaih tur leh leng dun reng tur kan nih hi kan hrelo fo thin.

    ReplyDelete
  2. A tha hle mai. Lal Isua kan thian tha berin, kan mangan laiin min lawm... keini chuan kan lo vahbo san leh thin a, mahse Ani chuan min theihngilh ngai lo. Kan biak a ngaithla peih reng a, keimahni zawk hian kan be peih lo fo..

    ReplyDelete

Post a Comment

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.