Skip to main content

Pathian hi a awm tak tak em?


Damdawi inah damlo kan awmpui a, ka thianpa nen chuan verandah-ah chhuakin hrisel hlutziate kan sawi dun a. Chutia kan titi mawlh mawlh lai chuan ka thianpa chuan, "A nih leh, Pathian awmpuina hi i tawng tak tak tawh em? Nangmahah Pathianin a awmpui ngei che tih hriatna engemaw thil tawn i nei tawh em?" tiin min zawt thut.

Ka nu hi tawngtai mi a ni a, awlsam takin kei chuan, "Aw tawng tawh e, ka nuin ka dam loh chang hian min tawngtai sak thin a, ka dam thin," tiin ka chhang. A ngawi vang vang a, "A nih leh damdawi a eitir thin tho che em?" Tiin min zawt leh, kei chuan min eitir thin thuin ka chhang. Chutah ka thianpa chuan, "Nachhawkna khan a chhawk lawk lo che a, tichuan i nuin a tawngtai che a, a tawngtai zawh rual chein nachhawkna chuan a chhawk ta thin che a nih chu," min ti a.

A nih duh hmel hi ka ti ta khawp mai a, a dang ka ngaihtuah leh a, "Lungleia ka kal dawnin car ka khalh a, tawngtaina hmunah keimahin ka tawngtai. Chutih lai chuan Silchar sumo chuan chak takin min pel a, ka tawngtai zawh chuan ka tlan ve lehnghal. Ka tlan chak ve tho avangin Silchar sumo chu ka hmu phak chiah chiah zel a.

"Tichuan, Melriat kan thleng phei, truck lian side la miah lo nen kawiah Silchar sumo chu an insu ta bur mai. Kei kha tawngtai lo ilang chuan kha truck lian kha ka sut zawk ngei ka ring tlat a ni," tiin ka sawi leh. Ka thianpa chu a ngawi leh vang vang a, "Silchar sumo khan rawn pel hman ta lo che selang, tawngtaina hmunah khan tawngtai ta lo la. Kawng ngilah truck kha i tawk dawn chiah zawk a nih chu, chetsualna a thleng lo zawk thei tlat asin, i tawngtai vang a nih kher loh chu," min ti leh.

"Tawngtaia ka thil dil tam tak min tihhlawhtlin sak a," ka ti leh a, ani chuan, "I dil tam zawk chu a tihhlawhtlin sak chuang hleinem che," min ti leh a. Ka ngawi vang vang a, chutih lai chuan heti hian a sawi chhunzawm a,

"Ei kan zawn tumna kawngah kan hlawhtling a, 'Pathian remruat a ni e,' kan tia, chutih laiin eizawnna kawng pakhatah kan hlawhchham a, 'Pathianin he kawng hi zawhtir min phal lo a ni,' kan ti leh mai a. Kan dam lova, 'Pathianin hrehawm kan tawrh hi a phal a ni,' kan ti a, kan hrisel em em laiin, 'Pathianin hrisel taka awm turin mal min sawm a ni,' kan ti leh bawk a.

"Thil thleng reng reng hi Pathian vang kan ti vek a, Pathian awm ringlo te pawh inhmangaih tlang dial dialin an awm a, an hausa hlawm em em bawk nen. Khawvelah hian kan lo piang a, eng eng emaw kan tawng tlang a, Pathian awm ring ho hian an thil tawn apiang chu Pathian vang niin an ngai ni mai zawk niin kei chuan ka ngai," tiin.

Inah ka hawng a, inchung zawlah ka dak mai mai a, ka thianpa thil sawi chuan ka rilru a la peng hneh hle. Dik tak chuan Pathian awmpuina ka chang ve nia ka inhriatna ka'n sawichhuahte kha dik deuh deuhin min hnial bawk si a, Pathian hi a awm tak tak em? Kan hmu thei bawk si lova, a rawn lum pup pup bawk si lo, "Hmu lova ringte chu an eng a thawl e," a la ti ta deuh deuh bawk si nen, kan kawng zawh mek lai hi a dik teh reng em? Tih chu mahni leh mahni ka inzawt ka inzawt tan ta.

Van chu a thiang mawi em em a, tlak lamah varparh arsi a herliam mek, tlak lam herah chuan Chhohreivung a lang ut mai bawk a. "Khing arsi tam takte khi engtia lo awm ve ngawt nge ni ang? Keini mihringte pawh hi engtia he leia lo awm ve ngawt hi nge kan nih ang? Tihte chu ka ngaihtuah neuh neuh a. Chutih lai tak chuan ka cousin pakhatin a sawi thin ka hrechhuak thut.

Pawl 10 ka nih laiin, "I hriat reng tur chu, i sana bun lai kha thiat darh vek la, tichuan i bag-ah hian khung la. Kum maktaduai tam tak thing la. I sana, tuna a awm dan ngai chiaha a maha a inremkhawm lehna chance hi engzat nge ni ang? ZERO a ni. I sana ang lo deuh, engemaw khawl nung mak deuha a inremkhawm pawh a rinawm loh. Chuta chiang em em mai chu, mihring hi tihpalh thilthua piang kan ni lo a ni tih hi a ni,"tiin min hrilh.

Ka innghah vena ka lo tih thin ka cousin thusawi ka hrechhuak leh chu ka lawm ta em em a, tihpalh thilthua he khawvela awm kan nih loh zia chu ka ngaihtuah chho ta zel a. Khua a vawh deuh avangin ka room-ah ka chhuk a. Ka lehkhabu duh deuh deuh ka dahkhawmna ka hai leh, BBC Knowledge chu ka phawrh leh a, ka keu khat tawh tih hriat tak hian a lo ngap deuh tiarh bawk a. Ka hrufai nawk nawk a, khawvel hi awlsam taka chhe mai thei a nih zia an tarlanna article chu ka keu leh a. Chapter tin chuan Pathian min ven zia a tarlang ni hian ka hre ta a.

Mars leh Jupiter inkarah khian asteroid belt a awm, chutah chuan lung nawi lian tak tak maktaduai chuang a awm. Chung lungte chuan Ni hi an hel ve a, asteroid kawngbo tam takin planet dang dang an den thin thu kan hre thin. Tin, kan awmna khawvel ngei pawh hi asteroid chuan a deng tawh nia sawi a ni bawk.

Ni an helna kawngah hian kawngbo tam tak an awm thei, chungte chu engtik lai pawhin khawvel tan an hlauhawm a. Aizawl District tiat lek lungin khawvel han deng selang chuan khawvelah nunna tam tak a mang ngei dawn chiang. Tin, Comet (Simeikhu) te pawhin ni an hel hlawm a, an helna kawng hi a danglam danglam avang hian khawvel su thei reng an ni bawk.

Dinhmun hlauhthawnawm taka kan din lai hian khawvel veng turin Hrangchhuana (Jupiter) a awm a, planet zinga lian ber a nih avangin a hipna pawh a na em em a, lung nawi khawvel lama thlawk lut tur tam tak chu a lo hip chaih chaih a, Jupiter hi awm ta lo selang chuan vawi tam tak kan khawvel hi asteroid-in a su ngei dawn a ni. Chuvang chuan Hrangchhuana hi chhan neia dah a ni tih heta tang hian a chiang ta em em a ni.

Ni (Sun) atang hian engtik lai pawhin zungzam hlauhawm tak tak a chhuak reng. Sun Storm an tih mai radiation hlauhawm tak tak chuan engtik lai pawhin khawvel hi a su a. Heng zungzam hlauhawm tak tak hi khawvelah direct-in lut ngat selang chuan vun cancer kan vei anga, nunna tam takin an tuar bawk anga, khawvel hi chenna tlak a ni dawn lo a ni. Chutih laiin khawvel hian chung zungzam hlauhawm dang tur magnetic field tha tak a nei a, chhim tawp leh hmar tawpah a beng per zel a, kan him mai mai a ni. Earth's magnetic field hi tu emawni mi thiam leh theihna ngah takin mihring hum nan a siam a ni tih chu phat rual a ni lo bawk.

Tin, arsi a thih dawn hian nasa takin a puak thin. Chu chuan eng zungzam chak lutuk a pechhuak thin a. Chung Gamma Ray hlauhawm tak takte chuan khawvel hi han su ngat selang chuan kan khawvel atmosphere hi a chhe nghal vek dawn tihna a ni a, engtiang chiahin nge a thawh dawn tih mithiamte chuan sawi thei lo mahse khawvela nunna awm zawng zawng hi chuan an thih phah thei ngei dawn niin an ngai.

Engtik lai pawhin kan Universe hi chhe rup thei dinhmunah a ding reng a, hipna chak lutuk ten kan solar system leh kan galaxy hi a tibuai vak thei reng, a zir thuk apiangin kan derthawn zia an hrechiang. Kan leiin ni a hel kual dan te, kan solar system thlawh kual dan te leh kan galaxy thlawh kual dan zawng zawng te hi tu emawni mi thiam leh thil tithei takin a duan leh tha a tih dan bera a herhkual vel hi a ni tih hi a lang chiang em em.

Kan khawvel hi nunna a awm theih nana duhthusam a nih dan ringawt pawh hi ngaihtuah chuan siamtu hi a awm ngei a ni tih a chiang a, tha a tih danin thil reng reng hi a herh kual tih hi phat rual a ni lo a ni. Tin, engtik lai pawhin virus hlauhawm tak chuan mihring hi a that mang thei reng bawk a, hetiang em ema derthawng kan nih laia hrisel tak leh dam taka he khawvela kan awm hi Pathian vang a ni a, minute tin, second tin, mitkhap kar tin hi a thu avang chauhin kan nungin kan che a ni zawk.
Thil engemaw rau deuh leh magic thil deuha che turin mi chuan Pathian an beisei thin, a chhan chu miracle an hmuh duh vang a ni. Damdawi in kawta ka thianpa zawhna chu keimahah chiang takin a chhanna ka hmu ta, second tin; minute tin hi Pathian hian min lo awmpui zawk a ni tih ka hmuchhuak, hetia ka thaw thei ringawtte hi miracle a nih zia ka hmu thiam a, dam sen vur chunga, "Pathian a awm lo," mihringin kan tih theihna chhan pawh hi Pathian awm vang a lo ni zawk a ni. Pathian awm lo ngat selang chuan thil engmah hi a awm dawn lo a ni, a chhan chu engkim siamtu a ni si a.

Tichuan a zan la la chuan ka thianpa chu whatsapp hmangin Pathian awm zia ka va hrilh ta mawlh mawlh a, ani chuan a ngaithla kar a, a tawpah chuan nui suk chung hian, "Khang zawng zawng kha ngaihtuah tura ka duh vang che kha a nia; zawhna mak pui pui ka zawh che ni," a lo ti sam et a. Ka thianpa khan Pathian awm a ringlo ni lovin, Pathian a awm zia hi chhut ve tura min tih vang zawk a lo ni a.


Comments

Post a Comment

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Premier League vs Inkhawm

Thenkhat tan chuan Zu leh damdawite, sum leh nula te hi an chaklohna a ni. Kei erawh chu Football hi Pathian ka biak min tibuaitu a ni thin.  Kohhran Inkhawm pawimawh Inrinni zan leh Pathian ni zanah hian English Premier League khelh a ni thin. Mizoramah pawh kan buaipui a, kan atchilh a, inkhawm a awm lai chiah chiah hian inkhel hmuhnawm a awm thin bawk si a.

Football atchilh