Skip to main content

Mini Militia Tips & Tricks


Tunlai thalaite mobile game khelh nuam tih ber pakhat chu Mini Militia hi a ni, kohhran thalaite pawh inkhawm banah an thukhawm lat lat a, an lo inkap leh nge nge thin. Mini Militia game tips & tricks thenkhat tarlang ila.

Player pathum ve ve nise, indona hmun chu Outpost nise. Weapon-te engtia hman tur nge tih hriatchian hmasak a pawimawh.

Weapon hman nuamte :

1. Energy guns - Laser : Laser hi hman a nuam ve khawp mai, thui tak tak a hawlh thei a ni.

2. Hand Guns  - Uzi , Magnum : Uzi hi a puak rang, mahse a kah a na em em lo, Uzi pahnih ken erawh a kah a na hle, a rang bawk a, a tha khawp mai. Magnum hi revolver kan tih thin kha a ni a, hei hi default weapon niin, accurate taka kap thiam tan chuan hman nuam tak a ni. Tin, a chhut a na em em bawk. Chutih laiin ken reng atan erawh a chi loh.

3. Rifles  - M4, M14, M93BA : M4 hi kan hriatthiam zawngin, America sipai ten an hman uar em em M16 silai pian ang kha a ni. A shooting range a thui ve deuhva, round thum a phuh a, chutianga tlir chi chu a ni. A kah pawh a na a, lua kah fuh chuan round khat pawhin a kah hlum theih. Chutih laiin dog fight-ah erawh khingpuite an chet ran chuan kah fuh loh chang a awm tam thin a, round thum zel a kal chuan a kap muang deuh bawk nen, hmanraw chuh ber a ni lem lo.

M14 hi sniper rifle te zawk kha a ni a, sniper rifle lian zawk leh kap hla zawk kha chu a khan lo. Mahse a speed erawh tha a, inhnahchilh atan pawh a hmantlak lutuk a ni. M93BA hi Sniper rifle lian zawk kha a ni a, a range a thui em em a, gamer-te ken chak ber pakhat a ni. Team zinga pakhatin a ken phei chuan hmelmate awmna thui tak a hmu thei a, team tan M93BA keng hi an tangkai em em thin.


3. Riot Shield : Riot Shield hi phaw kan tih mai thin kha a ni a, silaimu chu a dang hneh khawp mai, mahse  flamethrowers, rockets, grenades leh gas-te lakah erawh a him lo hle.

4. Short Ranged - MP5, AK47, Shotgun : MP5 hi a puak rang em em a, round khatah mu 50 a chhuak thei a, hla tak tak a kah theih bawk avangin gamer-te ngainat ber pakhat a ni. AK47 hi silai tha tak a ni a, default gun thlak vat nan chuan duhthusam ber pakhat a ni. Silai pahnih ken ang hial khawpa kap na a ni. Shotgun hi inpawmchilhna atana hman nuam ber silai a ni a, vawi khatah silaimu engemawzat a phuh chhuak thawt thawt thin. Mahse long range silai nena kenkawp erawh a tha khawp mai.

5. Long ranged - SMAW : Bazuka kan tih ang mai kha a ni a, hla tak tak a hmuh theih bakah rocket thui tak tak a thlawk thei a, khingpuite kah fuh loh pawhin an bul hnaia kahin an thisen a kam dawk thei, an thih phah hial thin bawk. Round khatah rocket 3 zel a awm a, round 6 a awm. A reload chhung erawh a rei hret a, backup tha tak nen put chi a ni.

6. Grenades - Frag, Gas, : Frag hi Grenades pangngai kha a ni a, khingpuite an awmna hriat lawk loh tuma vawm atan a tha em em a, tin, lei hnuaia an awm laia vawm chilh nan te a tangkai. Vawm zo mah ila a lak zel theih avangin a renawm loh a ni. Gas hi bomb uih kan tih mai thin kha a ni a, second 30 chhung a khu a, spawn-na hmuna lo vawm lawkte kha a tangkai duh phian a ni.


Kan weapon neih dan azira team strategy siam a pawimawh

Khingpui ten Sniper rifle an keng tih kan hria, keinin Uzi kan keng chauh bawk si. An tawmna kan hre lo, engtik lai pawhin min kaphlum thei reng bawk si. Chutiang hunah  chuan a phen theih theih phen a, grenades vawm deuh chhen a tangkai. Hnaihchilh  hnuah bawh huk emaw a tha thin.

Sniper rifle kan keng a nih chuan thiante awmna kan hmuh theih bakah khingpuite nen an inhnaih em? Tih thlengin kan en thei. Team tan sniper rifle keng an tangkai.  Hmanrua tha ber a awm chuang lova, a hmangtuin a hman thiam kha a pawimawh ber. Chutih laiin khingpuite hmanrua  hriat a pawimawh a, chuti chuan beih dan tur pawh a rel zung zung theih a ni.

Tlat fal hun hriat a tha

Pistol ringawt i neih laia i khingpuiten puak rang tak tak an ken si chuan mahnia tlatfal kha a ngamawm loh thin. Thiante thlazar hnuaia silai tha zawn pah kha a finthlak. Chutiang chiahin thisen a phai dawk, kah khat pawh i dawl tawh lo, first aid i mamawh em em a, mahnia tlat fal nul nul a hlauhawm, thiante cover-na hnuaiah chet thiam a finthlak thin.

Indonaah enge pawimawh?

Indonaah ral rel thiam an pawimawh em em. Kan hmanraw neih leh khingpuite hmanraw neih hriatchian a ngai. Kan chak lohna kan hria anga, kan chakna lai pawh kan hria ang. Kan khingpuite panna lai leh an chakna lai pawh kan hriatsak a ngai bawk.

Chu chu ringtu nun kawngah pawh a pawimawh tak zet. Thlem kan awlsamna lai kan inhriatchian a ngai a, naupan tet ata zu in chakna la nei chhin  reng reng lote chu setana hian zuin a thlem a rinawm loh. Chutih laiin mitin hian chaklohna lai kan nei theuhva, chutah chuan min rawn thlem chat chat thin.

Mipat hmeichhiatna hman khawlohna hi i chak lohna a nih chuan i ngaihzawng nen hmun fianrialah awm loh tum tlat ang che. Zu hi i chak lohna a nih chuan zu hmuna awm loh leh thian zu in kawm loh kha i strategy tur a ni. Chutiang zelin kan chak lohna lai kan inhriatchian hmasak phawt chuan thlemna awm theihna lak ata kan inthiarfilhlim thei dawn a ni.

Silai tha tinreng nei chunga mahni pawha thlawk fua fua thei nih chu duhthusam a ni. Pathian ralthuam famkim hmanga mahni chauh pawha Pathianthu vahchhuahpui ngam an awm. Chutih laiin hliam kan tawrh laia first aid kan zawn lai khan cover tu kan mamawh ang khan, kan chak loh lai hian Kohhran leh thiante an pawimawh em em thin. Kohhran hi min cover-tu a ni reng a, a rintlak a ni.

Ringtu nun hi indo nun a ni a, tawngtai, bible chhiar leh inkhawmte hi kan chakna hnar a ni. Mahni inhriatchian hi a pawimawh hmasa ber a, hmelmate kah tum lova kan lo hawi mai mai chuan hnehna kan chang dawn lo. Kan bei ve reng anga, hnung lamah min backup-tu Isua a awm reng bawk anga, hnehna chu kan chang zel dawn a ni.

 A tawp berah chuan Lalpaah leh a chakna thahruiah chuan thiltihtheihna neiin lo awm rawh u. Diabola ngamthlemnate chu in do zawhna'n Pathian ralthuam famkimin inthuam rawh u.

Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e.

Chuvangin, ni tha loah chuan in do zawhna tur leh, in tih zawh vek hnu pawha in din theihna turin, Pathian ralthuam famkim chu la rawh u.

Chutichuan, in kawng chu thutaka hrengin, felna awmphaw chu hain, remna Chanchin Tha inbuatsaihna chu in keah bunin ding rawh u; chung lo pawh chu rinna phaw la u la, chu mi chuan mi sual thal alh thei zawng zawng chu in timit thei ang.

Tin, chhandamna lukhum leh Thlarau ngunhnam (Pathian Thu chu) la u la, tawngtaina leh dilna tinrengin eng hun pawha Thlarauva tawngtaiin, chu mi kawngah chuan mi thianghlim zawng zawng tan thahnemngai tak leh dil tlatin ngaihven rawh u. (Ephesi 6:1-24 )

Comments

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Pathian hi a awm tak tak em?

Damdawi inah damlo kan awmpui a, ka thianpa nen chuan verandah-ah chhuakin hrisel hlutziate kan sawi dun a. Chutia kan titi mawlh mawlh lai chuan ka thianpa chuan, "A nih leh, Pathian awmpuina hi i tawng tak tak tawh em? Nangmahah Pathianin a awmpui ngei che tih hriatna engemaw thil tawn i nei tawh em?" tiin min zawt thut.

Ka nu hi tawngtai mi a ni a, awlsam takin kei chuan, "Aw tawng tawh e, ka nuin ka dam loh chang hian min tawngtai sak thin a, ka dam thin," tiin ka chhang. A ngawi vang vang a, "A nih leh damdawi a eitir thin tho che em?" Tiin min zawt leh, kei chuan min eitir thin thuin ka chhang. Chutah ka thianpa chuan, "Nachhawkna khan a chhawk lawk lo che a, tichuan i nuin a tawngtai che a, a tawngtai zawh rual chein nachhawkna chuan a chhawk ta thin che a nih chu," min ti a.

A nih duh hmel hi ka ti ta khawp mai a, a dang ka ngaihtuah leh a, "Lungleia ka kal dawnin car ka khalh a, tawngtaina hmunah keimahin ka tawngtai. Chutih lai c…