Skip to main content

Zanriah tui leh ngaihnawm !


Min ngaihsan vanga chaw eia min sawm tih ka hriat chiah kha chuan min bawl emaw ka ti hial hman a. Zanriah tui tak min lo hlui a, kan puar em em.

Tin, Manchester United Football Club-a rei tak marketing lama thawk tawh a nih avangin kei Commerce lam zir ve ta chuan zawh duh ka ngah hle mai. Football chu ka ngaina alawm, mahse Football phena Football hlawhtlinna tak tak sumdawnna lian chanchin chu ka hriat chak ber zing ami a nih avangin Football game ai chuan chutiang lam chu ka zawt tan ta a.


Peter Kenyon Chief Executive a nih laia Far East lama sumdawnna an zauh dan te, 90's chhova British economy lo thang leh English Premier League rawn ropui chhoh dan te. Malcolm Glazer-a'n Manchester United a lei tirha an duh loh dan leh tuna sumdawnna lama nasa taka hma a sawn pui dan te, Malcolm Glazer-a debt chu tam hle mahse ngaimawh tham a nih loh dan te.

Old Trafford an khat thap thap, tunah 70,000 chuang thutna awm zauh an tum a, mi 20,000 tal an len leh theihna tur siam a nih chuan inkhel entu 90,000 chuang an len theih tur leh eng ang pawhin tun dinhmunah zauh nise Old Trafford a khah thap thap tur zia te min hrilh a. Amaherawh chu Old Trafford zauh an tum mekna lamah hian Manchester City fans thenkhat in leh lo a awm a, chung ho chuan khawvela pawisa awm zawng zawng pawh United hian pe dawn mahse an hralh phal loh thu thlengin. A va han ngaihnawm tak em.

New York Stock Exchange-a Share an list dan te, heng share an list atanga debt an vawm hlum mek dan te. Car siamtu Company Audi nen an thawh ho laia parking lot-a Audi car nei fans inkhel en tum an duhsak dan leh parking fee a free-a an siamsak dan te. Tickets leh Hospitality atanga 5-8 million pound lai Old Trafford match day khat chiah atang pawha an lakluh dante min hrilh zel a.

TV Rights atanga United hlawh zat leh Spanish league giants Real Madrid leh Barcelona ten La Liga TV Rights an monopolised dan thlengin min hrilh a. Manchester United chu champion lo mahse hun rei tak chhung an sumdawnna lian hian a vawrh zel theih tur thu te a sawi a,. khawvel puma an brand name lar avangin adidas pawhin Top 5 ah pawh an lan loh laiin thawhpuina liantham a rawn neih pui thu te thlengin. A ngaihnawm hle mai.

English club zingah Southampton tih lohva United chu player naupang chher chhuak tha thei ber an nih thu a sawi chiah chu, The Saints hming a lam tel avangin ka khi vur vur a. A ni reng a, tunah hian kan player tha tha Liverpool in min laksak mek zel a, rilru erawh a buai lem lo, naupang tha tak tak kan nei leh zel mai dawn alawm.

Chutia kan inkawm mawlh mawlh lai chuan BoihPuii Jahau chu MZU atanga a exam zo a rawn hawn mek thu an sawi a, an nau a ni tih ka hre ve chiah. Sir Hriata Jahau zanriah tui tak min lo hlui avangin ka lawm tak zet zet a ni.

Comments

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Pathian hi a awm tak tak em?

Damdawi inah damlo kan awmpui a, ka thianpa nen chuan verandah-ah chhuakin hrisel hlutziate kan sawi dun a. Chutia kan titi mawlh mawlh lai chuan ka thianpa chuan, "A nih leh, Pathian awmpuina hi i tawng tak tak tawh em? Nangmahah Pathianin a awmpui ngei che tih hriatna engemaw thil tawn i nei tawh em?" tiin min zawt thut.

Ka nu hi tawngtai mi a ni a, awlsam takin kei chuan, "Aw tawng tawh e, ka nuin ka dam loh chang hian min tawngtai sak thin a, ka dam thin," tiin ka chhang. A ngawi vang vang a, "A nih leh damdawi a eitir thin tho che em?" Tiin min zawt leh, kei chuan min eitir thin thuin ka chhang. Chutah ka thianpa chuan, "Nachhawkna khan a chhawk lawk lo che a, tichuan i nuin a tawngtai che a, a tawngtai zawh rual chein nachhawkna chuan a chhawk ta thin che a nih chu," min ti a.

A nih duh hmel hi ka ti ta khawp mai a, a dang ka ngaihtuah leh a, "Lungleia ka kal dawnin car ka khalh a, tawngtaina hmunah keimahin ka tawngtai. Chutih lai c…