Skip to main content

Ka suangtuahna khawvelah ka cheng ta tak tak e!


Robin Hood-a film kha Star Plus-ah a chhuak thin. Hmuhnawm kan ti si, TV erawh kan nei si lo. Duh duh hunah mahni en chak zawng mi inah a en theih loh.

TV en an lo phal loh chang hian hrehawm kan ti thei tak zet. Tlai khat chu ka instrument box hi lek langin ka chhungte hnenah, "Ka box hi TV teah han chang se, tunah hian Robin Hood a chhuak mek a, hetah hian Robin Hood chu han chhuak par par mai se, khawvel hi chu a va han nuam dawn tak em!", ka ti.

Vawiinah chuan hei instrument box tiat vel mobile phone atangin TV kan en pap pap thei tawh. Hetiang hi a thleng ang tih ka ngaihtuah phak lo. Khang hunlai ka ngaihtuah khan vawiin hi chu ka suangtuahna aia ropui daih a ni tawh. Tun atanga kum 50 hi kan dam thleng ve leh te a nih phei chuan? Hmasawnna hi a zuanin a zuang si a!

Mi angin kan nei ve lova, TV pawh kha kan nei tlai, VCR a lo chhuah hnu fe; Star TV kan en hrep tawh hnu khan TV kan nei ve chauhva. Kan TV hmehna, a hawn theihah khan VCR hi lo awm tel se hi ka ti thei lutuk a. Khang hun laia ka suangtuahna chu TV-ah khan video player engemaw tal bet tel nghal se ka ti thin. Mahse vawiinah chuan pendrive vuah theih leh internet TV thlengin kan hmang chho ve ta mai chu a ni si a. Hei pawh hi ka suangtuah phak bak a ni.

High School kan kal laiin computer kan zir ve thin. Kan school-ah khan computer pakhat lek a awm a, chu pawh Principal room-ah dah a ni a. A thuin kan zir a, pheikhawk phelh meuhin Principal room-a computer chu vawi khat kan en, chu chu kan practical a ni. Computer hi kan neih ve theih hi ka ring ngai lo reng reng. Mahse vawiinah chuan ka malchungah laptop a awmve ta ran si a.

BSNL landline kha kan awt ve thin lutuk, TV-a wireless phone kan hmuhte kha kan ute kha chuan, "Camera trick vek a nih khi, khitiang a awm thei lo," an ti thin. TV Remote control hi lek pahin, "Hei hi phone-ah han chang se, thiante nen mu chungtein han inbia ila," ka ti thin. Vawiinah chuan video call thlengin kan hmang chho ta mek zel chu a ni si a.

Fruity Loops hi a buaipui hmasa pawl kan ni ve awm e. Midi leh wave awmzia kan hre si lo. Ka thianpa nen hian kan track buaipuiah guitar kan zep lut a. CD writer kan nei si lo, kan hriat theih chinah writer nei pakhat chiah an awm. Chuta write chu kan tum a. Mp3-a kan export kha floppy disk-ah a leng si lo. Project file kha midi a nih avangin a te a, floppy-ah a leng. Thiante writer nei chu kan pan vang vang a, an khawlah chuan FL Studio chu kan han set up te te a, chutah FL Studio hmanga project file kan hawn chuan guitar kan zeh tel kha a bo daih zel a, mak hi kan ti thin khawp mai. Kan u pakhat floppy disk kha kan va han tichhe nasa tak em.

Chutah kan u pakhat hian Kingston pendrive 128 MB hi a lo nei hlauh a. Kan vawi khat hmuhna a nia, ropui hi kan ti chur chur khawp mai. Chu pendrive hmang chuan music track chu kan copy-a, kan write ve thei ta a. Pendrive te kha a va han ropui thin tak em, a awrhin an han awrh ngei thin kha a nia. Pendrive awrh hunlai khan kan la nei ve phak lo. Vawiinah chuan CD ROM pawh hi kan mamawh tawh lo niin a lang. Cloud computing kan tia, social networking website leh phone application hmangin data kan inthawn zung zung tawh bawk nen, a maka makin khawvel thiamna hi a thang a ni.

Ka titi thupui atan, "Ka suangtuahna khawvelah ka cheng ta tak tak e!" tih ka hmang khi a dik chiah lo, ka suangtuah phak bak khawvelah ka cheng mek zawk a ni.

Comments

Post a Comment

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.