Skip to main content

Rock Music hi Setana music a ni.



Ka naupan laiin ka pa hian Oldies leh country music lam a ngaithla nasa thin, Skeeter Davies leh Merle Haggard te chu ka ngainat ber zing ami an ni a, an hla pawh ka sakpui thei deuh vek bawk. Kan lo thanglian deuh a, Rock music chuan min chiah hneh ta hle mai. Thin Lizzy, Deep Purple, Black Sabath, Judas Priest, Pink Floyd leh 90s Rock te thlengin ka ngaithla nasa. Mahse Rock music hi setana music a nih thu ka chhiar atangin Christian music lamah ka inlet ta daih a.

IDBI bank bula OB Books Store a awm lai atang khan Christian band tha ber ber leh artist tha ber ber te audio album ka lei chho tan a, Mercy Me hi ka hriat hmasak pawl a ni a, Petra kha chu OM Books awm hma daih atang tawha ka band ngainat a ni. Christian band leh artist-te ka rin ai daihin an lo thiam a, JCTV kan en ve theih chinah phei chuan Switchfoot te leh Pillar te chu ka duh em em bawk.

Petra hi Satanic band an ni

Christian Rock band tha ber zing ami leh ka duh ber Petra kha chanchinbu pakhat chuan Satanic band an nih thu a sawi mauh mai. Kum 2008 vela Internet chak kan hman theih hmasak bera ka en chu Petra chanchin a ni. Mahnia research ka neihnaah Petra band member te hi Kristian tha tak vek an lo ni a, an hla te reng reng pawh Pathian thu tak tak vek a lo ni bawk nen, Rock music an play avang khan Satanic band an lo ti mai zawk chu lo niin.

Rock Music hi setana hmanrua a ni.

Rock music hi setana hmanrua nia sawi thin a ni a, hei hi a dik reng em? Tih chu nasa takin ka inchhiar chhunzawm ta zel a. An hla thu a bawlhhlawh em em a, sex, drugs leh zu te chu an auchhuahpui. Tin, tharum thawhna lampang pawh a tam kher mai, satanic music an ti hi chu a awm ve hlein ka hria, hetih lai hian ka hriatchhuah tam tak te chu:

"Only my heart talkin," tih hla atanga ka ngainat em em Alice Cooper (Vincent Damon Furnier) thusawi hian thil tam tak a sawifiah ka ti thei awm e. Stage-ah arte nung lai a ei nia sawi chu an kawmnaah a nih loh thu chiang takin a sawi a. Kristian a nih hnua an interview naah chuan Stage-a an performance leh a taka an nun dan chu a inperhsan viau thu sawiin lan rapthlak an tum nana an inchei dante tidanglam mai chauh an nih thu a sawi.

Metallica pawh band rawva tak an ni, stage-a an khawsak dan pawh a PA thei khawp mai, hetih lai hian an inah chuan pa tha tak an ni hlawm a. Ozzy pawh chutiang bawkin, reality show an neih tuma an chhungkaw nun dan atang khan mi pangngai tak an ni tih a chiang. Hetih lai hian thil pakhat chu khang rock band lar tak tak te kha zu, drug leh nula avangin an buai thin hle tih erawh kan hrechiang vek awm e. Heng avang hian satanic band an ni tihna a ni kher lova, stage-a an khawsak dan hi a satanic pawh kan ti hle hlawm ngei ang, mahse entertainment a ni tih erawh kan hriatthiampui a tha hlein ka hria.

Rock band te hian an hlathuah tharum thawhna leh thil tha lo tak tak tarlan chu an chak ber a ni kher bik lo thin. Chutih laiin Recording label leh producer te pawimawh zia kan hria, anni hian an duh duh danin band leh artist-te hi an kuai her thin. Sumdawnna a ni tawh a, music ni mahse a baka an chet a ngai. A ngaithlatute duhzawng an siamchhuah a ngai tawh a, a ngaithlatuten ruihhlo lam an ngainat chuan chutiang lam hawi zawnga hlate pawh an siam a ngai nasa ta.

Football club lian tak takte nick name pawh a rapthlak ve hlawm thin hle, Manchester United pawhin "Red Devils," an inti a, local football team din ila, "Hmangaihna Pasaltha," tunge inti duh ang? Rawva taka lan a ngai thin, inlak ropui chawp te, hming rapthlak neihte hi entertainment vek a ni tih hi kan hriatthiam a tha khawp mai. Hetih lai hian satanic band leh artist te erawh an awm nual, chutih laiin rock band zawng zawng hi satanic band an ni lova, setana band leh setana hmanrua kan thlir thiam pawh a ngai. Pu Vanlalhlana leh Pu Ngurthangvela te pawh stage-a an inlan dawn chuan disco dress nen an rawn inthuam thin, mipui pawh an vaw hot thin hle, anni hian music leh entertainment kalkawp dan an hrechiang khawp mai.

Music Ropuina ka hrethiam ve deuhin ka inhria

Bible-a music tum hmasa ber nia kan hmuh chu Jubal-a a ni, music hi van atanga pek nia ngaih a ni bawk a. Davida pawh khan lal saula kawchhunga ramhuai hmehmit nan music a tum thin bawk a nih kha. Vawiin thlengin Pathianin music a hman nasat zia kan hria, chutiang bawkin setana pawhin music hmanga ram a lak nasat zia pawh kan hre bawk. Music hian emotion a kaitho thei a, love song kan ngaihthlak nasat changin kan lung a leng veng veng, tahpui hial te pawh kan awm thin. Music lungkuai ngaihthlak avanga mahni na intawrhtir leh mahni nunna hial la ta te pawh an awm nawk bawk a, mite laka natna thlen te pawh sawitur an awm bawk. A letling thawkin a thawk thin bawk, Pathian hla kan ngaihthlak hian kan thlarau pawh a tichak thin niin kan hre bawk. Thenkhat phei chu an pianthar phah hial bawk reng a ni.

Music/sound-in engtin nge mihringah hna a thawh

Sound chungchang hi thui tak sawi tur a awm, hetih lai hian kan sawi vek seng lo anga, kan hriat tlanglawn tur tlemte tarlang teh ang. Sai (Elephant) hian low frequency sound a hre thei a, hmun hla tak taka hmelma awmte leh ruah surte thlengin an hre thei. Mihring beng hian 20 Hz to 20 kHz kan hre thei a, hei aia hniam pawh kan beng dar hian a hre thei bawk. Hla vak lovah sapui a awm, mahse an hmu lo, "Ka thauah a man," an ti thin. Sakei 'ngur' ri va hre fak lo mahse beng darin a vibration a man a, chu chuan hlauhna mihringah a siam ta thin.

Music lamah lut ta ila, a rin leh rin loh lam ni lovin, frequency lam sawi ta ila. Mihring hian a thum lam leh frequency hniam lam hi kan ngaina tih research atanga hriat a ni. Rutgers University-a Cognitive scientist Karin Stromswold sawi danin, kan pian hma nu pumchhunga kan awm lai atanga kan bengin a hriat hmasak chu nute lungphu ri thum dap dap a ni, pawn lam ri te pawh pumin a lo dan tawh avangin naute hriat dan chuan a thum ta hrim hrim a. Ri thum deuh khun khun chu kan benga a rik hmasak tawh avangin kan pian chhuah hnu pawhin chu chu kan ngaina chhunzawm ta zel a. Music kan ngaihthlak hian thluak hian low freqeuncy sound hi a lo man zung zung bawk a. Taksaa kan ruhte hi taksa ruangam tana a pawimawh ang bawkin music-ah pawh bass hi music kaihruaitu a ni thin bawk. An zirchiannaah chuan low frequency music hian mihringah hna nasa takin a thawk thei a, emotion pawh a kochhuak hma em em bawk.

Sound hi ralthuam atana hman a ni tawh bawk a, dam phah nana hmang pawh an awm teuh tawh bawk. 1930s khan Dr. Royal Raymond Rice chuan music/sound hmangin damlo a lo enkawl dam nual tawh nghe nghe nia tarlan a ni. 432Hz leh 528Hz te phei chu miracle tone tia sawi a ni thin a, mihring DNA repair nan pawh a tangkai hle nia sawi a ni bawk. Nazi hunlai khan 440Hz chu thluak suk nan an lo hmang tawh bawk a. 396Hz phei chuan emotion nasa takin a kochhuak thei nia sawi a ni bawk. 19Hz infrasound phei chuan mihringah hlauhna a thlen thei nia chhut a ni bawk. Frequency hrang hrangin mihringa nghawng a neih dan kan sawi vek seng lovang, heng tlemte kan han tarlan atang hian a tlangpui chu kan hrethiam mai awm e.

Rock music-ah hian Drop B tunning hi an uar hle, a ri a pa chher chher, Rock nen pawh a inhmeh hle nghe nghe bawk. Hei hian a ngaithlatuteah emotion nasa takin a kochhuak thei nia sawi a ni nghe nghe bawk. Chutah tak chuan tharum thawhna te, sex, drugs leh ruihhlo thu an han chhamchhuak chiah mai chu hna a thawk tha thin kher mai. Hetiang chiah hian Revival team-te pawhin mihring emotion kaihthawh nan music an hmang ve thin bawk a, a frequency chu engpawh nise, music hrim hrim hian sawi tawh angin mihringah hna a thawk thei a, hremhmun hlauhawm zia an sawi hrep a, chutah Isua hmangaihna leh tawrhna an han sawi chhunzawm a, keyboard a rawn ri riai riai, "I lamah min hip rawh" tih hla an han play a, team lamin an lo sa chhunzawm bawk, mittui hi a sur zung zung a, kan inhlan leh nge nge thin.

Rock music chu setana music a ni ta em?

Rock, Classic, Rap, Raggae, Hip hop, Pop, Funk, Heavy Metal, Jazz, EDM, Blues, etc, eng music genre pawh hi Pathian music/setana music tih kan sawiin kan thliar hrang thei lo. Music petu chu Pathian a ni a, mihringa he thilpek ropui tak hi hmelma pa hian a lo hmang tangkai ve chauh zawk a ni. A music atanga thliar hran chi a ni lo, a hlathu atanga thliar hran chi zawk a ni e. A nih leh Secular music te chu kan ngaithla dawn lo tihna em ni keini Kristiante hian? Hei erawh nangma duhthlanna a ni tawh e. Chutih laiin music hian keimahniah vawilehkhatah danglamna a rawn siam nghal thut lo tih erawh hria la. Need for Speed game kan khelh ngun lutuk lai chuan motor kan han khalh hian chesual theilo leh chhe thei lova inngaih thut chang kan nei thin. Merlin film naupang ten an en nasa, an han in spell leh lawp lawp bawk a, mita kan hmuh leh benga kan hriatte hian min hruai nasa thin hle tih erawh thil chiang tak a ni a, kan atchilh lo a nih erawh chuan keimahniah danglamna a siam lem lo tih hriat mai mai chu a tha khawp mai.

Hla thalo pui pui ngaihthlak char charte hi a tha lo mai zawk chauh, mahni nun theuh inveng thei tura duan kan ni a, secular music nalh tak tak zir duh chang pawh a awm thei ang, kei chuan thil pawi niin ka ngai lem lo, ngaina ila, mahse atchilh lo ila, chu chu a tha berin ka hria. Pathian chuan eng music pawh a hmang thei, love song te thleng pawhin a hmang tih kei hian ka hrechiang. Norah Jones hla, "What Am I to you," tih ka ngaihthlak laiin ka thinlungah Isua hian thu min zawt tlata hriatna ka nei a, "Engtiang chiahin nge kei hi min hmangaih ve," tiin Isuan min zawt niin ka hria. He hla ka ngaihthlak apiang hian Isua ka hmangaih loh zia ka hrechhuak thin a, thupha ka chawi thin bawk a ni.

Comments

Post a Comment

Popular posts from this blog

Mi Judge zung zung tur hi kan ni em?

Bike exhaust ring tawk nen chak tawkin min rawn tlanpel, a la leu kual zuai zuai zui bawk. Rilru chhungril takah chuan, "Han thal zawr se aw," kan ti ru vawng vawng thin. Han thal tak tak se; pui dawn mah ila kan rilru tak chuan, "I chawh hle mai," kan ti ngei bawk ang le. Kan tan harsatna lian tak thlen chuang lo mahse kan huat hi a tling em em thin.

Hei hi mihring rilru put hmang a ni a, hmeichhe tawngkam takin; kan 'ei' loh zawng tute emaw an han che chhia a, internet leh social networking velah kan han dem rawn luih luih a. Hemi chungchang hi ngun taka kan ngaihtuah a ngai tlat mai.

Kum hnih liamta vel atang khan social networking Mizo community-ah hian kan tawngkam hman hi a danglamin kan duhtui ta lo sawt khawp mai. Hman deuh deuh hovin tutute emaw an rawn thur chhuak a, kan hmelhriat em em pawh ni lo, kan chhungkaw khawsak pawh nghawng miahlote pawh ni mahse kan tawngkam thiam ang tawkin kan han sawisel luih luih bawk a. Cyberbullying te hi sap hovi…

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.