Skip to main content

Team ropuite ropui chhan chu


Kum 1990 hnu lamah Mizote chuan tuipui ral ram inkhelte mumal takin kan en ve ta a, kum 25 vel chhung lek pawhin football club ropui tak tak sawi tur an awm nual. Chung zingah chuan Barcelona leh Manchester United-te hi thlur bing ila.

Class of 92 an tih ho kha Sir Alex Ferguson-a ropuina an ni a, Manchester United chuan England ram an awpbet a, Europe thlengin trophy lian tak tak an chawi ta a nih kha. United ropui vanglaia an innghahna chu an academy chhuak ho kha an ni a, an game khelh dan reng reng pawh khang player-te hmanga duan a ni hlawm.

Football chu mimala khelh theih a ni lo, team game a ni a, chuvang chuan academy chhuak inkawmngeih deuh deuh leh game inman deuh deuh ho khan United chu hun rei tak chhung ropui takin an lenpui ta a ni. Khang rual ho kha an chawlh hnuah chuan United ropui tak kha kan hmu leh hleithei ta lo a ni.


Barcelona pawh chutiang chiah chu an ni, khawvela academy tha ber ni hiala an sawi thin chu La Masia a ni, kha academy atanga chhuak batch fuh deuh an rawn awm, chung ho chu an rawn puitling a, Spain-ah mai ni lo, Europe-ah pawh hneh theih loh ang hiala sawi an ni ta a nih kha. Naupan lai atang tawha awm ho an nih avangin maimitchhing chung pawhin ball in pass dawn se an tisual lovang tih khawp khan an game a inman a. Vawiinah erawh khang batch duhawm ho kha an chawlh chhoh tak avangin Barcelona pawh an han tlahniam leh deuh ren rawn a, tunah hian sum tam tak sengin club din thar leh tumin hma an la chho mek a ni.

Football hi mimala khelh chi a ni lova, khawi position-a awm pawhin an tihtur an tih vek a ngai. Chutiang a nih theih nan chuan naupan lai atanga academy-a awm ho chu duhthusam an ni a, an inkawmngeih hlawm a, field pawna an boruak tha tak chu field chhungah rawn langchhuakin trophy tam tak an lak theih phah thin.


Manager ropui an sawi apiangin game mawi satliah ringawt hi an sawi ngai lo, team-ah superstar te an awm a, player tha thiau inlungrual taka an awm theih nana mihring enkawl thiam bikte chu manager ropui tia sawi an ni thin. Game tactic mai a ni lo tih heta tang hian a chiang em em, chuvang chuan manager ten an tih hmasak ber thin chu team chhungah inlungrualna thlen hi a ni.
Training-na boruak tha leh inpumkhatna te chu ngaihpawimawh hmasak a ni thin a, dressing room boruak hian chak leh chak loh nasa takin a hrilh thin an tih hi thil dik tak a ni bawk. Chung atanga thil chiang tak chu football team tha leh ropui ni tur chuan team inlungrual leh inpumkhat an nih hmasak phawt a ngai a ni.

Mifing hmasa ten “Human beings are social animals” an lo tih thin angin Mihring hi mahnia tlafâl lo tûr leh chêng ho tûra Pathian siam kan ni. A tîr atang rêngin he khawvêla dam khawchhuak tûrin mihringte hi a huhova chêng tûrin Pathianin min duang a, chuvâng chuan chhûngkua, thenawm khawvêng leh khua te kan lonei ta a, hemi avâng tak hian Pathian chuan nunhona kawnga inrem taka kan awm theihna tûr hi a ngaihpawimawh ber pakhat a ni bawk.

“Sadukai-te chu a chhâng dang tih Farisai-te chuan an hriatin an inhmu khâwm a. An zînga Dânhremi pakhatin amah fiah nân, ‘Zirtîrtu, Dânah hian eng thupêk hi nge ropui ber?’ tiin a zâwt a. Ani chuan, ‘Lalpa i Pathian chu i thinlung zawng zawngin, i nunna zawng zawngin, i rilru zawng zawngin i hmangaih tûr a ni. Chu chu thupêk ropui leh pawimawh ber chu a ni. A dawttu, a anpui chu, Nangmah i inhmangaih angin i vêngte hmangaih rawh, tih hi a ni. Chûng thupêk pahnihah chuan Dân leh zâwlneite thu zawng zawng a inkhaikhâwm vek a ni,’ a ti a.” (Matthaia 22:34-40)

Mahni kan inhmangaih ang bawka vêngte hmangaih hi thupêk ropui ber a ni tih heta tang hian a lang chiang hle, kan thinlung zawng zawnga Pathian hmangaih tûr kan ni tih thupêk ropui ber dawttu leh a tlukpui a ni tlat si a. Lal Isua chhandamna hi Bible laimu a ni kan ti, a dik khawp mai, chumi tlukpui chu mahni mihringpui hmangaih hi a ni.“Duh takte u, Pathianin chute kauva min hmangaih chuan keini pawh kan inhmangaih tawn theuh tûr a ni. Tuma’n eng lai mahin Pathian an hmu ngai lo. Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang.” tih hi 1Johana 4:11-12 ah a inziak leh bawk a.

Heta tanga chiang tak chu Pathian hi kan hmu thei lova, kan khawih thei bawk hek lo, kan hmuh theih loh leh kan khawih theih loh hmangaih tawp hi mihring atang chuan thil har tak leh theih loh tluk a ni a, chutih laiin Johana chuan kan unau leh kan mihringpuite kan hmangaih hian Pathian hmangaihna leh a chenchilhna chu keimahniah a takin a rawn awm a, kan mihringpuite kan hmangaih hian Pathian kan hmangaih tihna a ni zâwk niin a sawi.

Tin, thusâwm pêkte hi thuthlung hlui lam ami a ni a, thuthlung thar hunah chuan kan inzirtîr vak tawh lo. Chutih laiin Lal Isua ngeiin kha dân kha hnâwl tûr leh tibâng tûra lo kal a nih loh thu a sawi rualin kha dân kha tifamkim tûra lo kal a nih thu a sawi. “Thupêk thar ka pe a che u; inhmangaih tawn rawh u,” tiin Lal Isua thusawi Johana 13:34 -ah a in târlang. Hmangaihna chuan dân thupêk zawng zawng kha a rawn tifamkim ta a, kan hmangaihte kan rûksak ngai lovang, kan hmangaihte kan that ngai bawk hek lovang, hmangaihna kan neih chuan thu sâwm pêk zawng zawng kha kan zawm nghâl vek tihna a lo ni tawh zâwk si a.

Kohhran chhûngkuaah kan inhmangaih tawn anga, chumi rah chu khawtlângah a lo lang chhuak zêl dâwn tihna a ni. Hmangaihna chu thiltihin a lang chhuak tûr a ni tih Bible-in a târlang bawk. Mizo kristian hmasate din a ni a, kohhranah mai ni lo, kohhran hrang hranga awm Mizo mipuiten a taka hmangaihna kan lantîrna pawl ropui tak kan nei, chu chu YMA hi a ni. Impumkhatna a awmna hmunah miracle a thleng thin a, khawtlâng kan lo inhmangaih tawn chuan inpumkhatna tha tak kan nei dawn tihna a ni a, impumkhatna kan neih chuan khawtlângah Pathian hnathawh a rawn lang zêl dâwn a ni.

Comments

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.