Skip to main content

Pathian inhriattirna - Thil siamah


Vawiin hian Presbyterian kohhran hnuaia Senior department te chuan zirlai pakhatna kan zir dawn. A bu siamtu Rev. Rosiamliana Tochhawng hian a duh thalin he topic hi ziak dawn selang chuan kan zirlaibu tiat lawih hi a ziak thei ang. Chutih laiin minute 15 vel chhunga zir zawh hman tur kimchang leh ngaihnawm takin a rawn ziak a, hei hi ka duhtawk lo ni lovin, Golden Ratio hi tarlan ve hrim hrim ka chak tlat mai.

Lemziak ngaina tak tak chuan watermark dah lo mahse banga intar milem nalh tak hi Pu Tlangrokhuma ziak a ni tih an hre nalh nalh thei ang. Kha lem ziakah khan a special-na, midangin an neih loh a phum thin vang a ni kan ti thei awm e. Chutiang chiahin literature ngainate chuan lehkhabu ziaktu hming tarlang lo mahse tu thuziak nge tih an hre thei bawk anga. An tawngkam hman leh thluaithlum dan te chu an danglamna hriltu an nih thin avangin thil chik tak tan chuan thliar hran theih deuh an ni reng a ni.

Chutiang chiah chuan khawvela thil awmte hi han bih chiang ila, tu emawni, siamtu an tih chuan a thil siamteah hian a nihna a puang chhuak tih chiang takin kan hre thei awm e. Creator kan tih chuan a thil siamteah hian Golden Ratio a hmang ngei tih a lang chiang a, hei hi khawvel kalphung mai ni lovin, a thil siamteah a watermark a hnawih kai ti ila kan sawifiah ber awm e.

Golden Ratio : 


1.618....  hi Golden Ratio an tih chu a ni a, a bulthum chu 'Phi' a ni. Babulon mite khan Phi hi an hmuchhuak dik teuh hle a, 25/8 (3.125) ah an hrutrual a, Aigupta mite khan 256/81 (3.16) velah an chawk bawk. Greek mathematician Archimedes of Syracuse (287-212 BC) chu Phi value dik tak hmuchhuaktua pawm a ni ta a ni. Greek sculptor & mathematician Phidias (500 B.C. - 432 B.C.) chu a thil siamtea Phi hmang hmasa ber nia record a ni a. Phi chungchang hi sawi duah lo ila, High school-ah kan zir vek avangin tawitein sawi ila.

Line pakhat a awm, a hmawr lehlam A a ni a, lehlam B a ni a. Khawi emaw laiah C in a tan. Chu a tan tlangna lai chu Golden Ratio a nih dawn chuan, a lema kan hmuh ang hian A/B = C/A a ni tur a ni. Line tawi zawk sei zawng hmanga line sei zawk sei zawng kan sem chuan, golden ration a rawn chhuak tihna a ni.

Thil siamah Phi (ϕ) :


Mihring taksa bung hrang hrangah hian Golden Ratio kan hmu. Kan ruh chuktuah inzawm dan hi han en mah teh u, kut zungtang, kutphah, ban leh ke te pawh. Tin, kan kawnga chin chunglam a tawi a, ke lam erawh a sei zawk a. Chutiang zelin mihring DNA-ah thleng thengin golden ratio hman a ni tlat mai.

Fibonacci Sequence :

Kum 1300 liamta daih tawhah khan India ramah he number sequence hi hman ni tawh mahse kum 1202 khan Italian mathematician Leonardo Pisano (Leonardo Fibonacci) chuan a rawn hmuchhuak a. A rawn hmuchhuak han ti hluai mah ila a nihna takah chuan he sequence (1, 1, 2, 3, 5, 8, 13, 21.... ) bulthum chu Phi tho kha a ni.

1+1 chu 2 a ni a, 1+3 chu 5 a ni a, 3+5 chu 8 a ni a, a hma ami chiah number nena belh hian a chhuak chu a dawtah a intlar zel a. A hma ami chiah number hian han sem ta se, 5/3 = 1.666..  Golden Ratio kan tih velah chiah a tla leh tho, a dang dang pawh 1.6... velah hian a tlak vek.

He sequence hi Babylonian Tablet of Shamash (888–855 BC)-ah a lo chuang daih tawh a. Tin, Bible-ah pawh Exodus-ah khan kan hmu a, Pathian bawm awm dan tarlan danah khan  golden 3:5 proportions a ni tih a chiang.

Thil siamah Fibonacci Sequence :


Sawifiah deuh vak a ngaih avangin kan sawi tum berah pawh kan lut har kher mai. Apple hi a laiah zai la, a mu kan tih mai awmna hi 5 a ni. Pangpar (petal) hi han en la, 3 nei a awm a, 5 nei a awm leh a, 8 nei a awm leh a, Fibonacci Sequence hian a awm thlap thlap vek.

Nihawichi awm dan te, tuikep lung awm dan te, piring kawr invial dan mawi tak te leh Galaxy virkual dan te thlengin, kan sawi seng lovang; Fibonacci Sequence chu hengah hian hmuh a ni.

He pattern hi thil siam reng rengah hian hmuh tur a awm vek mai hian Creator (Siamtu) a awm chiang tih a tarlang. Creator an tih chuan a thil siam reng rengah a inpuanna (Watermark) a zep vek a, tunah rawn inlar hluai lo mahse a thilsiamte atang hian Pathian a awm ngei a ni tih kan hre thei a ni.

Comments

Popular posts from this blog

Bible thuruk ngaihnawm

Kumin Good Friday zan khan kan kohhran upa pakhat sermon chuan, " Setana leh a ho ten Isua chu an han kheng bet ta a, Lal Isua a thih chiah khan Setana leh a hote chu hlimin an lam a," a ti a. A dik lo chhiava lutuk khan thil tam tak min ngaihtuah tir ta zawk a. La Isua kha setanate khen beh a ni awkawng lo, setana khan a tir atanga a tawp thlenga dan a tum zawk kha a ni si a. Tichuan Pathian leh setana inbeihna hi khawvel pian hma atangin ka chhiar chho ta a, Bible chhung pawh a hma aiin ka hriat phah ta zawk a. Tichuan keima tawkah Bible thu tluang pangai kara thu ril leh ropui inthupte chu ka hmu thiam ve chho ta zel a.
Khawvel siam hma chanchin thlir kual zuai ila.
Bible chang hrang hrangah hmuhtur a awm a, Isaia 14 : 3-23 kan chhiar chuan chiang takin a inziak. Varparh, zing lam fapa (Lucifer) chu vantirhkoh te zingah chungnung ber ni mahse Pathian anga awm kha  chak ve avangin Vanah indona a ti chhuak a, tichuan chak lo zawkah tangin leiah paih thlak a ni ta a.  Khami za…

Taxi driver nen kan inkawm a

Ruah a sur nasat avangin taxi ka la a, tlan kawngah chuan taxi driver nen chuan kan inkawm ta a.

Two wheeler taxi hian a vawchhe dawn che u em? Tia ka zawhna chu, "Vawchhe khawp ang, a buaithlak dawn khawp mai," tiin min chhang.

Kei chuan heti hian ka sawi ta a, "Office kal nan two wheeler ka hmanna chhan chu taxi fare hi a to em a, hetia mahni motor ka ken hian sum kan saved hnem daih asin.

"Mahse taxi fare hi tlawm deuh selang chuan taxi hi ka hmang nasa ang. Parking vela buai buai hi ka ning a," tiin.

Taxi fare hi tlawm ta se tun ai hian in tlan tam zawk ang em? Tia ka zawhna chu, "Nia, kan tlan tam zawk ang. Tun ai hian kan hlawk zawk pawh ka ring bawk," tiin min chhang.

Kan ti ti chho zel a, kan ngaihdan inang ta em em chu, 'Taxi fare hi tlawm se, mipui hian public transport kan hmang nasa anga, mahni motor hawlchhuah tum kan tlem sawt bawk ang, hei hian traffic jam pawh nasa takin a ti ziaawm dawn a ni,' tih hi a ni.

Pathian hi a awm tak tak em?

Damdawi inah damlo kan awmpui a, ka thianpa nen chuan verandah-ah chhuakin hrisel hlutziate kan sawi dun a. Chutia kan titi mawlh mawlh lai chuan ka thianpa chuan, "A nih leh, Pathian awmpuina hi i tawng tak tak tawh em? Nangmahah Pathianin a awmpui ngei che tih hriatna engemaw thil tawn i nei tawh em?" tiin min zawt thut.

Ka nu hi tawngtai mi a ni a, awlsam takin kei chuan, "Aw tawng tawh e, ka nuin ka dam loh chang hian min tawngtai sak thin a, ka dam thin," tiin ka chhang. A ngawi vang vang a, "A nih leh damdawi a eitir thin tho che em?" Tiin min zawt leh, kei chuan min eitir thin thuin ka chhang. Chutah ka thianpa chuan, "Nachhawkna khan a chhawk lawk lo che a, tichuan i nuin a tawngtai che a, a tawngtai zawh rual chein nachhawkna chuan a chhawk ta thin che a nih chu," min ti a.

A nih duh hmel hi ka ti ta khawp mai a, a dang ka ngaihtuah leh a, "Lungleia ka kal dawnin car ka khalh a, tawngtaina hmunah keimahin ka tawngtai. Chutih lai c…