Skip to main content

Kei leh Nikodema,




Kumin chu Sunday School-ah Junior Dept. zirtirtu ka ni a, nuam ka tiin kan zirlai hian min hneh thin khawp mai.  Naupang zirtur tawk vela zirlaibu siam a nih lai hian kei zirtirtu tan hian a lo tangkai ber emaw tih mai tur hian chapter tin mai chuan ka thinlung hi a khawih thin a.

November ni 11, 2012 hian Nikodema chanchin kan zir a, kan zir dan tlangpui chu, Isua hnenah zanlaia a kal a, a pianthar dante leh Isua a tan dan te, tin, Isua thih hnua hriak rimtui a chulh chungchangte a ni a. Naupang zirtir tur chuan ka inbuatsaih ve a. Hming kan lam zawh chuan pawl kan la ta a.

Naupang ho hnenah chuan heti hian ka ti a, "Hei Krismas a lo hnai leh tan ta a, mipa chuan upat hnu  thleng pawh hian Toys hi kan la lawm a, motor lemte, silai lemte leh car control theihte kan la lawm em em a. Helicopter control theih te chi hi Rs. 1500 man vel a ni a, a lian erawh chu Rs. 3000 vel a ni a. Tin, motor control theih chu Rs. 1000 vel atangin tha deuh deuh a awm tan a. In awt em ?", ka ti a, an ni chuan "Awt e", an ti a.


Tichuan heti hian ka zawt ta a," A nih leh tunah hian Scolarship lo la ta ula, Rs. 3000 chiah chiah lo la ta ula, in nu leh paten in thu thua hman lo phalsak ta che u sela, enge in lei ang ?" Ka ti a" An ni chuan, Motor lem, Helicopter lem, thuamhnaw, mobile phone leh ei tur te an ti.

Thil dang ka zawh chhunzawm leh nghal a," A nih leh  tunah hian Rs. 10 lo nei ta ula, a nawi ni se, Rs. 5 ve ve ni ta selang. Thawhlawmah engzat nge in thawh ang?", ka ti leh a, An ni chuan" Rs. 5" an rawn ti thup mai a.

Tichuan naupangte chu ka zirtirtan ta, kan zirlai thupui hrulah chuan heti hian ka sawi zau zel a. "Nikodema khan Isua kha a tan tlat a, Lal Isua tan khan a neih thil tam tak a pe chhuak a. Tuman Isua an tan loh lai pawhin Pharisai ho zingah pawh Isua kha a tan tlat a, Tin, Isua a thih hnu pawh khan hriak rimtui Mura leh Aloe Kg 34 laia ritin a chulh ta a. Hriak rimtui Kg 34 laia rit chu a to khawp a nia. Hetia kan ngaih ang ngawt hi a ni lo.

Mura leh Aloe chawhpawlh hi chi hrang hrang a awm a, mi pangai hman chi a awm a, mahse Lal Isua taksaa chulh erawh hi chu mi hausa leh Lal te taksaa chulh thin a ni a. Mura leh Aloe chawhpawlh Kg 34 zeta rit hi chu tunlai pawisa chuan, US Dollor 2,00,000 vel a ni a. India pawisa chuan  Rs 10,936,999.51 man vel a ni. A to rem rem khawp mai. Nikodema khan heng thil hi a neih chuangliam atangin Isua kha a pe miah lo, a neih atangin tam tak a insengso a ni."

"Dik tak chuan khatia mi zawng zawngin Isua an tihduhdaha, Isua zirtirte pawh vuak hlum hlawm ve law law an chak laia Isua ruang lo lakthlak leh duat taka lo sawngbawl kha chu a hlauhawm thlawt ang le. Chuti chung pawh chuan Nikodema leh Josefa te kha chuan Isua tan khan an nei thil hlu tha tha an pe ta a."

"Keini helaiah Pathian hnena thil pek zalen taka kan pek theihna, Lal Isua tana zalen taka thil kan tih theihnaah hian Isua tan hian cheng engzat nge kan pek phal ? Isua tan hian hun eng chen nge kan pek phal ?  Nichin khan ka zawt che u a, Cheng 10 atangin cheng 5 kha thawhlawmah thawh kha in phal tawk a, Rs. 3000 in neih chuan toys leh thuamhnaw leh ei tur atan in hmang vek dawn tihna a ni bawk a. "

"Lal Isua chuan a zawng zawng kan tan a rawn hlan a, kalvari tlangah a rawn thi a. Kei ni hian Lal Isua chu engtiang chiahin nge kan duhsakna leh kan hmangaihna kan lantir ve dawn le?", tiin ka zawt a.

Naupang ho chuan ngaihnawm an ti a, a hmaa ninhlei em em leh hauh reng ngai kha an ngawi thap mai a.  Tichuan sawi tha inti deuh chuan pawl chu ka la zo ta a.

Mahse inkhawm kan ban chuan he kan zirlai hian min umzui ta zel a, naupang tana sawi emaw ka lo intih kha ka tana sawi ka ni tih ka inhre chiang ta tawlh tawlh mai a. Kan zirlai chu ka keu nawn leh a, Nikodema hriak rimtui man zat chu ka chhut ka chhut a, thil phal hi ka ti tawlh tawlh mai a. 

Ka in en let a, Lal Isua tan hian sum engzat nge ka pek chhuah ve le ? Hun eng zatnge ka pek ve le ? Tih chu ka inzawt ta tluk tluk mai a. Chhunah office buai takin nileng hun kan hmang a, chau hnepin in kan thleng a, thu khawmuang hman lohvin chaw kan ei a, programme eng eng emaw neuh neuhvah kan chhuak a, committee neuh neuh a lo awm bawk nen. Zan tairek thlengin mahni duhzawng tiin kan meng a, mut dawnah minute 2 pawh tling manglo kan tawngtai a, tichuan kan chatthla chhunzawm nghal chu a ni thin a. Hetiang reng reng hian hun kan hmang chu a ni si a.

Lal Isua chuan keimahah hian pawisa chu sawi loh, kan hun pawh hi chan a nei mang lo tih ka hrechhuak ta a. Sunday School-a naupang zirtura kan ngaih kha keimah hian ka hlawk pui ber ta zawk a. Tichuan Pathian tan hun tam zawk pe turin ka inbuatsaih chho ta a.

Comments

  1. I ziak tha hle mai...Sermon ziah pawh ilo thiam hi han ziak zel teh.

    ReplyDelete

Post a Comment

Popular posts from this blog

Mi hi hmusit ngawt thei kan ni em?

Vawi khat chu lehkha pawimawh pein in pakhatah ka lut a, pa ber chuan an fapa naupang zawk chu a la hau mek. "I nu leh pain hna kan thawk ve ve, i duh duhna hmunah pawh i zir thei, sang tak zir turin kan duh che a, i mamawh chu kan pe vek chein kan hria, mahse hei enge i rawn zirchhuah hi? Degree pawh nei lovin hei nileng lengin game i khel a, i u hi chuan kan thu a awih a, tunah chuan dortor niin hlawh tam tak a nei tawh a nih hi, nang ve chu," a lo ti mawlh mawlh a. Lehkha ka pek zawh chuan ka chhuak lehnghal vat a.

Chumi tuk chu inrinni a ni a, chhungte in sa ka pui a, chhunah thingpui in chawlh kan hmang. Hnathawk ho nen chuan kan inrual tlang, kan thu hova, kan titi malh malh a. Labour hna chu a hahthlak thu leh security tha ve deuha thawh an chak thu an sawi liam liam. Pakhat chuan, "Pawl 12 thleng lehkha ka zir, Accountancy te leh Company Accounts te kha chu a thiam ber ka ni thin kan class-ah kha chuan. Company Secretary te kha zir zawm ka tum ve nasa, migratio…

Football manager leh player te inkungkaihna

Football manager-te hi club chhungah chuan an thu thin hle a, game an khelh dan tur zawng zawng an ruahman thin bakah club thenkhatah chuan player transfer chungchangah pawh thuneihna an nei thin bawk. Club thenkhatah chuan manager te hian nipui bazara player an duhzawng an sawi a, chung player te chu club hotuten lak tumin theihtawp an chhuah thin.

Football manager hna chungchang hi ram a hrang angin tihdan pawh a hrang ve deuh thin a. England-ah chuan manager te hi club enkawlna kawnga a fung pawimawh tak chelhtu an nih thin laiin ram dangah erawh manager ni lovin football coach pangngai angin an inchhawr mai a, team an practice pui a, game khelh dan tur an ruahman leh a, football game chungchangah chauh an thu a ni deuh mai.

England-ah chuan football manager te hi an thu thin khawp a, team management zawng zawng an buaipui bawk a, player zingah hmasawn lo leh an thawhpui theih lohte chu an thehchhuak hmiah hmiah thei bawk. Player te pawhin team-a tel ve ziah an duh a nih chuan man…

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…