Skip to main content

Kan hmuh ve hman loh tur thil te


"Kan damchhung kumte chu kum sawmsarih a ni a, chakna avangin kum sawmriat pawh a ni thei e," tiin Sam 90:10-ah chuan a inziak. Chhum reilote a lo langa a ral leh mai ang hian kan damchhung nite hi a rei si lo, thil ropui tak tak hmuh hman loh tur kan nei nawk mai le.

Germany rama Time pyramid (German: Zeitpyramide) an tih khu 1993-a bul tan a ni a, lung pakhat kum sawm danah an hung zel anga, 2015 hian lung pathum an hung tawh a, lung 120 an rem kim hun ( Pyramid anga an rem kim hun) chu kum 3183 daih a ni dawn. Khawvel a la awm zelte a nih chuan kan tu chhuan 30-na vel ten an hmu phak dawn chauh a ni.


Ukraine rama Chernobyl Nuclear Power Plant Zone of Alienation an tih hmun khu kan la hre hlawm awm e, 1986-a chhiatna avang khan Nulcear zungzam mihring tana hlauhawm chuan Nuclear power plant atanga kilometre 30 huam chhung teh meuh mai a fan chhuak a, mihring tlawhpawh theih loh tura khuahkhirh nghal a ni.


Chumi hmuna nuclear zungzam mihring tana hlauhawm chu engtikah nge a reh ang ? Kum 70 hnuah ? Kum 100 hnuah ? Mihring tana luah tlaka a awm leh theih hun tur chu kum 22,000 hnuah daih a ni, kan hmu phak dawn lo chiang khawp mai.


Zanah thla eng mawi tak a rawn chhuak a, zingah ni eng mawi tak a rawn chhuak bawk a. Mahse khawvelah hian thla pahnih leh ni pahnih kan hmuh hun a la thleng dawn tlat mai le. Vanah hmuhnawm ropui tak a rawn lang dawn tihna a nih chu, hmuh ve a va chakawm dawn tak em. Khawvel atanga arsi eng ber kan hmuh theih Betelgeuse chu a la puak dawn.  Ligh year sang tam taka hla pawh nise zanah thla ang maiin a eng anga, chhunah pawh ni angin a eng bawk ang. Hmuh chakawm hle mahse; khawvelte a la awm zel a nih chuan 3.75 billion years hnuah chiah hmuh theih a ni dawn.


Thlasik laiin van lam kan thlir a, thlasik kawng a lo lang ruah thin. Hetiang thova mawi leh ropui hi khawvel a la awm zel a nih chuan galaxy dang a la rawn lang heu dawn. Kan galaxy aia a let hnih leh a chanvea lian Andromeda Galaxy chuan 300 km/s a chakin kan awmna Galaxy hi a rawn pan chur chur mai le. An la insu ngei dawn, an insut hmain vanah ennawm mak, ropui leh rapthlak bawk si a thleng dawn. Chumi hun chu dam thleng ila hmuh ve a chakawm khawp mai. Mahse hei erawh khawvelte a la awm zel a nih chuan 3.75 billion years hnuah chiah a thleng dawn, hei pawh hi kan hmu phak dawn lo chiang kher mai.


Thil ropui tak tak kan hmuh phak loh tur tam tak awm mahse vawiina kan hmuh ang hmu ve lo tur hi an tam ve tho asin. Thla (Moon) hian kan khawvel a hel a, kum tinin 1cm in kan khawvel hi a hlat zel, khawvel a la awm zel a ni chuan kum 600,000,000 hnuah chuan thla awmna a hla tawh lutuk dawn, niawklem vawiina kan hmuh ang hi chumi huna khawvela chengte an la awm a nih chuan an hmu tawh ngai lovang. Khawvel atanga thla a hlat avangin ni hliah tur khawp a ni tawh dawn loh avangin niawklem pum hlum ang kha khawvel miten an hmu tawh ngai dawn lo a ni.


Simeikhu kan hmu thin, simeikhu zinga lar ber pakhat chu Halley's Comet a ni. Kan hmuh ngun simeikhu zinga chhiar tel a ni, mahse damchhunga vawi hnih hmu hman chu mi vannei berte an ni ngei ang le. Kum 75 emaw 76 emaw danah khawvel atangin a hmuh theih chauh thin a. 1986 kum khan hmuh theihin a rawn inlar a, a rawn inlan leh hun tur chu 2061 daih a ni tawh.


Simeikhu ang chiah hian Football-ah pawh player thiam leh danglam bik hi khawvelah hian an rawn chhuak khat em em. Simeikhu hmasa zawk chu Kum 30 liamta khan a rawn lang tan a, fiah takin tunah kan hmu ta mek. Funchal, Madeira, Portugal-ah 1985 February ni 5 khan Cristiano Ronaldo dos Santos Aveiro an tih chuan khawvel eng a rawn hmu ve tan a, 2002-2003 kum khan Sporting Lisbon tan a khel, a thiam em avangin Manchester United chuan 2003 khan an la a, United tan kum 6 chhung a khel, Premier League title pathum, Champions League title pakhat leh FA Cup pakhat a la. 2009 khan Real Madrid a zawm ta a, La Liga title pakhat, Champions League title pakhat leh Copa del Rey title pahnih a lakpui leh tawh.


Mimal lawmman tam tak dawng tawhin chung zinga ropui ber chu FIFA Player of the Year lawmman a ni a, FIFA Player of the Year award tuna Ballon d'Or an tih tak vawii thum zet a dawng tawh. Record miin an lo siam sa a khum chho zel a, Champions League-a goal khung hnem ber record siamtu chu Raul (77) a ni thin, mahse Ronaldo hian tunah chuan goal 82 ngawt a khung ta a, Champions League-a goal khung hnem ber a ni mek. Real Madrid tana goal khung hnem ber chu Raul tia sawi thin kha a ni a, mahse Levante an hneh tum khan Ronaldo hian goal a khung leh ta a, Raul-a record goal 323 chu khumin, Real Madrid tana goal khung hnem ber chu Ronaldo a ni ta a, goal 324 a khung tling ta a ni.


Simeikhu hnuhnung zawk chuan 80s tawp lamah khawvel a rawn pan ve a, tunah fiah takin kan hmu mek, ani hi simeikhu hmasa zawk aiin a lang rei hret dawn. Khawvel chhim lam Rosario, Argentina-ah 1987 June ni 24 khan Lionel Andrés Messi chuan khawvel eng a rawn hmu ve a, a naupan lai atangin inkhelh a thiam em em, Newell's Old Boys atangin 2001 khan Barcelona Academy a zawm a, 2001-2004 chhung khan Barcelona-ah player naupang thiam zet sam sei bawk si a awm niin media te chuan an tarlang thin. 2004 atangin Barcelona senior team-ah a inlan ve tan ta.

Barcelona chu La Liga title 7 lai a lakpui bakah Champions League title 4 lai a lakpui a, Copa del Rey title 3 a la bawk. Mimal lawmman ropui tak tak a dawng, FIFA Ballon d'Or pali lai a dawng, hei hian player danglam bik a nih zia a lan tir chiang kher mai. Ronaldo a tha zawk, Messi a tha zawk tih lam sawi ka tum lo. Player ropui ve ve an ni, an khel a hmuhnawmin an thiam dun em em, an thiam dan erawh a danglam ve ve , khawvela guitar perh thiam ber thlan a harsat ang bawkin anni pahnih karah hian tha zawk sawi tur ka hre lo.

Maradona te kha mi chuan player danglam bik niin an ngai, a danglam reng alawm, a thiam teh meuh mai, mahse Lionel Messi leh Cristiano Ronaldo-te anga an khel hmuhnawm leh thiam hi chu khawvel awm chinah an vang pharh tawh dawn ! Thil ropui tak tak hmuh phak loh tur nei teuh mah ila Ronaldo leh Messi te khel kan hmuh phak avang hian tunlai chhuante hi chu lawm leh intithei hliah hliah tur kan lo ni asin. Kan tu leh fate hnenah,"Messi leh Ronaldo-te khel ka hmu ve phak asin," tih chu kan insawitheihna a la ni ngei dawn niin a lang. Khang thil ropui tak tak leh hmuh chakawm tak tak kan hmuh hman ve loh turte kha ka ngaihtuah chang chuan an uiawm ka ti thin, mahse khang kha hmu dawn lo mah ila  Ronaldo leh Messi te khel ka hmuh hman tho avangin mi vannei ber zingah ka tel niin ka inhria.

Comments

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Pathian hi a awm tak tak em?

Damdawi inah damlo kan awmpui a, ka thianpa nen chuan verandah-ah chhuakin hrisel hlutziate kan sawi dun a. Chutia kan titi mawlh mawlh lai chuan ka thianpa chuan, "A nih leh, Pathian awmpuina hi i tawng tak tak tawh em? Nangmahah Pathianin a awmpui ngei che tih hriatna engemaw thil tawn i nei tawh em?" tiin min zawt thut.

Ka nu hi tawngtai mi a ni a, awlsam takin kei chuan, "Aw tawng tawh e, ka nuin ka dam loh chang hian min tawngtai sak thin a, ka dam thin," tiin ka chhang. A ngawi vang vang a, "A nih leh damdawi a eitir thin tho che em?" Tiin min zawt leh, kei chuan min eitir thin thuin ka chhang. Chutah ka thianpa chuan, "Nachhawkna khan a chhawk lawk lo che a, tichuan i nuin a tawngtai che a, a tawngtai zawh rual chein nachhawkna chuan a chhawk ta thin che a nih chu," min ti a.

A nih duh hmel hi ka ti ta khawp mai a, a dang ka ngaihtuah leh a, "Lungleia ka kal dawnin car ka khalh a, tawngtaina hmunah keimahin ka tawngtai. Chutih lai c…