Skip to main content

Lilzo


Tunge a nih a? Khawi lam mi nge a nih ka hre lo, a hming chu Lilzo a ni, Internet; social networking sites/apps-ah a hming an lam chamchi, Youtube-ah a hla pathum ka ngaithla, kei rap music ngaina lem lo pawhin ka ngaina tlat si.

Mi thenkhat chuan internet-ah an tih trend luih niin an ngai a ni maithei, PPAP pawh ni hnih thum chhung lekin khawvela hla hit kai a ni thei, khatiang erawh a ni ve lo tlat. Lilzo hian hla mawi tak tak a chham chhuak a, a inthuamna leh a music video hrim hrim pawh Mizoram khawpui leh thingtlang mi tam zawk mil tawk chiah chiah a ni bawk a. Tih lar luih/bawl lar a ni lo, talent leh quality a larpui ka ti lo thei lo.

Thawnthu bu kan chhiar a, a changtu angin kan han inhmehbel chhunzawm nghal a, chu thawnthu zunzam chuan min man ta, zanah mahni chauh pawhin kan hlim veng veng thin ang hian Lilzo hlathute hian tleirawl leh rawlthar atanga nu leh pate thlengin min fan, a chhan chu hmagaihna thu a phuhchhuah vang a ni.

Thenkhat hla thuah chuan, "Min kahhlum tumin min um," tih te a tel nawk mai, chutiang thil la tawng chiah lo tan chuan mahniah a tla na mawh khawp. Chutih laiin Lilzo chuan, "A hre lo em ni aw.. kan in bang lah dap, an thlahte ka han chhui a, mi awmthei chhungkua. Keini inchhung ve zawng; sazu tan pawh riahna atan bak a tlak lo," tia a rawn chham chhuak zet hi zawng, kei ngei pawh ka hnuk a ulh tep a ni.

Ngaihzawng kan hriat tan tirh hunlaite ka ngaihtuah let chang hian Lilzo nen inanna lai nei hian ka inhre thin, "Aw, kan in chungte hi pawp lo selang chuan confi deuhin ka pawh ngam ang mawle. Tun ai hian hausa ve hret ilang chuan an thianho zingah ka tel ve ngam anga, 'ka duh em em a ni,' tih thu pawh ka hrilh ngam ang mawle," tih rauh rauh chang ka nei thin.

Khang hunlai chanchin dawn kir paha "Ka sawm che (Lung a Leng)" tih ka ngaihthlak hi chuan Lilzo hi keimah ni tlata inhriatna ka nei thin. Chutah a thunawn ,"Leng leng leng, lung a leng em mai. Seng seng seng rilru ka seng khawiah tuan ta che i maw?" tih thluk mawi takin a rawn sa chhuak, a va mawi vawng vawng tak em! Ka rilru kha chu ka seng ve nasa thin alawm, a chang kha chuan Doctor te ka ni a, a chang chuan Bike mawi takte ka nei a, a chang leh chhungkaw hausa tak kan ni bawk a.

Thenkhat mahni nihna baka lan tum an awm thin. Lilzo erawh a dress leh a chetziaah a hausa bik lo tih a lang chiang. Chu tak chu a ni ka ngainatna chhan chu. A nihna angin a lang ngam a, Zo takin a inpholang mai a, zaithiam tak tak leh changkang tak tak tam tak kara Lilzo a rawn HIT tlat si hi Mizote hian kan economy milpui tawk vela khawsa thiam mihring hi kan ngaina a ni tih a pho lang chiang hle a ni.  Sap kan ngaisang a, sap an kan chak, sap tih dan kan copy, mahse sap nungchang kan zir nasat poh leh kan phak loh zia a lang nasa ting mai a, kan phak tawk ang zela ke pen tur kan lo ni zawk a ni.

Music lamah pawh ti leh zel teh ang, Lilzo aia chham rang leh music changkang nei Mizo an awm teuh, mahse an entawn leh an tihdan an zir khawvel rapper ropuite lakah chuan ek mai an ni. Chutih laiin Lilzo chuan Mizo ril rem zawng takin hla a siam, "Hunpuiah khawn dun ila, thingfak," tih laite hi thingtlang lamah chuan a va HIT dawn tak em. Rhyme a phuah fuh thin hle bawk, a thluk pawh duhthusam a ni, mi nawlpuiin kan zawm theih phah bawk, hla thu chhampui hleihtheih loh an awm laiin thinlungah ,"Leng leng leng, lung a leng em mai. Seng seng seng rilru ka seng khawiah tuan ta che i maw?" tih a ri tluk tluk si, hei tak hi a ni Mizo rilrem zawnga music kai her thiamte hlutna chu.

Music genre lam pawh sawi chho zel ila, Albatross chu sawi lohva lum an ni a, Mizo band zingah chuan Drop Doubt hi ka band ngainat ber pakhat an ni. Progressive lam ngaina ka nih avangin "Invictus" tih kha ka chhuang a, mawi ka ti a, ka duh em em bawk. Mahse an larpui tehchiam lo. Chutah "Take away" tih an rawn sa chiah mai chu alternative rock lam thalaitea a tlak nat lai a lo ni bawk nen, khi tah a vawrh a nih kha.

Rapper dang aiin Lilzo hi a thain a thiam bik ka ti hauh lo, mahse a ZO-na tak hi mipui ngainatna a ni a, chuta karah talent a lo nei tha em em bawk si nen, mipui tam takin kan ngaisang hi thil mak a ni love.

Comments

  1. Ziak thiam khawp mai ✌✌👌 chhiar nuam e.. Kei ni ziak lam mi lo tan chuan

    ReplyDelete
  2. "Kahhlum tumin min veh" alawm Sir. :D A ngaihnawm hle e, tunlai chu LilZo chungchang ziahna chu tu pawhin ngaihnawm tiin kan chhiarin kan lem duak duak a nih hi maw...

    ReplyDelete
  3. A ziatupa pawh hi rap nghal law2 se hit dawn nih hi....thu leh hla thiam em mai....hahahaha

    ReplyDelete

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Premier League vs Inkhawm

Thenkhat tan chuan Zu leh damdawite, sum leh nula te hi an chaklohna a ni. Kei erawh chu Football hi Pathian ka biak min tibuaitu a ni thin.  Kohhran Inkhawm pawimawh Inrinni zan leh Pathian ni zanah hian English Premier League khelh a ni thin. Mizoramah pawh kan buaipui a, kan atchilh a, inkhawm a awm lai chiah chiah hian inkhel hmuhnawm a awm thin bawk si a.

Football atchilh