Skip to main content

HOLY WAR (One Act Play)


A changtute

setana : Smart tak, coatsuit ha.
Officer : Hmeichhia smart taka inchei
Rock star : Mipa zaithiam, guitar ak.
Politician : Tlema Pa lian deuh.
Atheist : Hmeichhia Pathian awm ringlo, Social Networking lama tal nasa
Porn star : Pornography lama a changtunu.
Thuhriltu : Biak Ina thuhriltu
Film Director : Film siamtu
Pastor : John (Mipa hmel zahawm tak).
Pastor awmpui : Zuali (Hmeichhe zahawm tak).

Scene I

(Puanzar a  inhawng a, sual rawngbawltute chuan khunkhan takin ro an rel mek a, an hotupa ber setana chuan a hote hnenah an hnathawh dan chu a zawt dan dan a, hma lak dan tur an rel chhunzawm nghal bawk a).


setana : Ral ramah ka kal an ti a, an rilru zawng zawng ram thim lamah an pek laiin an bu pui kan zuan ta chut chu a ni a, hlawhtlinna nasa tak kan chan ngei ka ring tlat a ni, khai le, kan hma lak dan report han pe teh u khai, Kan officer atang hian tan ila, midang kan koh hmain hma lak zel dan tur kan sawi ho chhunzawm zel dawn nia.

Officer : (A rawn ding chhuak a). Aw lalber, hun tha tak min pek avangin ka lawm e. Ka rawngbawlna hi nuam ka ti kher mai. Office-a a thu ber nih hi chuan thil tih reng reng tih hi a awlsam zuih thin a, harsatna em em ka tawk lo.

Central atanga sum tam tak rawn kal hi lapse ngei turin hma ka la a, a lapse ta reng a, khang pawisa chuang kha ka hnuaia thawk kohhran upate nen kan han tlan tak tak mai thin a, nuam tak a ni. Sum lamah hi chuan an lo pan hlawm khawp mai, an tlu zung zung mai a ni. Hnathawk sang ber atanga hniam ber thlengin eirukna chance tha tak ka siam a, tu pawhin eiruk hi pawi tihna an nei lo. Man chhuah thei loh turin a ziah bo dan kan inzirtir zel a, ram ka la zau kher mai.

setana : A va han lawmawm tak em. Sawrkar Office lamah chuan kan kal dan ngai hi kei chuan tha ka la ti reng e, sual saa piang, awhna suala tlu zung zungte lakah hian hma lakna thar em em ngaihtuah thar ngaiin ka hre lo, kan kal dan ngai hi a tha e kan ti tlang em ? (Meeting-te chuan 'aw' an ti rual a).

A nih leh,  Kan Politician hi report pe turin ko ve leh nghal ila..

Politician : Aw lalber, hun tha tak min pek avangin ka lawm e. Tun hnaia ka hnathawh langsar ber pakhat chu zu zawrh theihna bill ka pass kha a ni.

setana : Lawkin.. engtin maw chutianga Bill tha lutuk i pass mai theih ? Han sawi fiah deuh teh. MPLT Act kha an kalpui reng turah ka lo ngai ringawta, chutianga change ropui tak i thlen thei chu a va makin a va ropui em !

Politician : Aw lalber, ka lawm e.  Nia.... He thil i thil hautak em em a ni a, Kohhran lam kan hneh lo tep a ni. Ka tactic tha ber chu hun rei tak ata tawh Mizoram sawrkar hrang hrangte sum hman dan tha ka hrilh duh lova, tichuan sum lamah an lo pachhe ta zel a, Central atanga sum a lo kalin, State sawrkarin a lo thawh ve tur takngial pawh an nei thei ta lo.

Zu atanga chhiah chu a itawm ta ngawih ngawih a, Mizoram State a kal zel theih nan  Zu zawrh chu tih makmawh a lo ni ta a ni. Ram dangah chuan law and enfrocement tha takin an kengkawh thei a, zu thlah zalen pawh nise harsatna em em an tawng lo. Mizoramah erawh MLTP Act takngial pawh an lekkawh theih loh laiin tuna Bill thar ka putluh tak phei hi chu hman a nih hunah phei chuan nasa takin dan kenkawh lamah hlawhchham turin hma ka la anga, Mizo thalai leh mipuite sualah ka hnuk lut zel ang.

Zu in hi mipat hmeichhiatna lamah an insum theilo bawk nen, natna hrik thalo HIV ka tun aia nasaa thehdarh a ni anga, zu avangin accident tam tak a rawn thleng chho nghal anga, Gehena-ah Mizo mipui tam tak ka rawn hruai lut ngei ang tih aw lalber ka tiam a che. Ka lawm e.

setana : Kut beng ang kut beng ang.  Hmasawnna ropui tak a ni e. Ka nghahhleh em em a ni a, hma lak harsa ka tih thin kha a ni bawk. Mahse hei tak hi a nia Politcian ni tura ka ruat chat che ni. I thawk tha e. Tun dinhmunah chuan hma lakna tur em em sawi theih a la ni lova, Bill hi dana an siam hun kan nghah lawk a ngai dawn a nih chu. Awle, topic dangah kan kal ang, kan cool tan riauin ka hria, kan Rock Star hi ko ve teh ang khai.

Rock Star : Aw lalber, hun tha tak min pek avangin ka lawm e. Ka hma lakna lian ber chu Pathian hla hup bova, Mizo thalaite zinga Western Music ngainat tir a ni a. VH1 te, MTV te leh Trace TV thlengin an hmu theih leh ngaihthlak theih turin ka chhawp chhuak a. Sap an ngaisang a, Pathian hlaah pawh Western Music an duh zel. Western Music Pathian hla hmuh tur vang pharh turin hma ka la chhunzawm ta nghal a.

Tichuan,  i hla hmang ten ka awmtlei a,  tun hma deuh kha chuan a ngial a nganin nangmah fakna hi ka sa thin a, Kristian ten nang hi an sawichhiat nasat em che avangin hralh a kal vak lo. Tunah erawh i hming lam kher lovin, mipat hmeichhiatna te, drugs chungchang te kan tarlang ta a,  mal ngawih ngawi leh khawvela awm pawh peih lohna hlathu thlengin, hei mahni an intihlum ta sup sup reng a nih hi. Saw tuna a chantuan hmun rawn pan mek pawh saw Emo leh Gothic lam music a ngaithla nasa a, a inawkhlum ta nge nge a nih kha.

Music hi a lo mak khawp mai, mi thinlung chhungril ber thlenga lut chhuak thei a nih avangin rawngbawlna pawimawh tak a ni a, sawi sen loh report tur la nei mah ila tun atan chuan duhtawk phawt ila, ka hnathawh chu nitin gehena rawn pan atangin in lo chhut tawh mai dawn nia. Ka lawm e.


setana : A lawmawm hle mai. Report ngaihnawm tak a ni. In lo fing hlawm hle mai. Theihnghilh loh tur chu, music video ah khan tharum thawhna lam te, a kung kung lamte kha uar sauh sauh ang che. A sexy lutuk avanga tihchhuah phal lohte ngat phei kha chu internet lamah an zawng nasa a nia, mipui hmuh atana him chin an dahchhuah aiin entu a nei tam ziah.

Awle, tunah chuan kan mi ril, theology lama kan hmatheh Atheist ko ila..

Atheist : Aw lalber, ka rawngbawlna report pe tura hun tha min pek avangin ka lawm e. Kei ka hmalakna lian ber hi chu Internet Social networking-ah a ni a, a bik takin thalaite hi mi fing tak tak an awm tawh. Inkhawm peih chiah lo, Bible zirtirna bak duh hi an tam tawh. Theology ngaihnawm tak tak ka tarchhuak thin. A tir chuan Kristian tha tak angin ka lang a, Bible-a an telh loh thleng thlengin ka hai chhuak a, ka hlui thin, Christianity nasa takin ka tibawrhbang nghal pang.

Group leh page te Facebook an tih ang chiah hian ka siam a, chhiartu ka ngah thin khawp mai. Thil reng reng hi science takin ka zirtir a, Pathian tam tak an awm tih thlenga ka sawi te ngat phei chu an Amen duak duak a ni ber mai. Chutah tak chuan Jehova hi rin lohna lian tak a lo awm chhova. Thenkhatah phei chuan aw lalber, nang hi mihringte hmangaihtu tak tak i nih zawk thute ka tarlang hial. Hei pawh hi pawmtu tam tak an awm.

Mahse a tawpah chuan heng zawng zawng hi kan suangtuahna mai, a tak tak awm lo leh finfiahna awmlo niin ka sawi a. Atheism-ah chuan Pathian awm an ringlo mai ni lovin, supernatural thil reng reng a awm an ring lo, Kristiante ang bawkin khawvel piahlamah nunna hran a awm an ring lo bawk. Mahse he atheism hi tlemin ka herkual deuh a. Khawvel piah lamah hian thil nung an awm ve a, chu chuan min rawn tlawh fova, chungte chu sakhaw nei ho hian Pathian angin an chhal mai a ni tiin ka sawi lut ta a. Chutah chuan Pathian awm ringlo tam tak an rawn chhuak ta a. An rawn inla fing ve ta khawp mai a, an thiante tam tak an ko hrang mek a ni.

setana : A lawmawm e, meeting pawimawh tak a ni a, amaherawh chu ka programme hi a tawt hle a, he kan meeting zawh hian vawiinah thlarua engzat nge hremhmun rawn lut tawh tih statistics enho turin ka inbuatsaih mek bawk si a. A reilo thei ber zelin report kan pe zel dawn nia. I thawk tha lutuk. Tunah pornography lama kan hmalakna report turin Mrs. XXX kan sawm ang.

Mrs XXX : Aw lalber, hun tha tak min pek avangin ka lawm e. Meeting ka rawn tlai teuh khawp mai, Movie pakhat kan shoot mek lai a ni a.  Ka rawn tlansan ta a ni. Kan rawngbawlna hi a chhuanawm khawp mai aw lalber. Khawvel pumah Porn Movie hi hralh a kal a, sumdawnna lian tak kan nei mek bawk a ni. Internet-ah nasa takin kan inzarpharh bawk a. Porn site chu tlawh hnem ber a ni ziah bawk.

Entu kan ngah zel theih nan project thar kan nei ve zel a, tleirawl tam tak hip kan tum mek.  Entertainment thenkhatah kan inrawlh ve zel a. Movie leh Music video-ah kan mi leh sate kan zep tel zel a. Tin, kan hmalakna hlawhtling tak pakhat chu Porn star-te mipuiin an ngaisang chho mek hi a ni.

Pathianin a duh loh em em mipat hmeichhiatna hman khawloh chu ram tinah kan tihlawhtling a, HIV darh theih nan hei hian nasa takin a pui zel bawk a ni. Report thui vak ka tum lo, kan hlawhtlin em avangin chu chiah chu ka rawn sawi ni mai rawh se. Ka lawm e.

setana : A va ropui tak em. Kan hmalaknaah theuh kan hlawhtling tlang a ni e. Producer ropui kha han sawm chhunzawm ila.

Producer :  Aw lalber, hun tha tak min pek avangin ka lawm e.  Kei ka rawngbawlna hi a zau deuh a, Film, gaming leh Music thlengin ka kawp a. Film lamah chuan kan thupui ber chu tharum thawhna lam lantir a ni a. Tun hnai hian Hollywood-a thian thenkhatin Pathian thu lam an rawn siam nual a, hei hian mipui a hruai kawi deuhva. Keini pawhin tan kan la nghal vat a, Bible kailek deuh hlekin kan siam ve ta kher zel a, thenkhat fuh tak tak a awm nual.

Sexy deuh hlek telh hram hi kan tum a ni a, hei hian nasa takin mipui a hruai khawlo thei tih kan hre chiang. Gaming lama chuan game developer tha tak tak an rawn chhuak a, tharum thawhna lam nasa takin kan vawrh a. Darkar thum aia tam nitin an khelh hi chuan danglamna anmahniah a awm vat thin. Mahni intihlum te, school-a thiante that ta chiam pawh an awm teuh tawh a nia. Ka hlawhtling hle.

Music lam kha chu kan Rock Star khan tam tak a sawi tawh a, sawi belh tawh lo mai ang. Ka lawm e.

setana : I thawk tha riap riap khawp mai. Kan hmun pui an rawn bei nual a, hetia hmun hla tak tak an rawn beih lai hian keini chuan an bupui kan bei thut a ni a, an chhungril a nget a, chuvang chuan ram thim an rawn tihah hian tha hlawk tak takin an rawn thawh thei rih dawn lo. Tuna chet kan lak dan hi a fuh thlawt a ni. Awle, kan tum ber kha kan chiang a, mihring thlarau a tam thei ang ber hremhmuna rawn hruai kha a ni tih i hre nawn leh ang u, meeting tih tawp a ni e.

(setana tih loh chuan an meeting-na hmun chu an chhuahsan ta hlawm a. setana chuan Thuhriltu a ko lut chhunzawm nghal a)

setana : Thuhriltu rawn lut tawh la, hei midang an chhuak vek tawh e. (Thuhriltu chu a rawn lut a).

Thuhriltu : Aw lalber, hman atangin ka zawt ang che ka ti thin a, ka la zawt lo che, engatinge midang ruala meeting-ah min tel tir ve ngai loh le ?

setana : I hrethiam lo a ni maw. Nang hi kan mi leh sa i ni tih midang hian hre lo se ka duh a ni. A chhan chu maw, i rawngbawlna kawngah anni hian an nel lutuk che anga, an tibuai palh ang che tih ka hlauva. Anni pawh hian Kristian ni tur char charah an ngai che a nia. Inhmachhawn chang pawh in neih fo reng kha. Ka tactic hi a fuh chho zel asin.

Thuhriltu : A nih tak chu a, ka chan hi a va lo sang ve aw. Ka lawm lutuk aw lalber.

setana : Chuti a nih chuan i rawngbawlnate chu kan sawi ve ta la.

Thuhriltu : Tunlaia ka campaign au hla hi thalaite chuan an va han duh tak em. Muk renrun leh thutak deuhva inkhawm hi thlarauna a ni bik hran lo. Pathian be tur chuan kan dress leh kan khawsak dan ai chuan kan rilru hi a pawimawh ber... ka ti thin.

Khawvel entertainment nasat tawh lutuk laia hetianga muk taka lo awm kha thalaite hian an peih lo, chulai tak chu ka man fuh avangin tih tak takna ata ka hruai peng mek a. Nuam an tih zawng leh tha an tih zawng zawnga Pathian biak theih a ni te ka ti a, hei zet hi chu an va han pawm tak em. An Pathian chuan taksa, thlarau leh rilru zawng zawnga tih takna a ngainat laia hetianga an khawsa chho ta hi Pathian lak atangin an hla hret hret a, nakin lawkah chuan khawvel hlimhlawp thil hian a la chim pil vat dawn a ni.

setana : I idea chu a va han tha tak em. Ka chhuang che a ni. Hremhmunah hian i vul, mi vul i ni e. Hetihlai hian lawmlohna deuh pakhat ka nei a, chu chu hei kohhranah dinhmun sang tak chelhin rawngbawltu i ni a, meeting hnuhnung bera kan sawi ang khan tinge zirtirna diklo hmanga kohhran member thenkhat i la hruaipen loh ?

Thuhriltu : Aw lalber, nia hei hi sawifiah ka duh a ni. Kohhran ngialnghet tak tak ho hi chu an member pawh an nghet a, chuvang chuan zirtirna diklo na takin an do let thin. Chung kohhran member hruai pen chu thil harsa tak a ni. Chuvang chuan tactic dang ka hmang ta a.

Chapona hi ka hmanraw tha ber pakhat a ni a, zirtirna diklo hmanga thlem ai chuan, anmahnia mihring rilru tak kha ka kaitho ta zawk a.  Kohhranah dinhmun tha chan an inchuh a, mite aia lansarh bik te an chak a. An rawngbawlna leh an thilpekte miten hria se tiin engtin emaw tak puanzar dan an ngaihtuah hlawm.

Thalai rawngbawlnaah pawh special item te an inchuh a, hruaitu thenkhat chu mihring takin thalai pawl ka hruai tir bawk. Khung Mizoram kohhran lian tak tak khu heta tang hi chuan sawi nghin zawh rual loh nia a lan laiin chhungrilah an nget mek asin. Anmahni leh an mahni an inei a, a tawpah chuan an chim rup mai ang.

setana : I va han fing tak em. Mi fing tak i ni e. Hma kan lak lehna tur langsar tak pakhat chu, ram thim lama an rawngbawlna leh evangelism lama an hmalakna chak tak khu kan chhut chah a ngai dawn a ni. Chutah chuan kan tactic pawimawh tak tur chu heng evangelism lam ai hian anmahni inthlun nghehna tur programme an buatsaih thin kha tun aia nasa in kalpui nise.  Sum tuak leh committee reng rengin hun hmang se. Buai takin siam la, Pathian rawng emaw an bawl an intih laiin anmahni rawng an bawl char char tihna a ni dawn a. Chu chu ka ngaipawimawh a nia aw. A lawmawm e, hna tha tak i thawk e. Duhtawk tawh phawt mai ang, Committee room number 666 lamah ka va phei ange.

(Tichuan committee room chu an chhuahsan ta a, puanzar a rawn inkhar a)

Scene II

(Puanzar a inhawng a, Pastor John-a zing tho chuan sitting room lam panin, thutthlenga thu chung chuan chanchinbu a chhiar a).

Pastor John : Nizan ka mang chu a va han mak tak e aw. setana leh a hote meeting ka hmu zankhua a, setana programme tawt lutuk te kha a nih duh hmel hle mai a (A nui suk a, an awmpuinu chuan thingpui a rawn pe a).

Zuali : Ka pu hei thingpui aw.

Pastor John : Ka thawh khalh thei lo che a ni. I fel hle mai. Hei ka tho zing viau emaw ka inti a, ka thawh rualin thingpui min rawn pe zat zat thei zel a. I pi hi khawnge ?

Zuali : Tawngtai inkhawm hma exer a la zuai a nih kha, ka nerve a thatloh ka hlau tiin tukin atang khan exer a la tan ta a nih kha. (Zuali chu a chhuak a).

Pastor John : (Chanchinbu a chhiar a, a keu kual vel a), A khaia .. an thlalak tarlan duh zawng chu a va ti kengkung ve aw.... Ngawiteh... A kengkung lam chi kha uar tur an tih kha mawle nizan ka mangah khan..  Nizan ka mang kha ngawiteh... mumang satliah a ni hauh lo mai.

Politics, Office hna, Internet, Movie, Music leh Kohhran thlengin setana hian ram a va la thui tawh tak em. Chanchintha kan hrilna kawngah hian khawi line pawh kan tihchak a ngai a ni. Ngaithah bik kan nei tur a ni lo. Pathian ringtute kan intuai hriam a va ngai tak em. Chanchintha hril hi rampawna chhuak Missionary te an pawimawh ang bawkin ram chhunga a Kohhranah nasa taka hma kan lak a ngai a ni.

Kohhran leh khawtlangah nasa taka Pathian thu kan puanzar a ngai. setana leh a hoten kan bu pui min rawn luhchilh mek, he indonaah hian hnehtu kan nih a ngai. Pathian ringtu talent nei tha tak tak engemaw zat ka mamawh dawn a ni. Bawiha nu chu nghak lo mai ang, tawngtai inkhawm tan hmain Pathian ka va dawr ange Biak Inah.

(Pastor John-a chu a chhuak a, Puanzar a inkhar a).

Scene III

(Puanzar a inhawng a, Pastor John-a chuan Pathian ringtu talent nei tha tak tak chu a hruaikhawm a, an ding tlar thap a).

Pastor John : Footballer, Theologian, Officer, Politician, Movie Producer, Computer Programer, Zaithiam, lam thiam, Thuhriltu tha, Unversity proffessor, ... talent hrang hrang nei in ni. Min beih dan tactics kan hre vek tawh. Kan tih tur kimchang takin ka sawi tawh bawk.

Tunah hian Indona thianghlim kan hmachhawn dawn. Hnungtawlh tur chu kir leh nghal rawh u. (A ngawi vang vang a). In kir dawn lo a nih chuan a tawp thleng rakin kan bei ang.  Kan hmelma ten ram zau tak an rawn lak tawh hi kan chhuh leh vek dawn. Indona thianghlim chu tan a ni ta. Indona chu Lalpa Indona a ni a, hnehna chu Lalpa ta a ni.

(Ring takin an au rual a, an chhuak ta a)

Note : He Short Drama hi 2014 kan Branch KTP intihsiakna atana ka buatsaih a ni e.




Comments

  1. A tha khawp mai, Drama hi chu chantualah hiana ropuina a lang ciang lhezual thin a ni

    ReplyDelete
  2. A tha hle mai, Sir.

    ReplyDelete
  3. Blog comment peih kan la awm hi a va lawmawm tak em... Mi zawng zawng facebook lamah an lut suau suau a.. hetih laia blog lama comment in la rawn pe hram hram hi hnuk te pawh inti ulh dawn alawm mawle :D Old is Gold an tih kha...

    ReplyDelete

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Premier League vs Inkhawm

Thenkhat tan chuan Zu leh damdawite, sum leh nula te hi an chaklohna a ni. Kei erawh chu Football hi Pathian ka biak min tibuaitu a ni thin.  Kohhran Inkhawm pawimawh Inrinni zan leh Pathian ni zanah hian English Premier League khelh a ni thin. Mizoramah pawh kan buaipui a, kan atchilh a, inkhawm a awm lai chiah chiah hian inkhel hmuhnawm a awm thin bawk si a.

Football atchilh