Skip to main content

Universe-ah hian kan lei (Earth) hi engtia lian nge?

Tlang lian pui puite, tuifinriat zau tak leh thlaler zau takte kan ngaihtuah hi chuan kan chenna khawvel len zia hahipin kan sawi thin. He khawvelah hian nunna chi hrang hrang nuai tam tak a awm a, hetih lai hian chung pawh chu hriat pawh kan la hre kim hleithei lo chu a ni si a.

Technology lamah nasa takin hma kan sawn a, khawvel thiamna chuan a vawrtawp a thleng chho mek nitein thenkhat chuan an lo sawi ve mek bawk. A nihna takah chuan tuifinriat mawng pawh kan la dap kim lo mai ni lovin, Malaysia Airlines MH370 pawh 8 March 2014-a bo kha a ni a, tun thleng hian kan la zawng hmu zo lo chu a ni si a.

Chutiang khawp chuan kan chenna lei pawh kan la hriat chian loh laiin van lam han ngaihtuah ta ila. Ni (Sun) hi Arsi pakhat a ni a, he Arsi pakhat hi planet 8 (Pluto chhiar tel lohvin) in a hel mek, ni len tur zia chu, kan chenna khawvel hi Ni (Sun) chhungah khian 1,300,000 vel a leng tlat mai.

Hetih lai hian, mi thiamte chuan vanthengreng (Universe)-ah hian leia vaivut zawng zawng aia tam Arsi a awm niin an hria a nih chu! (Lei nawi pakhatah hian vana arsi zawng zawng aia tam ATOM a la awm zui bawk! Atom chungchang sawi zau zuai ila, thil zawng zawng remkhawmtu nia an hriat chu Atom hi a ni a, atom len zawng chu, 'Marble hi atom nise, i kuttum len zawng chu khawvel tiat a ni dawn tihna a nih chu'). Kan Ni (Sun) anga planet tena an hel ang chi hi 10,000,000,000,000 chuang a awm nia chhut a ni a, chung zinga pakhat kan chenna khawvel hi a Special ber em? Tih zawhna chuan ngaihtuahna a ti thui thin khawp mai.

Khai le, Earth len zawng atanga Universe kan hriat theih chin teh chho ang aw..

Hei hi kan awmna LEI (Earth) chu a ni e.
A hnuai ami hi kan Solar System, Ni leh a heltu planet chu a ni a, a sen (Red)-a in ziak, inkawk khu Khawvel chu a ni.
A hnuaia milem hi, kan Solar System hnaiha Arsi dang awmkhawm ho a ni a, heng ho hi Solar Interstellar Neighborhood tih niin, Solor system tin hian arsi leh planet engemaw zat an nei vek.
(Kan hriat mai mai tur chu, mihring kan thlawh hlat ber chu Thla (Moon) a ni a, mihring siam satellite thlawk hla ber chu Voyager 1 niin, Lei atangin 17,922,521,702 km-a hla a thlawk tawh a, kan solar system a chhuahsan fel ve deuh chiah. Kan awmna atanga solar system hnai ber pawh hi tuna kan technology hmang chuan mihring dam chhung hian kan thleng hman dawn lo a ni)

A hnuaia milem kual deuh kung hi Milky Way Galaxy a ni a, Mizote chuan Thlasik kawng kan tih thin kha a ni. A chunga Solar Interstellar Neighborhood kha Milky Way Galaxy-ah chuan chhunhan pakhat tiat lek a ni. Kan Solar System te phei chu a lang phak tawh lo reng reng. Kan Milky Way Galaxy-ah hian 100 billion chuang Arsi a awm nia chhut a ni.
Kan Galaxy atanga Galaxy hnai deuh deuh ho chu Group khatah an then leh a, chu chu Local Galactic Group tih a ni. A hnuai ami hi Local Galactic Group chu a ni a, kan awmna Milky Way Galaxy chu chhunhan pakhat khu a ni e. A dang rawn de zeuh zeuh ho pawh khu Galaxy vek an ni bawk e.
Local Galactic Group tam tak bawrkhawm chu Virgo Supercluster tih a ni a, kan Milky Way Galaxy chu lan pawh a lang phak tawh lo. A hnuaia milem hi Local Galactic Group chu a ni a, han ngaihtuah la, kan Solar System leh kan chenna khawvel tet tawh tur zia mai chu!
A hnuaia milem hi Local Superclusters a ni a, a chunga Virgo Supercluster lian kan lo tih ve tawh em em kha chu chhun han ang vel lek a ni tawh.
A hnuaia milem hi mi thiamte'n tehna chi hrang hrang hmanga an teh hnua kan Universe len zawng nia an hriat chu a ni a, kan teh phak loh khawpa zau hi a la awm dawn tih pawh an ring thiam. Tichuan, he Observable Universe-a chhunhan pakhat hi  Virgo Supercluster kha a ni a, eng sep sep de tiarh a dangte pawh hi  Virgo Supercluster anga bawr khawmte an ni hlawm.
Han scroll chho leh ta la, kan Galxy, Solar System leh kan chenna khawvel tet zia chu e.. te tak a ni. Observable Universe atang hian ka'n thlir a, heng zawng zawng siamtu Pathian chuan; hmuh tham loh leh ngaimawh tham loh Solar System-a planet pakhat; Planet Earth chhunga cheng 'Mihring hi engemaw a niha, A hriat reng thin ni?' ka ti ve thin.

A hre satliah mai pawh a ni lo, mihring chhandam nan a fapa mal neihchhun Lal Isua Krista a la tir zui! A mak tih mai loh chu sawi tur ka hre lo a ni.

Heng thlalakte hi (File:Earth's Location in the Universe) atanga lak a ni a, thlalak fiah zawk i hmuh duh chuan : Hetah hian click rawh

Comments

  1. A mak!! A ropui, a ngaihnawm khawp mai!!

    ReplyDelete
  2. A ngaihnawm hle mai. A conclusion hi a tha em em bawk....

    ReplyDelete
  3. Pathian ropuizia hi kan va hre pha lo tak em

    ReplyDelete

Post a Comment

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.