Skip to main content

Mi hi hmusit ngawt thei kan ni em?



Vawi khat chu lehkha pawimawh pein in pakhatah ka lut a, pa ber chuan an fapa naupang zawk chu a la hau mek. "I nu leh pain hna kan thawk ve ve, i duh duhna hmunah pawh i zir thei, sang tak zir turin kan duh che a, i mamawh chu kan pe vek chein kan hria, mahse hei enge i rawn zirchhuah hi? Degree pawh nei lovin hei nileng lengin game i khel a, i u hi chuan kan thu a awih a, tunah chuan dortor niin hlawh tam tak a nei tawh a nih hi, nang ve chu," a lo ti mawlh mawlh a. Lehkha ka pek zawh chuan ka chhuak lehnghal vat a.

Chumi tuk chu inrinni a ni a, chhungte in sa ka pui a, chhunah thingpui in chawlh kan hmang. Hnathawk ho nen chuan kan inrual tlang, kan thu hova, kan titi malh malh a. Labour hna chu a hahthlak thu leh security tha ve deuha thawh an chak thu an sawi liam liam. Pakhat chuan, "Pawl 12 thleng lehkha ka zir, Accountancy te leh Company Accounts te kha chu a thiam ber ka ni thin kan class-ah kha chuan. Company Secretary te kha zir zawm ka tum ve nasa, migration application te kha ka ti fel vek tawh. Mahse ka pa khan pawisa kan neih loh thu min hrilh a. Khami tuma hrehawm ka tih zia khaw chu aw. College pawh kha ka zir zawm thei ta lo, eizawn kha a ngai ta si a, dawr te ka nghak a, a chang leh ka labour ta a, zir zawm thei ngat ilang chuan.." a ti vawng vawng.

Pakhat chuan, "Kei chu B.Sc 2nd year thleng ka kal, ka tui bawk a, kan zirlai mai bakah lehkhabu dang ka chhiar nasa lutuk. Quantum physics te kha ka man hman. Ka chak em em thin chu academic line-a kal chhoh a; Phd tih kha a ni a. Mahse kan chhungkua eizawngtu ber ka pa kha a cancer ta si, kan sum neih zawng zawng ka pa enkawl nan kan hmang a, a boral chhunzawm ta bawk a. Lehkha zir chhunzawm theih a ni ta lo, unau zinga upa ber ka nih avangin eizawn a ngai ta. Ka graduate bawk si lova, ka thawh theih tawk chu heng hi a ni ta mai a, hna a vang em em bawk si, Police lak a nih hunah ka try ve ang ka lo ti mek a," tiin a sawi.

Pakhat ve thung chuan, "Labour chu ni lo ilang chuan ka hmangaihi kha nupuiah ka nei ngei ang mawle. Ka dem em em lo, a chhan chu keimahah hian security a chhung ten an hmu miau lova. Nihna hian zir ve deuh selang chuan kan hmangaih te hi chu kan nei ve thei ngei tur chu a ni si a. Ka nu leh pa an boral hma a, pawl 10 pawh ka pass lo, lehkha zir a; nihna sang tak te chu kan duhthusam a ni ve alawm, ka hmel hi chu a tha mawle, mahse min iai miau si a," tiin nui deuh hawk hawk chungin a sawi a.

An chanchin an han sawi tliar tliar a, harsatna tawk lovin chhungkaw khawsak pangngai tak ni chho hlawm selang chuan hna sang tak tak thawk thei tur an lo awm fur tih an titi atangin a hriat. Labour mah nise lehkha thiam thei tak tak an ni thin tih a chiang, mahse an dinhmunin a zir tak miau loh avangin an tum ram an thleng thei ta rih lo.

Nihna sang tak tak nei te pawh hi hahipa fak chiam chiam tur pawh an ni vek lo, a thente chu an sum neih avanga hlawhtling ta sawi tur an tam hle. Chutih laiin, engmah harsatna nei lo; mahse thatchhiat avang liau liaua an nih tur ang ni phalo te erawh an demawm hle. Thenkhat chu lehkha zir chhuak lo mahse an nu leh pate hausak zar zova sumdawng lian an awm teuh. Mi hi an hnathawh a ropui loh avangin kan hmusit ngawt tur a ni lo, kan chhungkaw dinhmun angah ding ve ta se se keini aia sang tur hi an tam lutuk.  Dinhmun tleu tawh laklawh; rahbi thar tuk hleithei lo an awm teuh, chutih laiin harsa tak chunga dingchhuak ta te erawh an ropui tak zet a ni.

Comments

Popular posts from this blog

Football manager leh player te inkungkaihna

Football manager-te hi club chhungah chuan an thu thin hle a, game an khelh dan tur zawng zawng an ruahman thin bakah club thenkhatah chuan player transfer chungchangah pawh thuneihna an nei thin bawk. Club thenkhatah chuan manager te hian nipui bazara player an duhzawng an sawi a, chung player te chu club hotuten lak tumin theihtawp an chhuah thin.

Football manager hna chungchang hi ram a hrang angin tihdan pawh a hrang ve deuh thin a. England-ah chuan manager te hi club enkawlna kawnga a fung pawimawh tak chelhtu an nih thin laiin ram dangah erawh manager ni lovin football coach pangngai angin an inchhawr mai a, team an practice pui a, game khelh dan tur an ruahman leh a, football game chungchangah chauh an thu a ni deuh mai.

England-ah chuan football manager te hi an thu thin khawp a, team management zawng zawng an buaipui bawk a, player zingah hmasawn lo leh an thawhpui theih lohte chu an thehchhuak hmiah hmiah thei bawk. Player te pawhin team-a tel ve ziah an duh a nih chuan man…

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…